Japonııanyń eń iri Honsıý aralynda alapat jer silkinisi tirkeldi. Onyń kúshi, keıbir derekterge qaraǵanda, 8,9 ballǵa jetken. Zilzalanyń epısentri Tynyq muhıtynyń túbinde ornalasypty. Osynyń saldarynan bıiktigi 10 metrge deıin sýnamı kóterilgen.
El astanasy Tokıonyń ózinde 4 myńdaı ǵımarat qıraǵan. Zilzaladan opat bolǵandar sany ázirshe belgisiz. Alyp tolqyndar jaǵalaýǵa jaqyn mańdaǵy eldi mekenderdi shaıyp ketken. Endi sýnamı Ońtústik-Shyǵys Azııanyń birqatar elderine jáne Avstralııaǵa qaýip tóndirýi yqtımal. Kóptegen turǵyndar qaýipsiz jerlerge kóshirilýde.
Reseı Aýǵanstanǵa tikushaqtar satady
Reseı men NATO Aýǵanstanǵa 24 kópmaqsatty MI-17 tikushaqtaryn satý týraly ýaǵdalastyqqa qol jetkizdi. Kelisim-shartqa osy jyldyń naýryz aıynyń aıaǵyna deıin qol qoıylady dep kútilýde. Kelissóz úderisinde NATO tarabynan AQSh ókilettilik etti.
Sóıtip, Reseı jaǵy Aýǵanstanǵa 24 tikushaq satatyn bolsa, taǵy úsheýin tegin bermek. Qarjy NATO-nyń arnaıy qorynan tólenedi. Bul qor taıaý bolashaqta qurylatyn bolyp belgilengen. Oǵan alıansqa múshe memleketterdiń barlyǵy jeke-jeke jarna engizýleri tıis. Osylaısha Aýǵanstannyń áskerı-áýe kúshterindegi Reseı áýe kemeleriniń sany 100-ge jetpek.
Saýdııada mıtıngiletýge ruqsat joq
Saýd Arabııasynyń Ál-Katıf qalasynda beısenbi kúni keshkisin demonstrasııaǵa shyqqan 3 adam jaraqat aldy. Mıtıngke shyǵýshylar shııtterdiń ókilderi bolyp tabylady. Jalpy, atalǵan qalanyń kóshelerine, aralarynda áıelder de bar, shamamen 800 shııt shyqqan eken.
Olardyń talaptary – bireý: qamaýǵa alynǵan shııt ókilderin bosatý. Mıtıngke shyqqandardy qýyp taratýǵa 200-deı polısııa qyzmetkeri qatysqan. Olardyń aıtqandaryna baǵynbaǵandarǵa qarsy oq atylǵan. Ústimizdegi jylǵy naýryz aıynyń basynan Saýdııa ishki ister mınıstrligi elde demonstrasııaǵa shyǵýǵa tyıym salǵan bolatyn. Vedomstvodaǵylardyń aıtýlarynsha, mıtıngter sharıǵatqa qaıshy keledi. Bul tyıymnyń basqa, ıaǵnı basty astary bar ekeni de túsinikti.
Reseıge degen kózqaras
Ulybrıtanııanyń radıohabarlaryn taratatyn VVS korporasııasyna qarasty GlobeScan kompanııasynyń sarapshylary ózderi júrgizgen suraý salýlardyń kezekti nátıjelerin jarııa etti. Álemniń 27 memleketinde júrgizilgen suraý salýlar boıynsha respondentter Reseıdiń álemge yqpaly jónindegi kózqarasyn burynǵysynsha teristeý kúıinde qaldyrǵan.
Reseıge oń kózqaras tanytqan elder qatarynda Úndistan, Qytaı, Ońtústik Koreıa bar. Al asa oń baǵamǵa ıe bolǵan el Germanııa bolyp otyr. Eń teris baǵa alǵan memleket Iran bolyp tabylady. Bul el byltyr da kósh basynda turǵan eken. Sondaı-aq álemge teris yqpaldy memleketter qatarynda Pákstan, Koreıa Halyq-Demokratııalyq Respýblıkasy jáne Izraıl atalǵan. AQSh-qa qatysty kózqaras ekiudaı.