Baǵany kóp bolyp quryqtaıdy

Baǵa Qostanaıda da kóterilip tur. Ja­qynda oblys ákimi Sergeı Kýlagın ob­lys­taǵy aýylsharýashylyq taýar óndirý­shi­lerimen, uqsatý kásiporynda­rynyń bas­shylarymen, qalalardaǵy saýda oryn­da­rynyń, bazarlar men sýpermarket ıelerimen jáne azyq-túlik túrlerin kóter­me tasymaldaýshylarmen kezdesý  ótkizdi. Árıne, áńgime qazyǵy oblys óńirinde óndiriletin jáne syrttan ákelinetin áleýmettik mańyzdy taýarlarǵa baǵany turaqtandyrý máselesine baılandy. Kedesýde oblys basshysy aımaq eko­no­mıkasyn jáne áleýmettik salany da­my­týdaǵy bıznestiń  qosqan úlesine laıyqty baǵa berdi. О́ńirdegi qoǵamdyq-saıası jaǵdaıdyń turaqtylyǵyn, halyq­tyń ál-aýqatyn jaqsartý jolynda kásip­kerlermen birlese, túsinistikpen jumys­tar atqaryl­ǵan­dyǵyn da atap ótti. Jal­py, bıznesti damytý úshin kásipkerlerge memleket tara­pynan jasalyp otyrǵan qoldaý, jeńil­dikter de aýyz toltyryp aıtarlyqtaı. Oblys ákiminiń orynbasary N.Sádýa­qasov kezdesýge qatysýshylardy  aýyl­sharýa­shylyq jylynyń qorytyndyla­rymen tanystyryp ótti jáne óńirdegi azyq-túlik taýarlary baǵasyna taldaý jasady. Oblysta baǵanyń bojysyn bosatpaý úshin az jumys atqarylǵan joq. Turaqtandyrý qorynyń arqasynda tek bıyl ǵana emes, birneshe jyldan beri nan men nan ónimderine baǵa birqalypty deńgeıden ózgergen emes. Bıyl da oblys qalalary men aýyldardaǵy kez kelgen dúkenderde nannyń baǵasy kóterilgen joq. Qymbatshylyq salqynyn bildirmeý maq­satynda  áleýmettik dúkender men saý­da núkteleri jetkilikti mólsherde ashyl­dy. Sonymen qatar respýblıkanyń ózge ob­lystary men jaqyn shet elderden kók­ónis jetkizý ortalyqtandyryldy, qoǵam­dyq mal men aýyl-selodaǵy jeke qoja­lyq­t­ar úshin jemge  sýbsıdııa berildi. Res­pýblıka­lyq bıýdjet esebinen  oblys­ta  tórt júz­den asa sharýashylyq qar­jylaı kómek aldy. Oblys basshylyǵy ústimizdegi jyly aımaqta azyq-túlik molshylyǵyn jasaý úshin birqatar jumystar josparyn jasap otyr.  Sút jáne et baǵytyndaǵy mal jáne qus sharýashylyǵy baǵdarlamasy júzege asýda. Aldymyzdaǵy kóktemgi dala jumystary kezinde kartoptyń jáne kókónis alqaptary keńeıtiletin bolady.  Kókónisti sapaly saqtaý maqsatynda qoı­malar jasaqtalady jáne osy baǵytta bir­neshe qurylys nysandary da jospar­lanyp otyr. Kezdesýde oblys ákimi baǵany turaq­tandyrýda  ózderiniń qarjylyq-eko­nomıkalyq jaǵdaıy máz emestigine qa­ramastan burynǵy qalyp­tasyp qalǵan dástúrmen aýdandardaǵy aýylsharýa­shy­lyq taýarlaryn óndirý­shiler úlken jaýapkershilikti arqalap júrgenin aıtty. Sondyqtan oblys bas­shysy bar júkti óndirýshilerge arta bermeı, uq­satý kásiporyndaryn da azyq-túlik ba­ǵasyn quryqtaýǵa jaýapkershilikpen at­salysýǵa shaqyrdy. Ol jaýapty  adam­darǵa  ettiń satyp alý já­ne satylý ba­ǵasyn qadaǵalaýdy tap­syr­dy. О́ıtkeni, baǵany kóbine ortadaǵy  alypsatarlar aspandatyp jiberedi. Mysaly, Qosta­naı aýdanynda selo tur­ǵyndarynan kı­lo­syn 350 teńgeden satyp alǵan shoshqa eti Qostanaı qala­syndaǵy or­talyq bazarǵa kelgenshe 600-700 teńgege ósedi. Basqa et túrleri men ótken jyly qurǵaqshylyq bolýyna baı­lanysty tap­shylyq tanytyp otyr­ǵan kartop baǵasy da osylaı qubylady. Kezdesý sońynda áleýmettik mańyz­dy azyq-túlik taýarlaryna baǵany tu­raq­tandyrý maqsatynda  oblystaǵy «Ivolga-Holdıng», «Araı Holdıng», «Mılh» jaýapkershiligi shekteýli seriktestikteri, «Qarasý–Et» saýda-óndiris­tik kompanııasy, taǵy basqa da iri uqsatý kásiporyndarymen, saýda oryndarymen ekijaqty memorandýmǵa qol qoıyldy. Názıra JÁRIMBETOVA, Qostanaı.