Kókshetaý jámıǵatynyń tar meshitte ǵıbadat etip kele jatqanyna bir jarym ǵasyrdan asty. О́tken jyldan bastap osy bir túıtkildiń ornyn toltyrý maqsatynda jańa meshittiń orny belgilenip, qurylysy bastalyp ta ketken. Onyń irgetasyn Qazaqstan musylmandary dinı basqarmasynyń tóraǵasy, Bas múftı, sheıh Ábsattar qajy Derbisáli qalap, el-jurttyń namys otyn mazdatyp jibergen. Qazir Naýan Haziret atyndaǵy jańa meshittiń munaralary bıiktep qaldy.
Úmit kúter úmmet baryn berip jatyr. Áıtkenmen, qazirgi zamannyń qarqyny qarjyǵa baılanysty bolyp qalǵandyqtan, kidiris, kibirtikteý de oryn alǵanyn jasyrǵan jón emes. Osyndaıda jomarttyq tanytyp, jolymyzdy keńeıtip tastaıtyn azamattardyń boı kórsetýi ǵanıbet. Kókshetaý meshiti kókshelikterdiki ǵana emes, ámbeniń minájat orny ekendigin osyndaıda ańǵaryp, halyqtyq qasıetimizge táýbe etken de súıinishti. Olaı deıtinimiz, kúni keshe Qazaqstan Parlamenti Senaty men Májilisiniń depýtattary Serik Aıaǵanov, Natalıa Gellert, Amanjol Jazın, Svetlana Jalmaǵambetova, Jeksenbaı Dúısebaev, Ýálıhan Qońyrbaev, Egor Kappel, Valerıı Kotovıch jáne Baýyrjan Smaıylov birlesip, Alla úıiniń qurylysyna 1 mıllıon teńge qarjy aýdardy.
Halyq qalaýlylary ımandylyq jolyna uıǵarylǵan aqsha qarajatynyń túbirtegin «Kókshetaý» mádenıet saraıynda Muhammed (s.ǵ.s.) Paıǵambarymyzdyń týǵan aıy – Máýlit merekesi toılanǵan saltanatta jergilikti ımamǵa tabys etti. Jurtshylyq Parlament qabyrǵasynda elimizdiń ıgilik, múddesi úshin aıanbaı qyzmet etip júrgen depýtattarǵa «Alla razy bolsyn!» aıtýda. Paıǵambarymyzdyń hadısinde: «Kim maǵan bir ret salaýat aıtsa, Alla taǵala oǵan on ret rahmet joldaıdy, onyń on kúnási keshirilip, on dárejesi kóteriledi», delingen. Endeshe, bas kóterer azamattarymyzdyń bastamasy baıandy bolǵaı.
Baqbergen AMALBEK.
Aqmola oblysy.