Keshe Qazaqstan Respýblıkasynyń Memlekettik hatshysy – Syrtqy ister mınıstri Qanat Saýdabaev Eýropa Keńesi Parlamenttik Assambleıasynyń Prezıdenti Mavlıýt Chavýshoǵlýmen telefon arqyly sóılesti, dep habarlady QR SIM-iniń baspasóz qyzmeti.
Áńgimelesýshi taraptar Qazaqstan men Eýropa Keńesiniń Parlamenttik Assambleıasy arasyndaǵy yntymaqtastyq máselelerin jáne onyń nyǵaıýy men keńeıýin talqyǵa saldy.
3 sáýir kúni Qazaqstan Respýblıkasynyń kezekten tys prezıdenttik saılaýy eldiń demokratııaǵa qaraı jasaǵan mańyzdy qadamy dep tanımyz, dedi óz sózinde M.Chavýshoǵlý. Osyǵan baılanysty Eýropa Keńesiniń Parlamenttik Assambleıasy saılaýdy baıqaýǵa óz tarapynan arnaıy delegasııa joldaýǵa sheshim qabyldap otyr.
О́z kezeginde Q.Saýdabaev áńgimelesýshi tarapqa qabyldaǵan sheshimi úshin alǵysyn jetkize otyryp, aldaǵy saılaýǵa halyqaralyq qoǵamdastyq óte úlken kóńil bólip otyrǵanyn atap ótti. EQYU Adam quqyqtary jónindegi bıýrosy, TMD Atqarýshy komıteti, Ujymdyq qaýipsizdik sharty uıymy Parlamenttik Assambleıasy, IKU, ShYU jáne basqa da halyqaralyq uıymdar óz baıqaýshylaryn joldap otyrǵany osynyń aıqyn dáleli bolyp tabylady. Sonymen qatar, syrtqy saıasat vedomstvo basshysy Qazaqstanda olardyń jumys jasaýyna jáne saılaýdy halyqaralyq talaptarǵa saı ótkizýge tolyq jaǵdaı jasalǵanyn erekshe atap aıtty.
Májilis Bıýrosynyń kezekti otyrysy
Keshe Parlament Májilisiniń Tóraǵasy Oral Muhamedjanovtyń jetekshiligimen palata bıýrosynyń kezekti otyrysy ótti. Onda Májilistiń jalpy otyrysyna shyǵarylatyn máseleler saralandy.
Palatanyń Halyqaralyq ister, qorǵanys jáne qaýipsizdik komıteti depýtattardyń talqysyna bir top zań jobalaryn usyndy. Atap aıtqanda, «Patent quqyǵy týraly shartty ratıfıkasııalaý týraly», «Shanhaı yntymaqtastyq uıymyna múshe memleketterdiń terrorızmge qarsy quralymdary úshin kadrlar daıarlaý týraly kelisimdi ratıfıkasııalaý týraly», sondaı-aq «Qazaqstan Respýblıkasy men Italııa Respýblıkasy arasyndaǵy strategııalyq áriptestik týraly shartty ratıfıkasııalaý týraly» zań jobalary bar.
Bıýro otyrysynda 27-29 naýryz aralyǵynda Pavlodar oblysynda ındýstrııalyq saıasattyń ózekti máseleleri boıynsha Májilistiń Ekonomıkalyq reforma jáne óńirlik damý komıtetiniń kóshpeli otyrysyn ótkizý týraly qaýly qabyldandy.
Sonymen qatar, bıýro otyrysynda Úkimetten kelip túsken jańa zań jobalaryna qorytyndy ázirleý máseleleri qaraldy.
«Egemen-aqparat».