Bul kommýnıst burynǵydan ózgerek

Qazaqstannyń Kommýnıstik halyqtyq partııasynan tirkelgen kandıdat Jambyl Ahmetbekov óziniń saılaýaldy baǵdarlamasymen jurtshylyqty jete tanystyrý maqsatymen Jambyl oblysyna keldi. Halyqta «Kelgenshe qonaq uıalady, kelgen soń úı ıesi uıalady» degen sóz bar, sol aıtqandaı, Qazaqstannyń Kommýnıstik halyqtyq partııasynan tirkelgen kandıdat Jambyl Ahmetbekov óziniń senim bildirilgen adamy V.Sorokın jáne partııanyń oblystyq komıtetiniń birinshi hatshysy Á.Mamashevti ertip, artynyp-tartynyp kelip otyrǵan soń oblys ákimi Q.Bozymbaev kisilik pen kishilik tanytyp, úlken yqylaspen qabyldady. Qabyldaý barysynda olar eldegi jáne jergilikti jerdegi atqarylyp jatqan áleýmettik-ekonomıkalyq jaǵ­daı­lar týrasynda óńir basshysymen jarasymdy áńgime qozǵap, keıbir ózekti máselelerdi de sóz etti. Budan keıin úmitker Taraz qalasyndaǵy Q.Sary­mol­daev atyndaǵy №1 balalar úıine baryp, jetim jáne ata-ana qam­qor­lyǵynsyz qalǵan búldirshinder men jasóspirimder­diń áleýmettik qu­qy­ǵyn qorǵaýdaǵy atqarylyp jatqan jumystarmen ta­nysty. Búginde munda jetim jáne ata-anasynyń qamqor­ly­ǵyn­syz qalǵan 170-ke jýyq bala tár­bıelenýde. Al balalar úıindegi jumys jaqsy jolǵa qoıylǵan. Mysaly, 2001-2009 jyldar aralyǵynda 28 tárbıe­le­ný­shiniń jeke shotyndaǵy jınalǵan aqshasyna páterler satylyp alynyp­ty. Múlikterdi jarııalaý arqyly 5 tur­ǵyn úı zańdastyrylǵan. 5 balaǵa ata-anasynan, ájesinen muragerlik ashy­lypty. Aıta bersek, elimizdiń bas­qa óńirine úlgi bolarlyq mundaı ıgi ister óte kóp. Mine, osynyń bárimen prezıdenttikke kandıdat J. Ahmetbekov jete tanysyp, óziniń de kóp balaly ot­basynda dúnıege kelip, qaısarlyqtyń arqasynda qajymaı ósip-jetilgenin tilge tıek etti. Sondyqtan aldaǵy bo­latyn prezıdenttik saılaýda jeńiske jete qalǵan jaǵdaıda eń aldymen balalar úılerine, ondaǵy jetim balalar men ata-anasynyń qamqorlyǵynsyz qalǵan balalarǵa jáne olardyń ata-anasy ispetti bolyp ketken tárbıe­shi­lerine jaǵdaı jasaıtynyn qadaı jetkizdi. Qoǵamdaǵy saıası ahýal týraly da óz kózqarasyn bildirip, azyq-túlik baǵasynyń kóterilýine, aılyq jal­aqy­ǵa jáne dinı aǵymdar jónindegi saýaldarǵa jaýap berdi. El prezıdenttiginen úmitker budan keıin oblys ortalyǵyndaǵy Jambyl polı­teh­­nıkalyq kolledjinde, Taraz qala­syn­da­ǵy  qa­lalyq mádenıet úıinde kezdesýler ótkizdi. Kósemáli SÁTTIBAIULY. Jambyl oblysy.