Aqtaýda M.О́skenbaev atyndaǵy oblystyq fılarmonııanyń uıymdastyrýymen halqymyzdyń birtýar uldarynyń biri, halyq ártisi, Memlekettik syılyqtyń laýreaty, dáýlesker kúıshi Qarshyǵa Ahmedııarovqa arnalǵan «Kúı uran» atty eske alý keshi boldy. Osy bir saǵynyshqa toly sazdy keshte Qarshyǵanyń ónerdegi dosy, aǵasy Serjan Shákirat Esbaıdyń «О́ttiń dúnıe» kúıin tebirene, tolǵana oryndap, áıgili ónerpaz jaıly estelikter aıtty. Odan ári Abyl atyndaǵy ult aspaptar orkestri Qarshyǵanyń «Altyn uıa» atty kúıin ádemi oryndady. Túbektiń belgili ónerpazdary R.Aıdarbaeva, G.Qolǵanatov, N.Musaǵalıev, S.Boranova, B.Tólembetov avtordyń syrǵa toly, sazdy áýenderin shalqytty. Osy keshte áıgili ónerpazdyń ekinshi sazgerlik qyryn jarqyrata kórsetken «Jer-ana», «Shabyt», «Aýylym», «Kóktem sazy», t.b. ánderin ólkeniń óner juldyzdary naqyshyna keltire jetkizdi.
Eske alý keshiniń sońy Qarshyǵanyń «Kúı uran» kúıimen aıaqtaldy. Jınalǵan jurtshylyq Qarshyǵany saǵynyp-aq qalypty. Degenmen, qazaqtyń qasıetti qara dombyrasynyń sıqyrly da sazdy úni saǵynysh muńyn bir sátke bolsa da seıilte túskendeı áser qaldy.
Jolaman BOShALAQ,
Aqtaý qalasy.