Ishki ister organdarynyń habarlarynda orden, medaldardyń qoldy bolatyny jóninde jıi aıtylyp jatady. Etimiz úırenip qalǵan ba, bas shaıqaımyz da qoıamyz. Áıtkenmen, myna bir jaǵdaıǵa bas shaıqaı salýǵa áste bolmaıtyndaı.
Qarttar aılyǵynyń sońǵy kúnderinde Kókshetaý qalasynyń 76 jastaǵy turǵyny jergilikti ishki ister basqarmasyna shaǵymdanyp, «Eńbek ardageri» medaliniń joǵalǵanyn habarlaǵan. Polıseıler jedel iske kirisip, tıisti amal-sharalardy tııanaqty atqarýy nátıjesinde, urlyqshy anyqtalyp, qylmystyq kodekstiń 188-bap, 2-bólimimen jaýapqa tartyldy.
Kúdikti kim deısiz ǵoı? Syldyrmaqqa qumar jasóspirim emes, sol zeınetker ananyń 44 jastaǵy balasy eken. Tekseris barysynda medaldiń ótken shilde aıynda joǵalǵany anyqtalǵan. Eń sumdyǵy, álgi «qarasaqal» medaldi bar-joǵy bir jarty araqqa aıyrbastap jiberipti. Endi polısııa qyzmetkerleri arzan medaldi ala salǵan azamatty izdep áýrege túsýde. Balasy mundaı qadamǵa bara qoıady dep oılamaǵan qarııa endi aryzyn qaıtyp alǵysy keletin kórinedi.
Ana júregin túsinýge bolady. Biraq, bul jerde ókinish uǵymynyń ózgeshe sıpaty bar dep oılaımyz. Birinshiden, keltirilgen shyǵyn 20 myń teńgege baǵalanypty. Týra maǵynasynda aıtsaq, bul medalǵa eshqandaı baǵa qoıa almaısyz. Munyń astarynda elimizdegi búkil ardaqtylarymyzdyń uzaq jyldarǵy abyroıly eńbeginiń qymbat qorytyndysy, qýanyshty kúnderiniń umytylmas jetegi bar.
Aqmola oblysy