Almatydaǵy Ulttyq kitaphanada Gerold Belger atyndaǵy memorıaldy kabınet ashyldy. Sonymen qatar, jazýshynyń belgili rejısser Ermek Tursynovtyń Áleýmettik jáne gýmanıtarlyq qorynyń qoldaýymen jaryq kórgen «Pletene chepýhı» atty kitabynyń 1-shi tomynyń tusaýkeseri ótti.
Qazaqstannyń halyq jazýshysy, elýden astam kitaptyń avtory, pýblısıst, qazaq ádebıeti klassıkteriniń kóptegen shyǵarmalaryn orys tiline aýdaryp, álemge tanytýda ólsheýsiz úles qosqan Gerold Karlovıch Belgerdiń dúnıeden ótkenine eki jylǵa jýyqtady. Reseıde dúnıege kelip, qazaq aýylynda ósken ulty nemis jazýshy qalamgerligimen qosa qaıratkerligi arqyly da tanylǵan tulǵa.
Memorıaldy kabınettiń ashylýyna arnaıy kelgen jazýshynyń zaıyby Raısa Zákirqyzy Hısmatýllına ózi úshin asa qymbat kitaptyń jaryqqa shyqqanyna qýanǵanyn, óıtkeni, Ger-aǵań úshin óz kúndeligin kitap etip shyǵarý úlken arman bolǵanyn, sol armannyń oryndalyp otyrǵanyn aıtty.
«Ol árqashan «Árbir adam úshin baqyttyń óz ólshemi bar. Men úshin baqyt degen – maǵan jasalǵan jaqsylyqty qaıtarý, jaqsylyqqa jaqsylyqpen jaýap bere bilý. Qazaq eli – meniń týǵan ortam, óz Anam boldy» dep aıtatyn edi. Ol Otan aldyndaǵy, týǵan jer, qoǵam men jaqyn adamdary aldyndaǵy boryshyn ótep ketýdi maqsat tutty. Sol borysh úshin eńbek etti. Kóz jumar aldynda jansaqtaý bóliminde oıatý úshin qyzym ekeýimiz «Oıansańshy, kitabyńdy shyǵarý kerek qoı» dep aıtqanymyzda, es-tússiz jatqan onyń kózinen bir tamshy jas domalap aǵyp tústi... Uly dalanyń uly nemisi atalyp ketken Gerold Karlovıch ómirden ozǵanda qazaq halqy tarapynan sonshalyqty ystyq yqylasty kóremin dep kútpep edim», – dep tebirene kózine jas alǵan Raısa Zákirqyzy jınalǵan qaýymǵa alǵysyn bildirdi.
Jazýshy dúnıeden ótken soń qurylǵan qordyń dırektory Qanat Tórebaıdyń aıtýynsha, qor ujymy Gerold Belgerdiń 8 jasynan bastap jazǵan, barlyǵy 30 dápterden turatyn kúndelikterin «Pletene chepýhı» degen atpen 4 tom etip shyǵarýdy oıǵa alǵan eken. Ger-aǵańnyń amanat etip ketken murasyn kópshilik nazaryna usynýdy paryz sanaǵan Ermek Tursynovtyń atalmysh qory 2 myń dana taralymmen shyqqan alǵashqy tomdy elimizdiń barlyq kitap dúkenderinen satyp alýǵa bolatynyn aıtty.
Gerold Belger esimin este qaldyrý maqsatynda, sondaı-aq, «Qazaqfılm» kınostýdııasy túsirgen «Belger» atty derekti fılm de jınalǵan jurttyń nazaryna usynyldy.
Mıra BAIBEK,
«Egemen Qazaqstan»
ALMATY