Janarmaı nege jetpeıdi?

Energetıka mınıstrliginiń janar-jaǵarmaıdy satýshy kompanııalarǵa bólý joldary túsiniksiz. Bul týraly Ortalyq kommýnıkasııalar qyzmetinde ótken brıfıngte «QMО́Z» JShS basshylyǵy aıtty. Olar basqosý barysynda elimizde 4700-ge jýyq janar-jaǵarmaı quıý stansasy bar ekenin jetkizdi. Alaıda, olardyń 4300-i ǵana jumys istep tur. JShS basqarýshy dırektory Dáýlet Qalıhanovtyń kezdesýdegi sózine qara­ǵanda, joǵarydaǵy sannyń 326-sy – «QazMunaıGaz», 270-si – «Gelıos» já­ne 131-i «Sınoıl» kompanııalaryna tıesili. «Biz kompanııamyzdy Energetıka mınıstrliginiń munaı ónimderin bólý kestesine qosyp, úsh mekemeden keıingi eń iri tórtinshi JQS retinde, olarmen birdeı, tipti shalǵaı óńirlerdegi janar-jaǵarmaı quıý stansalaryn janarmaımen qamtamasyz etýdi maqsat etken edik. Osy údeden shyqtyq, aǵymdaǵy jylǵy qyrkúıek aıynda Energetıka mınıstrligi «QMО́Z» JShS-in ózderiniń bólý kestesine qosty. Bizdiń seriktestik jelileriniń jalpy tutyný kólemi shamamen 80 myń tonnany quraıdy. Alaıda, biz ótinish berilgen kólemniń tek 1660 tonnasyn ǵana aldyq. Bul tek Ońtústik Qazaqstan oblysy qajet­ti­liginiń nebári eki paıyzyna ǵana jetkilikti», dedi ol. Dáýlet Qalıhanovtyń málimetinshe, qyrkúıek aıynda «QazMunaıGaz» – 78  myń, «Gelıos» – 36 myń, «Sınoıl» 41 myń tonna janar-jaǵarmaı alǵan. «Al biz sonsha tómen mólsherde ónim alýy­myzdy alǵashqyda naryqtaǵy jańa oıyn­shy ekendigimizben baılanystyrdyq jáne bólý kestesine alǵash ret qatysyp otyrǵandyǵymyzdy da eskergen bolar dep oıladyq. Kelesi aıda durystalar dep úmittendik te. Biraq, qazan aıynda birde-bir tonna benzın bólingen joq. Qazirgi ýaqytta Energetıka mınıstrliginiń ókilderi muny Pavlodar men Shymkent munaı óńdeý zaýyttarynda josparly jóndeý jumystarynyń bastalýymen túsindirýde», dedi «QMО́Z» JShS basshysy. Degenmen, joǵaryda atalǵan úsh alpaýyt kompanııa qazan aıynda qyrkúıek aıy­nan da joǵary kólemde munaı ónimderin alǵan. «Bizderge resýrstardyń qandaı jolmen bólinetindigi túsiniksiz», dedi kompanııa ókilderi. Jıynda bilgenimizdeı, qazirgi tań­da Qazaqstan aýmaǵynda munaı óń­deıtin úsh zaýyt jumys isteıdi eken. Olar­dyń naryqqa shyǵaryp otyrǵan ónimderi tutynýshylardyń suranysyn qanaǵattandyrýǵa ábden jetkilikti kórinedi. Ashat RAIQUL, «Egemen Qazaqstan»