Etti mal ósirýdiń qamy

Aýyl sharýashylyǵyn jappaı jekeshelendirý jáne naryqtyq qa­ty­nastarǵa ótý kezeńindegi  aıyr­bas­tyń saldarynan soń  mal sany kúrt kemidi. Tórt túlik maldyń tu­qymdyq sapasy da nasharlap ketti. Alaıda,  «eshten kesh jaqsy» degendeı,  qazirgi ýaqytta iri qarany kóbeıtý, onyń tuqymyn asyldandy­ryp, ettiligin kóterýge baǵyt usta­lýda. «QazAgroО́nim» aksıonerlik qoǵamy «Sybaǵa» atty respýblıka­lyq baǵdarlama daıyndap, ony  iske asyrý osyndaı úlken jumystardyń bastamasy dese  bol­ǵandaı. Bıylǵy  Jol­daý­da «Agrarlyq sektorda etti mal sharýashylyǵyn damytý jó­ninde buryn-sońdy bolyp kór­megen joba júzege asyrylady. 2016 jyldyń ózinde et eksporty 60 myń tonnaǵa jetedi, munyń quny 4 mıllıon tonna bıdaı eksportyna teń» dep atap kórsetilgen bolatyn. Osy mindetti júzege asyrý úshin bes jyl ishinde elge 72 myń asyl tuqymdy iri qara ákelý kózdelýde. Bul jobany júzege asyrýǵa qazirdiń ózinde 130 mıllıard teńge bólindi. Osy máse­lelerdi odan ári tereńdetý maqsa­tynda ótkizilgen oblystyq keńeske óńirdegi aýyl sharýashylyǵy qury­lym­darynyń jetekshileri, aýdan ákimderi, mal sharýashylyǵyn da­my­týǵa qatysty salalardyń ókil­deri qatysty. Onda iri qara mal etiniń eksporttyq áleýetin damytý, mal satyp alýǵa nesıe berý tártibi keńinen tal­qylandy. Atalmysh mindetti júzege asyrý úshin oblysta 170 fermerlik sharýa­shylyq, tórt iri qara bordaqylaý alańy jáne tórt mal ósirip-kóbeı­týshi  sharýashylyq qurý kózdelýde. Ol úshin shetelden jáne elimizdiń asyl tuqymdy mal zaýyttarynan, osyndaı baǵyttaǵy sharýashylyq­tardan asyl tuqymdy atalyq, ana­lyq jáne jas maldar satyp alyna­dy. Bul oblysta iri qara mal etin ulǵaıtyp, rynokty sapaly ónimmen toltyrýǵa, iri qara etiniń eksport­tyq deńgeıin qalyptastyrýǵa alǵy­shart jasamaq. Bir sózben aıtqanda, aýyl sharýashylyǵy qurylymdary úshin nesıe alýda jańa arna ashylǵaly tur. Resmı baıandaýlarǵa súıensek, jyldyq 6 paıyzdyq ósimmen beriletin nesıe kepildigine endi jerdi, maldy, sondaı-aq tehnıkany, tu­ratyn jerindegi úıin salýǵa bo­lady. Mal ósirýshilerge on eki jylǵa deıin, bordaqylaý alańyn ashýshylarǵa  9,5 jylǵa deıin nesıe berilmekshi.  Mal satyp alǵysy keletin sharýalarǵa nesıe 7 jylǵa usynylady. Nesıelerdi óteý jeńil­dikteri de qaralǵan. Satybaldy SÁÝIRBAI. Aqtóbe oblysy.