Áıelderge gúl syılady
Áıelder merekesi qarsańynda Qazaqstan Respýblıkasy prezıdenttigine kandıdat, «Tabıǵat» ekologııalyq odaǵynyń tóraǵasy Mels Eleýsizov Almaty qalasyndaǵy «JPB-Avtobaza» aksıonerlik qoǵamy Áýezov aýdandyq basqarmasynyń qyzmetkerlerimen kezdesti.
Kólikke qatysy bar adamdardyń ekolog Eleýsizovke de qatysy bar. Aýany lastaıtyn basty sebepter – kólik, naqtyraq aıtqanda, ol paıdalanatyn janar maıdyń sapasy. Sol sapasyz benzın aýany lastap qana qoımaıdy, kólikke de myqtap zııan keltiredi eken. Benzınniń sapasy qashan jaqsarady, dedi kezdesýge kelgender.
Prezıdenttikke kandıdat bul máseleni burynnan qozǵap kele jatqanyn, úkimet aldyna talaı ret qoıǵanyn aıtty. Bul asa mańyzdy másele aldaǵy ýaqytta da únemi onyń nazarynda bolmaq.
Jurttyń bárin baǵa máselesi tolǵandyrady. Onyń eńbekaqydan jyldamyraq ósýi otbasynyń bıýdjetine aýyr tıedi. Baǵany tómendetý – mindet. Tek memlekettik deńgeıde sheshýge bolatyn bul máseleni sheshý maqsatynda prezıdenttikke kandıdat óziniń árqashan kúresetinin aıtty. Basqalardy da soǵan shaqyrdy.
Árkimniń kóńilinde óz máselesi júredi. Qaraqalpaqstannan kelgen Jandarbek degen oralman el azamattyǵyn alý úshin esep-shotyńda 1,5 mıllıon teńge qarjysy bolý kerek degen talaptyń aýyrtpalyǵyn sóz etti. Qıyn jaqtan kelgen adamnyń qaltasynda mundaı qarjy bolmaıtyny belgili. Bul talap elin ańsap júrgen talaı azamattardyń jolyn bógeıdi. Prezıdenttikke kandıdat bul máseleni tıisti deńgeıde sheshý úshin kúresetinin málimdedi.
Sondaı-aq, elimizdiń bas ekology jınalǵan qaýymdy belsendi ómir súrýge shaqyrdy. Qoǵam sonda jaqsarady. Erteńgi kúni saılaý kezinde daýys berýge barlyqtaryńyz qatysyńyzdar, dedi ol. – Kimge de bolsa, óz qalaýlaryńyzdy bildirińizder.
Kezdesý áıelder merekesi qarsańynda bolǵandyqtan da, prezıdenttikten úmitker bir qushaq gúl ala kelgen eken, sony qyz-kelinshekterge syılady.
Mamadııar JAQYP.