Asqar Ábildaev: "Shahter" komandasynyń qarjylyq jaǵdaıy túzelip keledi

Bıylǵy maýsymdy biraz qıynshylyqtarmen ótkizgen «Shahter» fýtbol komandasynyń basshylyǵy men bapkerleri birneshe ret aýysty. Sońynan atqarýshy dırektor bolyp  Asqar Ábildaev keldi. – Asqar Zúbaıdildauly, qalyń oqyrmanǵa ózińizdi qysqasha tanystyryp ótsek. – Men osy «Shahterdiń» daıarlyq tobyna alǵash bala kúnimde kelip edim. Toǵyz jasymnan Anatolıı Chýdınovtyń qol astynda jat­tyqtym. Komandanyń negizgi qura­mynda 1986 jyldan bastap oınadym. Ol kezde bas bapkerimiz Serik Áshirbekov edi. «Shahterde» úsh maýsym oınap, 1991 jyly Almatynyń «Qaıratyna» aýystym. 1992 jyly osy komandamen birge Qazaqstan chempıony, el Kýbogynyń ıegeri boldym. 1994 jyly bir maý­sym Pavlodardyń «Ańsat» klýbynda óner kórsetip, odan soń qaıtadan «Shahterge» keldim. Keńes dáýirinde de, elimiz Táýelsizdik alǵannan keıin de Qazaqstannyń aldymen jasóspirimder, jastar quramasynda, odan keıin ulttyq qurama komandasynda oınadym. Keıin memlekettik qyzmetke aýy­syp, 2008 jyly «Shahter» fýtbol klýbynyń atqarýshy dırektory bolyp taǵaıyndaldym. 2015 jyldan qazirgi qyzmetime deıin Qazaqstan Fýtbol federasııasynyń buqaralyq fýtbol departamentin basqardym. – Klýb basshylyǵyna endi kelip jatyrsyz. Baǵyt qandaı bolmaq? – «Shahterdiń» quramynda jer­gilikti myqty oıynshylar qaı kezde de bolǵan. Kezinde komandany meılinshe Qaraǵandy fýtbolynyń tól shákirtterimen qamtamasyz ettik. Ol bastama nátıjesiz bolǵan joq. Qazir de sol jalǵasady – Komandanyń bıylǵy problemalary negizinen qarjy jetis­peýshiligi boldy dep otyrmyz. Aldaǵy maýsymda bul jaǵdaı qaıtalanbaı ma? – «Shahter» fýtbol klýbynyń qarjylyq jaǵdaıy qazir túzelip keledi. Oblys basshylyǵy sportqa, onyń ishinde, ásirese, fýtbolǵa erekshe kóńil bólip otyr. Kókeıde kópten júrgen ózekti máseleniń biri – kenshiler qalasyna jeke fýtbol maneji kerek. Qalanyń Maıqudyq jáne Ońtústik-Shyǵys turǵyn aýdandarynyń arasyndaǵy bos keńistikke fýtbol stadıony salynady dep josparlanǵan. Sol másele tezirek qolǵa alynsa, Qaraǵandy fýtbolyn jetildirýge kóp kómegi tıer edi. – Dástúr jalǵastyǵy bolýy kerek. Qazir «Shahterdiń» qosal­qy quramyn, jas fýtbolshylardy daıarlaý jaǵy qalaı? – Komandaǵa qosalqy quram fýtbolshylaryn daıarlaý da ózekti máseleniń biri. Onymen Qazaqstan Fýtbol federasııasynyń arnaıy baǵdarlamasy boıynsha «Shahter» klýbynyń ortalyǵy, sonymen qa­tar, balalar men jasóspirimder sport mektebi jáne  Á.Moldaǵulova atyndaǵy sportqa beıimdi, daryndy balalarǵa arnalǵan oblystyq mamandandyrylǵan mektep-ın­ternattyń fýtbol bólimderi aınalysady.  О́kinishke qaraı, mektep-ınternat balalardy byltyr alǵash ret fýtbol bólimine qabyldamaı qaldy. Biraq, solaı eken dep salymyz sýǵa ketpeýi kerek. Sport bas­qarmasy taıaýda qalanyń Su­ryp­taý turǵyn aýmaǵyndaǵy «Lo­komotıv» sport keshenin qaıta jóndeýden ótkizip, «Shahter» fýtbol klýbynyń fýtbol ortalyǵy sonda kóshiriletin bolady. Keıin sol jerden Fýtbol akademııa­syn ashýǵa bolady. «Lokomotıv» sport keshenin qaıta jóndeýden ótkizip, sonyń bazasynda Fýtbol akademııa­syn qurý qajettigin  2007 jyly sol kezdegi Qaraǵandy oblysynyń ákimi Nurlan Nyǵmatýlın aıtqan bolatyn. Sodan beri onshaqty jyl ótse de, akademııaǵa degen suranys óspese, kemı qoıǵan joq. Sondyqtan, bul máseleni tezirek sheshýge asyqqanymyz abzal. Áńgimelesken Qaırat ÁBILDINOV, «Egemen Qazaqstan»   QARAǴANDY