Maqat –Atyraýdaǵy óndiristi aýdannyń biri. Dál osy aýdanǵa «Táýelsiz Qazaqstan» poıyzy arnaıy aıaldady. Shtab jetekshisi Ámirjan Álpeıisov bastaǵan salalyq mınıstrlikter men túrli komıtetterdiń, ulttyq holdıngterdiń tańdaýly ókilderi men jetekshi mamandarynan quralǵan topty jurtshylyqpen birge aýdan ákimi Berikqalı Sársenǵalıev qarsy aldy.
–Keń jazıraly dalamyzdy baıandy mekenine aınaldyrǵan kópetnosty elimizde táýelsizdik jyldarynda bekem birligi men yrysty yntymaǵyna syzat túspedi. Buǵan jahannyń barsha jurty qyzyǵyp qaraıdy. Qarashańyraq –Qazaqstanymyzdaǵy órkendi ózgeristerge, tútini túzý tynyshtyqqa qyzǵana qaraıtyndar da bar. Biz úshin eń bastysy –elimizdiń ósip-órkendeýi, yntymaǵymyzdyń bekemdele túsýi. Halqymyz «Yrys aldy –yntymaq» dep beker aıtpaǵan. Eldegi birliktiń nyǵaıýyna da, yrysymyzdy tasytqan ulttyq ekonomıkamyzdyń órken jaıýyna da árqaısyńyzdyń úlesińiz bar. Men barshańyzdy Táýelsizdiktiń 25 jyldyq mereıtoıymen quttyqtaımyn, –dedi «Táýelsiz Qazaqstan» poıyzynyń shtab jetekshisi Ámirjan Álpeıisov.
Shyn máninde bul poızdyń kelýine aýdan turǵyndary qyzyǵýshylyq tanytty. Dárigerler aldyna kelgen turǵyndardyń barlyǵyna medısınalyq kómek kórsetildi. Durys tamaqtaný men tynyǵýdyń mańyzdylyǵyn da turǵyndarǵa túsindirildi. Máselen, Serikbaı Saqtaǵanov poıyz quramymen kelgen joǵary sanatty kardıologtyń keńesimen júregine em-dom jasaýdyń jolyn bilgenine rızashylyǵyn bildirdi. Sol sekildi kásipker Salamat Qýanyshev «Atameken» ulttyq kásipkerler palatasynyń ókilderinen kásipkerlikti odan ári keńeıtý úshin kórsetiletin qoldaýdyń jaı-japsaryna qanyqty.
–Keıde áldebir áldebir másele úshin oblysqa, tipti, Astanaǵa deıin barýdyń qajettigi týyndap jatady. Adam bolǵan soń syrqattanbaı tura ma? Keı syrqat jandar janyna shıpa Astana, Almaty sekildi iri qalalardaǵy bilikti dárigerlerge barýyna múmkindigi bola bermeıdi. Al búgin aýdanymyzǵa kásibı dárigerler de, túrli salanyń jetekshi ókilderi de kelip, qabyldaý júrgizdi. Bul –biz úshin úlken qýanysh, –deıdi aýdandyq ardagerler keńesiniń tóraǵasy Sábıt Qalenov.
Maqat aýdanynyń turǵyndary «Táýelsiz Qazaqstan» poıyzynyń ókilderinen «Jumyspen qamtý –2020», «Jastar tájirıbesi», «25 jyldyń belesteri» jáne memlekettik qyzmetter usyný máseleleri boıynsha aqyl-keńes aldy.
Joldasbek ShО́PEǴUL,
«Egemen Qazaqstan».
Atyraý oblysy,
Maqat aýdany.