Ushsa qustyń qanaty, júgirse ańnyń aıaǵy talatyn keń-baıtaq Qazaqstan óńirleri úshin ózara tájirıbe almasýdyń, jaqsyny úırenýdiń esh artyqshylyǵy joq. Búgingideı jahandaný úrdisiniń óliara kezeńinde ortaq maqsat jolyndaǵy keleli máseleler aýyzbirlikpen, yntymaqpen sheshilip, qýanyshty qaýyshýlar, jarqyn júzdesýler áleýmettik-ekonomıkalyq damýdyń ishki múmkindikteri men syrtqy rezervterin saralap berse, utarymyz kóp. «Aralaspasa, aǵaıyn jat» degen. Osy támsildi berik ustanǵan jer jannaty Jetisý óńiriniń delegasııasyn Almaty oblysynyń ákimi Amandyq Batalovtyń bastap kelýiniń bir syry Elbasy tapsyrmalaryn júzege asyrý múddesinen týyndaǵany anyq. Aımaq basshysy Erik Sultanov Alataý bókterinen at basyn tiregen qurmetti qonaqtardy qushaq jaıa qarsy alyp, iskerlik kezdesýdi Petropavl qalasynyń mańynda ornalasqan «Green Park» demalys ornymen tanystyrýdan bastady. Bul jerden demalýshylar esh úzilmeıdi. Kópshiliktiń usynystary eskerilip, keleshekte amfıteatr ashý kózdelgen. Árıne, qaharly qysynan jaıdary jazy basym Jetisý jeri týrızmdi órkendetýge óte qolaıly ekenin eskersek, ózara tájirıbe almasýdyń paıdasy zor ekeni aıtpasa da túsinikti. Budan keıin delegasııa músheleri bir myńnan astam adam shynyǵatyn sport saraıynda bolyp, jeńil atletıkalyq manej ben muz aıdynyn, oqý-jattyǵý zaldaryn tamashalady.
Qos taraptyń iskerlik basqosýynda Erik Sultanov bıyl elimizdiń aımaqtaryna 39 mıllıard teńgeniń ónerkásip ónimderi jóneltilgenin, onyń 3,9 paıyzyn Almaty oblysy quraıtynyn, osy oraıda saýda-sattyq aınalymyn ulǵaıtý birinshi mindet ekenin jetkizdi. О́z kezeginde A.Batalov aımaqtyń áleýetimen tanystyrdy. Qant qyzylshasyn óndirý, Almaty aportyn ósirý jumysy jandanyp keledi. 20 myń gektar alma baǵynyń eki myń gektaryna aport ósiriledi. Sondaı-aq, jemis-jıdektiń basqa túrlerimen qamtamasyz ete alatyn áleýeti de mol. Aldaǵy ýaqytta Reseımen túıisetin shekara tusynda kólik-logıstıkalyq ortalyq ashylatyn bolsa, almatylyq kásipkerler úshin de syrtqy naryqqa keń jol ashylary sózsiz.
Qyzyljar óńiriniń jer qoınaýy túrli-tústi metaldarǵa baı. 286 paıdaly qazba oryndarynda altyn, qalaıy, temir, kómirdiń mol qory bar bolsa, Almaty oblysy álemniń 108 elimen saýda baılanysyn ornatqan. 41 elge ónim jetkizilip, 83 memleketten ımporttyq taýar ákelinedi. Teriskeıge 30 almatylyq kásiporyn óz ónimderin tasymaldaıdy. Kezdesý barysynda jergilikti «Sút ónimderi» jaýapkershiligi shekteýli seriktestiginiń dırektory Roza Súleımenova men Almaty oblysy «Jaqsylyq» sharýa qojalyǵynyń basshysy Jaqsylyq Úshkempirov atqaryp otyrǵan jumystarymen tanystyrdy.
Jıyn aýyl sharýashylyǵy jáne kásipkerlik salalar boıynsha memorandýmdarǵa qol qoıýmen aıaqtaldy.
– Almaty oblysynyń ishki áleýeti zor. Endi jemis-jıdek ónimderin Reseıge tasymaldaıtyn bolady. Bul baǵyttaǵy jumysymyzdyń nátıjeli bolýyna kólik-logıstıkalyq ortalyqtyń qosar úlesi ólsheýsiz, – dedi E.Sultanov BAQ ókilderine bergen suhbatynda. A.Batalov soltústiktiń sapaly unyna jáne mashına jasaý salasyna qyzyǵýshylyq tanytyp otyrǵandaryn atap kórsetti.
– Bizdiń óńirde 2 mıllıon adam turady. Olardy nanmen tolyqqandy qamtamasyz etý úshin birqatar kelisimderge qol qoıyldy. Munyń bári turǵyndardyń áleýmettik qorǵalýyn jáne azyq-túlik qaýipsizdigin retteıdi, – dedi A.Batalov.
О́mir ESQALI,
«Egemen Qazaqstan»
Soltústik Qazaqstan oblysy