«Egemen Qazaqstan» gazetiniń 2016 jylǵy 26 qazan, 205-shi sanynda jaryq kórgen Báıdibek aýdanynyń turǵyny Muhtar Turdalıevtiń kórgen túsi týraly jazylǵan «Ańyz ben aqıqat» degen maqalaǵa oraı óz pikirimdi bildirýdi jón sanadym. О́zim keńes dáýirinde partııa-keńes qyzmetkeri bolǵan adammyn. Negizgi kásibim bolmasa da, ólke tarıhyn zertteýmen aınalysyp, birneshe kitabym jaryq kórdi.
Al endi meniń aıtaıyn degenim, Zaısan aýdany Úlken Qaratal aýylynyń týmasy Kákıqyzy Kúmisaı degen boıjetken Almatydan týystaryna 1996 jyly telefon shalyp, tús kórgenin aıtady. Túsinde belgisiz adam kelip: «Men áz-Jánibek hanmen teń bolǵan adammyn. Boıym 2 metr 35 sm. HVII ǵasyrda 49 jasta jaý qolynan qaza taptym. Namaz oqyp otyrǵanda qylyshpen basymnyń jelke tusynan shapty, san ǵasyr aıaqasty bolyp, taptalyp jatyrmyn, máıitim seniń babań Nurpeıistiń úıiniń terezesi aldynda, 2 metr jerde jatyr. Qazyp alyp qaıta jerleýge kómektesýińdi suraımyn», dep joq bolyp ketedi.
Kúmisaıdyń týystary bul áńgimege mán bermeıdi. Belgisiz adam aýyq-aýyq Kúmisaıdy mazalaı berse kerek. Boıjetken yza bolyp, eger aıtqandy oryn-damasańdar sol jerdi ózim baryp qazamyn degennen keıin aǵalary lajsyz 1997 jyly aıtylǵan mólshermen jerdi qazǵanda shynynda da óte iri adamnyń súıegi shyǵady. Olar súıekti jınastyryp, Úlken Qaratal aýylynyń ońtústik jaǵyna jańa jerge qaıta jerleıdi. Ol zıratqa alystan arnaıy kelip, quran oqytyp júrgender bar. Sondyqtan da Muhtar Turdalıev aqsaqaldyń ejelgi Otyrar kitaphanasy týraly kórgen túsine jeńil-jelpi qaraýǵa bolmaıtyn sııaqty. Tabıǵatta tylsym dúnıe kóp qoı. Otyrardyń baı kitaphanasy tabylsa, Qazaq eli úshin qun jetpeıtin altyn qazyna ǵoı.
Qalıbek ALTYBAEV,
Zaısan aýdanynyń qurmetti azamaty,
Qazaqstan Jýrnalıster odaǵynyń múshesi
Shyǵys Qazaqstan oblysy