Kóktemgi egiske daıyndyq qazirgi kezde Shyǵys Qazaqstan oblysyndaǵy Úrjar aýdanynda barynsha qyzý qarqynmen júrip jatyr. Aýdandaǵy 5 myńǵa jýyq sharýa qojalyqtary qoldaryndaǵy bar tehnıkasyn retke keltirip, tuqymdaryn suryptap, janar-jaǵarmaılaryn daıyndap, atalǵan naýqanǵa daıyn otyr dese de bolady.
Bıylǵy jyly aýdanda 138 myń 329 gektar alqapqa egin egilmek. Onyń 2295 gektaryn kókónis pen jemis-jıdek, 925 gektaryn baqsha daqyldary, 869 gektaryn kópjyldyq shóp egistigi quramaq.
Kóktemgi dala jumystaryna 5452 tonna dándi-daqyl tuqymdary ázirlengen. Onyń 4654 tonnasy nemese 85 paıyzy naýryz aıynyń birinshi onkúndiginde zerthanalyq tekserýden ótkizildi.
Traktorlardyń 70 paıyzy, tirkemelerdiń 80 paıyzy ázirlik sapyna qoıyldy.
Aýdandaǵy sharýashylyqtardyń birqatary lızıng arqyly jańa tehnıkalarǵa ıe boldy. Máselen, «Birlik» sharýa qojalyǵy quny 16,8 mıllıon teńge turatyn «Esil» kombaınyn, árqaısysy 5,6 mıllıon turatyn 2 MTZ-82 traktoryn satyp alsa, «Bıbi» sharýa qojalyǵy osyndaı eki traktor men 700 myń teńgelik 1 KDP máshınesin menshiktep úlgerdi. Al «Qaırat» sharýa qojalyǵy baǵasy 11,5 mıllıon teńgege «Enıseı» kombaınyn satyp aldy. Jalpy, mundaı mysaldardy kóptep keltire berýge bolady.
Aýdan aýmaǵyna byltyrǵy jyly qar tym qalyń túsken edi. Oǵan qaraǵanda bıylǵy qar juqalaý bolyp otyr. Sondyqtan egistiktiń ylǵaldylyǵyn arttyrý maqsatynda kóptegen sharýashylyqtar qar toqtatý jumysymen shuǵyldandy.
Sóıtip, aýdan dıqandary aldymyzdaǵy kóktemgi egiske úlken ázirlikpen kelip otyr. Al jaqsy ázirlik – mol ónim kepili. Iske sát deımiz, endeshe!
Bısenǵazy ULYQBEK, jýrnalıst.
Shyǵys Qazaqstan oblysy,
Úrjar aýdany.