Belarýs elshisin qabyldady

Keshe Parlament Senatynyń Tóraǵasy Qasym-Jo­mart Toqaev Belarýs Respýblıka­synyń Qazaq­stan­da­ǵy Tótenshe jáne ókiletti elshisi Valerıı Brylevti qa­byldady, dep habarlady Senattyń baspasóz qyzmeti. Ekijaqty qatynastardy odan ári nyǵaıtý máseleleri boıynsha pikir almasý barysynda taraptar Qazaqstan men Belarýstiń ózara is-qımyly qarqyndy damyp kele jatqanyn atap ótti jáne parlamentaralyq quramdaǵy baılanystardy odan ári belsendilendirýdi jaqtaıtyndaryn aıtty. Qazaqstan men Belarýs parlamentshileriniń ekijaqty jáne kópjaqty yntymaqtastyǵy tabysty bolǵanyn atap óte kelip, Tóraǵa respýblıka Keńe­siniń tóraǵasy A.Rýbınov pen О́kilder palatasynyń tóraǵasy V.Andreıchenkoǵa izgi tilektestigin jetkizdi. «Qazaqstan Belarýsti burynǵy keńestik keńis­tiktegi negizgi memleketterdiń biri retinde qaras­ty­rady», dedi Q.Toqaev jáne ol Keden odaǵy men Bir­yńǵaı ekonomıkalyq keńistik aıasyndaǵy ózara ekijaq­ty is-qımyldy damytýdyń keleshegi zor ekenin atap ótti. V.Brylev óz eli basshylarynyń izgi tilektestigin Q.Toqaevqa jetkize otyryp, ony BUU-daǵy joǵary laýazymǵa taǵaıyndalýymen quttyqtady. Dıplomat atap ótkendeı, Qazaqstan men Belarýs arasynda óristep kele jatqan ónimdi qatynastardy odan ári nyǵaıtýda parlamentaralyq baılanystardyń róli asa mańyzdy bolyp tabylady.