El prezıdenttiginen úmitker Ǵanı Qasymov Patrıottar partııasynyń saılaýaldy shtabynda Fransııanyń Qazaqstandaǵy elshisi Bertone Jan Sharl jáne Almatydaǵy bas konsýl Narjole Gııom myrzalarmen kezdesip, saılaý aldyndaǵy ahýal jáne jalpy saıası murattar jóninde pikir almasyp, oı sabaqtady.
Fransýz elshisi prezıdenttikten úmitkerdiń saıası tuǵyrnamasynyń birqatar jaǵymdy erekshelikterine toqtalyp, ondaǵy máselelerdiń qoıylysy, atom energetıkasynyń problemalaryna kóńil bólinýi, bılik tarmaqtaryn demokratııalandyrý baǵyty ózine unaıtyndyǵyn málim etti. Naq osy rette óziniń saıası murat-múddesi Fransııa prezıdenti N.Sarkozımen sabaqtastyǵyn Ǵ.Qasymov ta teriske shyǵarmady.
Onyń aıtýynsha, kóptegen ǵasyrlyq demokratııalyq tarıhy bar Fransııanyń keıbir statıstıkalyq málimetteri óziniń saıası tuǵyrnamasyn ázirleý kezinde oı salǵan eken. Aıtalyq, halqy bizden áldeneshe kóp eldiń sottalǵandar sany Qazaqstanmen salystyrǵanda múldem az. Bizdegi bostandyqtan qol úzip, túrmede otyrǵandar sany áldeqaıda kóbirek. Buǵan olardy kúzetetinderdi qosqanda 200 myń adam masyl bolyp memlekettik bıýdjettiń moınynda otyr. Bul – óte tıimsiz. Olaı bolsa, jazany óteýdiń balamaly túrlerin oılastyrý, qylmystyq kodeksti izgilendirý máselelerin Ǵ.Qasymov óziniń saılaý aldyndaǵy naýqanynda bekerden beker kóterip otyrmaǵandyǵy aıǵaqtalady.
Budan ári Bertone Jan Sharl myrza saılaýǵa baılanysty suraqtar qoıdy. Soǵan oraı Ǵ.Qasymov búkilhalyqtyq referendýmnyń ornyna nelikten merziminen buryn prezıdenttik saılaý ótkizilip otyrǵandyǵynyń jaı-japsaryn egjeı-tegjeıli túsindirip berdi. Bul saılaýdyń, ásirese, bılik tarmaqtary arasyndaǵy daǵdarysty boldyrmaý úshin ótkizilip otyrǵandyǵyna jáne qazirgi qalyptasqan jaǵdaıda Memleket basshysy tarapynan birden-bir durys sheshim bolǵandyǵyna nazar aýdardy. Sóz arasynda Ǵanı Esengeldiulynyń Batys elderiniń osy rettegi tájirıbesinen mysaldar keltirgen bilimdarlyǵyn, saıası turǵydan ysylǵan qaıratker ekendigin de baıqap qalǵandaı boldyq.
Budan soń Elshi suraǵyna jaýap oraıynda prezıdenttikten úmitker oppozısııalyq partııalardyń saılaýǵa qatysýdan bas tartýy nemese oǵan boıkot jarııalaýy týraly óz paıymyn bildirdi. Ǵ.Qasymovtyń oıynsha, munyń ózi olardyń syrtqy ustanymynan góri, ishki qaıshylyǵyn tanytady. Oppozısııalyq partııalardyń boıkot jarııalaýy 3 sáýir kúni ótetin saılaýǵa qandaı da bir eleýli áserin tıgize almaıdy. Sóıtip, ol qalaı bolǵanda da bul saılaýǵa barlyq saılaýshylardyń 80 paıyzyna deıin qatysatyndyǵyna óz basynyń senimdiligin pash etti.
Qorǵanbek AMANJOL.
Almaty.