Bolashaqtyń irgesin birge qalaımyz!

Qazaqstan Respýblıkasynyń Prezıdenttigine kandıdat N.Á.Nazarbaevtyń saılaýaldy baǵdarlamasy QURMETTI QAZAQSTANDYQTAR! QADIRLI OTANDASTAR! Biz budan 20 jyl buryn alǵashqy ári eń mańyzdy tańdaýymyzdy jasadyq. Biz ata-babamyzdyń san ǵasyrlyq armanyn iske asyrdyq. Biz elimizdiń Táýelsizdigin jarııaladyq. Biz múldem jańa memleket qurdyq. О́mir osy jyldar ishinde aldymyzǵa asa kúrdeli mindetter qoıdy. Halqymyzdyń danalyǵy árkez bizdiń ortaq shańyraǵymyzda tatýlyq pen kelisimge, batyl da tabandy reformalarǵa bastaıtyn, ár azamattyń ıgiligi úshin durys tańdaý jasaýǵa demeý boldy. Qazaqstan halqynyń maǵan jıyrma jyl boıy bildirgen osynaý aınymas senimi úshin keýdemdi zor maqtanysh sezimi kerneıdi. Bul – bizdiń ortaq jetistikterimizge berilgen bıik baǵa. Álemde damyǵan memleket qurýdyń ámbebap zańdary joq. Ár eldiń órleý men ósip-órkendeýge bastar joly – biregeı ári qaıtalan­bas jol. Qazaqstan halqymyzdyń ozyq dástúrleri men álemdik ozyq tájirıbeni jınaqtaǵan tabystyń ózindik tól formýlasyn tapty. BIZDIŃ  JETISTIKTERIMIZ QOǴAMDAǴY  TATÝLYQ  PEN  KELISIM Bul – ótken jetistikterimizdiń berik negizi, bolashaqtaǵy barsha josparymyzdy iske asyrýdyń kepili. Elimiz saıası daǵdarystar daýylynda, azamattyq daý-sharlar ıiriminde, álemdik silkinister muhıtynda naǵyz turaqtylyq aralyna aınaldy. Qazaqstanda 140 etnostyń ókili tatýlyq pen kelisimde ómir súrip, bizdiń ortaq Otanymyzdyń taǵdyryna birdeı jaýapty bolyp otyr. Biz jańa elordany turǵyzdyq. Astana memlekettiliktiń berik irgetasyna aınaldy. HALYQTYŃ ÁL-AÝQATYNYŃ О́SÝI Elimiz 2010 jyldyń qorytyndysy boıynsha halyqtyń ál-aýqaty jaǵynan TMD-nyń barlyq elderinen basyp ozyp, halyqaralyq reıtıngte 50-orynǵa ıe boldy. 1994 jyldan beri aı saıynǵy nomınaldyq jalaqy 45 ese ósti. Biz bıýdjet salasy qyzmetkerleriniń eńbekaqysyn dáıekti ósi­rip otyrdyq. Sońǵy onjyldyqta muǵalimderdiń jalaqysy – 5 ese der­lik, dárigerlerdiki – 7 ese, zeınetaqynyń ortasha mólsheri 6 ese derlik ósti. Meniń tapsyrmam boıynsha 2011 jylǵy 1 qańtardan bastap zeı­net­aqy men járdemaqy mólsheri 30%-ǵa ósti. Sondaı-aq 1 shildeden bas­tap bıýdjet salasy qyzmetkerleriniń jalaqysy da 30%-ǵa arta­dy, nátıjesinde sońǵy úsh jylda olardyń tabysy eki esege ulǵaıady. Qazaqstandaǵydaı zeınetaqymen qamsyzdandyrý júıesi TMD-nyń eshbir elinde joq. Álemniń keıbir damyǵan elderiniń ózi, máselen, Germanııa nemese Fransııa jınaqtaýshy zeınetaqy júıesine ótý máselesin endi qolǵa alýda. Bizde 13 zeınetaqy qory jumys isteıdi. Olarda 2,3 trıllıon teńge jınaqtalǵan. 10 jylda eń tómengi kúnkóris deńgeıinen az tabys tabatyn turǵyndardyń úlesi 4 eseden astam qysqardy. 800 myńǵa jýyq otandastarymyz Otanyna oralyp, «Nurly kósh» baǵdarlamasynyń sheńberinde qonystaný kómegin alýda. Sońǵy jyldary iske asyrylǵan turǵyn úı qurylysy baǵdarlama­synyń arqasynda mıllıonnan astam qazaqstandyq jańa páterler men úılerge qonystandy. Mıllıondaǵan qarapaıym adamdardyń kúndelikti máselelerin sheshý, qazaqstandyqtardyń ómir súrý sapasyn jaqsartý – biz, mine, naq osy istermen aınalystyq jáne bel sheshpeı aınalysyp kelemiz. BILIM MEN MEDISINADAǴY PROGRESS О́tken onjyldyqta bilim men densaýlyq saqtaýǵa jumsalǵan qarjy 10 esege jýyq ósti. Osy kezeńde 750-ge jýyq jańa mektep salyndy, 5300-den astam mektepke deıingi mekemeler men balabaqshalar ashyldy. «Bolashaq» baǵdarlamasy aıasynda álemniń tańdaýly ýnıversıtetterinde 3,5 myńnan astam qazaqstandyq bilim aldy, qazirgi ýaqytta 3 myńdaı qazaqstandyq oqyp jatyr. IýNESKO-nyń derekteri boıynsha, bizdiń elimiz bilim berýdi damytý ındeksi boıynsha kóshbasshy elderdiń alǵashqy tórttiginen berik oryn alyp otyr. Qazaqstandyqtardyń óz elinde de, shet elderde de ozyq bilim alýǵa múmkindikteri bar. On jylda biz 450-ge jýyq densaýlyq saqtaý obektilerin saldyq. Eldiń barlyq óńirlerinde zamanaýı medısınalyq ortalyqtar qurylýda, eń jańa qural-jabdyqtarmen jaraqtalǵan aýrýhanalar men emhanalar ashylyp jatyr. Nátıjesinde Qazaqstanda demografııalyq ahýal jaqsaryp, halyqtyń tabıǵı ósimi 1,7 esege derlik artty. EÝRAZIIа KEŃISTIGINDEGI OZYQ EKONOMIKA 1993 jyldan beri Qazaqstannyń jalpy ishki óniminiń (JIО́) kólemi 12 esege derlik ósti. Bizdiń ekonomıkamyz jahandyq qarjy daǵdary­sy­nyń qıyndyqtaryn tabandy túrde eńserdi. Jalpy ishki ónimniń kólemi 2011 jyldyń 1 qańtarynda jan basyna shaqqanda 9 myń dol­lardan asty. Áýel basta bizde altyn-valıýta qory bolǵan joq. Qazir Qazaqstan halyqaralyq rezervter deńgeıi boıynsha 50 memlekettiń qataryna enip otyr. Ol Ulttyq qordy qosqanda 63 mıllıard derlik dollarǵa jetip otyr. Dúnıejúzilik banktiń Baıandamasynda 2010 jyly Qazaqstan reformalar júrgizý jaǵynan kóshbasshy memleket dep tanyldy. 90-jyldardyń basynda bizde az ǵana kooperatıvter men jeke kásipkerler bolǵan edi. Búginde shaǵyn jáne orta bızneste 700 myńdaı sharýashylyq júrgizýshi sýbektiler bar. Olarda 2,5 mıllıonnan astam adam jumys isteıdi. Elimizdiń jalpy ishki ónimindegi olardyń úlesi 30%-dan artyq. 2010 jyldyń qorytyndysy boıynsha elimizde ónerkásip óndirisiniń kólemi 10%-dan astam ósti. Údemeli ındýstrııalyq-ınnovasııalyq damýdyń memlekettik baǵ­dar­la­masy aıasynda jalpy quny 800 mıllıard teńgeden asatyn 152 jańa obekt iske qosyldy. «Bıznestiń jol kartasy – 2020» kásipkerlikti damytý baǵdarlama­sy aıasynda jalpy somasy 100 mıllıard teńgeden asatyn 225 kredıt berildi, 129 bıznes sýbektisi úshin qajetti ınfraqurylym júrgizildi. On bes jylda qazaqstandyq eksport kólemi 11 eseden astam ósti, ol 1995 jylǵy 5,3 mıllıard dollardan – 2010 jyly 60 mıllıard AQSh dollaryna jetti. Qazaqstan undy eksporttaýdan álemde birinshi orynǵa shyǵyp, bıdaıdy eksporttaý boıynsha 7-oryndy ıelendi. Qazaqstan álemdik ekonomıkanyń tolyqqandy ári qurmetti qatysýshysyna aınaldy. 19 jylda bizdiń ekonomıkamyzǵa 122 mıllıard AQSh dollaryna jýyq sheteldik ınvestısııa tartyldy. Barynsha qolaıly bıznes-ahýal kórsetkishi jaǵynan bizdiń elimiz álemde 59-orynda tur. Biz óńirlik ıntegrasııada sapaly serpiliske qol jetkizdik. Qazaqstanmen qatar Reseı men Belarýs enetin Keden odaǵy quryl­dy. Biz úshin 170 mıllıonnan astam halqy jáne úsh eldiń 1,7 trıllıon dollar kólemindegi jıyntyq jalpy ishki ónimi bar rynok ashyldy. ÁLEMDIK QOǴAMDASTYQTYŃ TANÝY Osydan jıyrma jyl buryn bizdiń elimizdiń qaı jerde ekenin naqty biletin jandar álemde kemde-kem edi. Búginde Qazaqstan búkil Ortalyq Azııanyń lokomotıvi, saıası, ekonomıkalyq ortalyǵy, dúnıe júzine belgili ári qurmetti memleket. 2010 jyl qazaqstandyq syrtqy saıasat úshin juldyzdy jyl boldy. Biz TMD jáne Baltyq óńiri elderiniń arasynda birinshi bolyp EQYU-ǵa tóraǵa boldyq. Astanada 11 jyl úzilisten keıin osy uıymǵa qatysýshy memleketter basshylarynyń Sammıti ótti. Sóıtip, 2005 jylǵy baǵdarlamada ózim alǵa qoıǵan mindetterdiń bári merziminen buryn oryndaldy! Bes jylda biz jeti jyldyq jospardy oryndadyq. О́tken jyldar qorytyndylary táýelsizdigimizdiń tańy atyp kele jatqanda qabyldaǵan bizdiń qazaqstandyq damý modeliniń durysty­ǵy­na senimimizdi nyǵaıtty. Bizdiń barlyq jetistikterimiz jańa bıikterdi baǵyndyrýǵa yntalandyrady, sondyqtan biz erteńgi kúnge senimmen qaraımyz. QYMBATTY QAZAQSTANDYQTAR! 3 sáýirde barshamyz taǵy da bir mańyzdy tańdaý jasaǵaly otyrmyz. Bul kúni elimizdiń Prezıdentiniń kezekten tys saılaýy ótetinin Sizder bilesizder. Aldaǵy damý jolymyzdy meniń qalaı aıqyndaǵanym sizderdiń barshańyzǵa jaqsy belgili. Ol «Qazaqstan – 2030» Strategııasynda, elimizdiń 2020 jylǵa deıingi damýynyń Strategııalyq josparynda jáne meniń Qazaqstan halqyna taıaýdaǵy Joldaýymda baıandalǵan. Meniń saılaýaldy baǵdarlamam da, bolashaqqa degen josparym da, mine, osylar. Men eshqashan qurǵaq qııalǵa berilgen emespin jáne qolymnan  kelmeıtin isti tyndyram dep ýáde bergen joqpyn. Bul ózderińizge málim. Qazir de bizdiń josparlaǵanymyzdyń bári naqty jáne júzege asyrylatyn  maqsattar. Meniń muratym – elimizdiń árbir azamaty bizdiń ortaq eńbegimizdiń jemisin sezinýi tıis. Jalpy ishki ónimniń, óndiris kóleminiń joǵary kórsetkishteri – bar bolǵany jeke adam men tutas qoǵamnyń múddelerin qamtamasyz etýge baǵyttalǵan tetikter ǵana. Men eldiń ósip-órkendeýi onyń azamattarynyń tabysy men ál-aýqatynan quralatyndyǵyna senimdimin. Joǵary tabys, kásibı bilim, myqty densaýlyq, jaıly turǵyn úı jaǵdaılary, jasampaz eńbek pen qaýipsizdik – elimizdiń barsha azamattary úshin biz quryp jatqan jańa qoǵamnyń negizi bolmaq, biz iske asyrýǵa kirisken jańa áleýmettik saıasattyń máni mine osyndaı. ALDAǴY JYLDARǴA ARNALǴAN BIZDIŃ BASYMDYQTARYMYZ QAZAQSTANDYQTARDYŃ JOǴARY О́MIR SÚRÝ DEŃGEII Biz jumyssyzdyqtyń deńgeıin 5%-ǵa deıin tómendetemiz. Údemeli ındýstrııalyq-ınnovasııalyq damý baǵdarlamasyn iske asyrý aıasynda taıaýdaǵy eki jyl ishinde 8,1 trıllıon teńge somasynda 294 ınvestısııalyq jobany iske asyrý josparlanýda. Nátıjesinde, 161 myń turaqty jumys orny jáne qurylys júrgizý kezeńinde 207 myń qo­symsha jumys orny ashylatyn bolady. Biz qazaqstandyqtardy kásibı qaı­ta daıarlaýdyń jáne jumysqa ornalastyrýdyń aýqymdy baǵdar­la­masyn iske asyramyz. Memleket aqysyz oqýdy, qazaqstandyqtarǵa oqıtyn oryndaryna deıin jolaqysyn jáne stıpendııa tóleýdi qar­jylandyratyn bolady. Biz aýylsharýashylyq kásipkerligin damytyp, óziniń jeke shaǵyn bıznesin uıymdastyrýǵa baǵyttalǵan mıkrokredıtteý baǵdarlamasyn júzege asyramyz. Biz zeınetaqynyń ádiletti deńgeıin qamtamasyz etemiz. Bazalyq zeınetaqy tóleýdiń mólsheri 2015 jyldyń ózinde eń tómen kúnkóris deńgeıi kóleminiń 60%-y deńgeıine jetkiziletin bolady. 2020 jylǵa jaldamaly qyzmetkerlerdiń 100%-y jáne ózin ózi eńbekpen qamtıtyn halyqtyń 40%-y jınaqtaýshy zeınetaqy júıesimen qamtylatyn bolady. Biz halyqtyń áleýmettik álsiz toptaryna qoldaý kórsetýdi qamtamasyz etemiz. 2015 jylǵa qaraı memlekettik áleýmettik járdemaqylardyń mólsheri kem degende 20%-ǵa arttyrylatyn bolady. 2020 jylǵa qaraı áleýmettik kómek kórsetýdiń bastapqy deńgeıi eń tómen kúnkóris deńgeıi kóleminiń 100%-yna deıin jetedi. Biz «Halyqtyq IRO» baǵdarlamasyn iske asyramyz. Qarapaıym qazaqstandyqtar ulttyq kompanııalar men iri kásip­oryndardyń aksııalaryn ıelený múmkindigin alady. Bul uzaq merzimdi ınvestısııalaýdyń jáne azamattardyń qarjylaı salymdaryn kóbeıtýdiń jańa tetigine aınalady. Azamattardyń ál-aýqatyn arttyrý – bizdiń basym baǵyt! ÁRBIR QAZAQSTANDYQTYŃ TOLYQQANDY DAMÝY Biz bilim berý salasyna jumsalatyn qarjy kólemin 2016 jylǵa qaraı ishki jalpy ónimniń 5%-yna deıin kóteremiz. Bilim alýdyń sapasyn arttyrý men oǵan qoljetimdilikti keńeıtý úshin jańa qar­jylyq-ekonomıkalyq tetikter, onyń ishinde, memleketten paıyz­dyq bonýstar alý arqyly balalardy oqytýǵa arnalǵan jınaqtaý júıesi engiziletin bolady. Biz taıaýdaǵy on jyl ishinde barlyq balǵyn qazaqstandyqtar­dy mektepke deıingi tárbıemen jáne oqytýmen qamtımyz. Buǵan biz mek­tepke deıingi tárbıe berý júıesin damytý arqyly qol jetkizemiz. Memlekettik, jekemenshik, otbasylyq jáne vedomstvolyq bala­baq­shalardyń, túrli shaǵyn ortalyqtardyń órkendeýine jaǵdaı jasalady. Biz mekteptegi sapaly bilimge qoljetimdilikti qamtamasyz etemiz. Taıaýdaǵy bes jyl ishinde búkil el boıynsha 400 jańa mektep, onyń ishinde 20 «Nazarbaev zııatkerlik mektepteri» salynyp, shaǵyn keshendi mektepterdi damytý strategııasy iske asyrylatyn bolady. Biz qazirgi zamanǵy eńbek naryǵy talaptaryna sáıkes keletin tehnıkalyq jáne kásibı bilim berýdiń tıimdi júıesin qalyptas­ty­ra­myz. Bilikti, otandyq kadrlardy daıarlaý eldi ındýstrııalandyrý josparlarymen baılanystyrylatyn bolady. Biz joǵary bilim berýdiń deńgeıin álemdik standarttarǵa jetkizemiz. Bizdiń túlekterimiz otandyq ta, sheteldik te  jumys berý­shilerdiń suranysyna ıe bolady. Ýnıversıtetterdiń 65%-y halyq­ara­lyq standarttar boıynsha táýelsiz akkredıtteýden ótedi. 10 jyldan keıin olar­dyń ekeýi eń úzdik álemdik ýnıversıtetter qataryna enedi. 2016 jyldyń ózinde «Nazarbaev Ýnıversıtetiniń» alǵashqy túlekteri óz dıplomdaryn alyp, ózderiniń ozyq bilimderin naqty iske asyra bastaıdy. Biz ómir boıyna tıimdi oqý júıesin qalyptastyramyz. Qazaq­stan­nyń árbir azamaty jasyna qaramastan alystan oqytý jáne qysqa merzimdi kýrstar arqyly jańa bilim jáne kásibı mamandyq ala alady. Biz memlekettik tildi úıretýdiń ozyq júıesin quramyz. 10 jyldan soń Qazaqstan azamattarynyń basym kópshiligi – kem degende 95%-y qazaq tilin meńgeretin bolady. Qazaqstandyqtardyń 90%-y orys tilin, 20%-y aǵylshyn tilin meńgeretin bolady. Biz muǵalimniń mártebesin kóteremiz. 2015 jylǵa qaraı pedagogtardyń ortasha jalaqysy ekonomıkanyń jeke sektoryndaǵy jalaqyǵa jaqyndaıdy. Olardyń 20%-y bilimin jetildirip, onyń ishinde álemdik bilim berý ortalyqtarynda biliktilik arttyrýdan óte alady. Bizdiń maqsatymyz – bilikti kásipqoılardyń jańa urpaǵyn daıarlaý. QAZAQSTANDYQTARDYŃ DENSAÝLYǴY Biz medısınalyq qyzmet kórsetýdiń qoljetimdiligi men sapasyn arttyramyz. 2015 jylǵa qaraı 350 dárigerlik ambýlatorııa, feldsherlik-akýsherlik pýnktter jáne emhanalar salynatyn bolady. 2013 jylǵa qaraı Biryńǵaı ulttyq densaýlyq saqtaý júıesi qurylyp, ol alǵashqy medısınalyq-sanıtarlyq kómektiń sapasyn arttyratyn bolady. 2014 jyly elimizde tutynylatyn dári-dármek zattarynyń teń jartysyn otandyq kásiporyndar óndiretin bolady. Biz qazaqstandyqtardyń ortasha ómir súrý kórsetkishin 2020 jylǵa qaraı 72 jasqa jetkizbekpiz. Ana ólimi, nárestelerdiń shetineýi 2 esege tómendeıdi. Jalpy ólim 30%-ǵa tómendeıdi. Qazaqstan halqynyń sany 18 mıllıon adamǵa jaqyndaıdy. Biz medısına salasy qyzmetkerleriniń mártebesin artty­ramyz, olar óz eńbegine laıyqty jalaqy alatyn bolady. Medısına salasynda jumys isteý mártebeli bolyp sanalady. Qazaqstandyqtardyń densaýlyǵy – bizdiń basty baılyǵymyz! QAZAQSTANDYQTAR О́MIRINIŃ QOLAILY JAǴDAIY Biz halyqty sapaly da qoljetimdi turǵyn úımen qamtamasyz etý jó­nindegi jumysty jalǵastyramyz. Kredıttik jáne jalǵa beretin tur­ǵyn úı baǵdarlamalary júzege asyrylyp, turǵyn úı qurylysy jınaqtaý júıesi damıtyn bolady. Jalpy, biz turǵyn úı quryly­sy­nyń qarqynyn jyl saıyn 6 mıllıon sharshy metr deńgeıinde saq­taý­dy kózdep otyrmyz. Biz turǵyn úı-kommýnaldyq qyzmetiniń qoljetimdiligi men sapa­syn arttyramyz. 2020 jylǵa qaraı aýyldyq eldi mekenderdiń 80%-y jáne shaǵyn qalalardyń 100%-y ortalyqtandyrylǵan sýmen qamtýǵa qol jetkizedi. Biz telekommýnıkasııalyq jáne elektrondyq qyzmetterdiń keń taralýyn qamtamasyz etemiz. 2015 jyldyń ózinde respýblıka telekommýnıkasııa júıelerin 100 paıyzǵa sıfrlandyrý qamtamasyz etiledi. Barlyq úıdi Internet júıesine, sapaly kóp baǵdarlamaly televıdenıege, sondaı-aq mýltımedııalyq qyzmetterdiń keń spektrine qosylýyna tehnıkalyq múmkindikter qamtamasyz etiledi. Qazaqstandyqtar ómiriniń sapasy – memlekettiń asa mańyzdy qamqorlyǵynda! EKONOMIKANYŃ О́SÝI Biz Qazaqstan ekonomıkasynyń turaqty ósýin qamtamasyz etemiz. Oǵan Údemeli ındýstrııalyq-ınnovasııalyq damý memlekettik baǵdarlamasynyń oryndalýy járdemdesýi tıis. Biz daǵdarystan keıingi qalpyna keltirý baǵdarlamasyn ázirlep, ony júzege asyrýǵa kirisemiz, sondaı-aq «Bıznestiń jol kartasy - 2020» baǵdarlamasyn iske asyrýdy jalǵastyramyz. 2020 jylǵa qaraı ishki jalpy ónimniń ósýi qazirgi deńgeımen salystyrǵanda 30%-dan kem bolmaýy kerek. Ulttyq qordyń aktıvteri jalpy ishki ónimniń kem degende 30%-yn quraıtyn bolady. Qaıta óńdeý salalaryndaǵy ósim óndirýshi salalardyń deńgeıinen asyp túsedi nemese solardyń deńgeıine jetedi. Memleket shaǵyn jáne orta bıznesti belsendi qoldaıtyn bolady. Jalpy ishki ónimdegi shaǵyn jáne orta bıznestiń úlesi 40%-dy quraıdy. Biz Qazaqstandy Eýrazııanyń iri kólik torabyna aınaldyra­myz. 10 jyl ishinde 1400 kılometrge jýyq temir jol jelisi, 16000 kılometrge jýyq respýblıkalyq mańyzy bar avtomobıl joly tóselip, áýe tasymalynyń básekeli naryǵy qurylady. Ulttyq teńiz saýda floty Kaspıı teńizindegi qazaqstandyq porttardan munaı tasy­ma­ly­nyń 2/3 kólemin jáne qurǵaq  júkter tasymalynyń 1/2 kólemin qamtamasyz etetin bolady. Biz ekonomıkamyzdyń agrarlyq sektoryndaǵy ónimdilikti artty­ramyz. Etti mal sharýashylyǵyn damytý jónindegi buryn bolyp kór­me­gen joba iske asyrylady. 2016 jyldyń ózinde 4 mıllıon tonna as­tyq eksportynyń qunyna teń 60 myń tonna et eksportqa shy­ǵarylady. Bul aýyldyq jerlerde 20 myńnan astam jumys ornyn ashýǵa múmkindik beredi, júz myńnan astam aýyl turǵyndarynyń kiris kózine aınalady jáne sabaqtas salalarda – aýylsharýashylyq mashına jasaýda, hımııa jáne tamaq ónerkásibinde, jemshóp óndirisinde, tehnıka jóndeýde óndiristi ulǵaıtýyn yntalandyrady. Biz otandyq qarjy sektorynyń básekege qabilettiligin art­ty­ramyz. Almaty qalasynda Azııanyń jetekshi qarjy orta­lyq­ta­ry­nyń ondyǵyna enetin qarjy ortalyǵynyń damýy úshin qajetti jaǵdaı jasalatyn bolady. Ekonomıkalyq ósý – qazaqstandyqtar ál-aýqatynyń basty sharty! QOǴAMDAǴY BEIBITShILIK PEN TYNYShTYQ, QAZAQSTANDYQTAR О́MIRINIŃ QAÝIPSIZDIGI Biz saıası júıemizdi jańartýdy josparly túrde júzege asy­ramyz. Biz onyń barlyq negizgi elementterin reformalaýdy – Parlamenttiń, saıası partııalar men jergilikti bılik organdarynyń rólin arttyrýdy, sot júıesiniń táýelsizdigin nyǵaıtýdy jalǵas­ty­ra­tyn bolamyz. Saıası reformalar bizdiń orta merzimdi perspektıva­myz­ǵa arnalǵan strategııalyq mindetterimiz – Qazaqstannyń bá­se­ke­ge qabilettiligin arttyrýdyń ajyramas elementi bolyp tabylady. Biz joǵary kásibı jáne yqsham memlekettik apparat qurý jónindegi jumysty jalǵastyramyz. Memlekettik qyzmetke korporatıvtik basqarý, nátıjelilik, ashyqtyq jáne qoǵamǵa esep berý qaǵıdattaryna negizdelgen jańa basqarý tehnologııalary engiziletin bolady. Memlekettik qyzmettiń jańa modeli 2015 jyldyń ózinde tolyqqandy jumys isteıtin bolady. Biz bastalǵan reformany dáıekti túrde tereńdete otyryp, quqyqtyq tár­tipti qorǵaý júıesin nyǵaıtamyz. Quqyq qorǵaý organdary ju­my­synyń sapasy men nátıjeliliginiń ólshemi abstraktili statıstıka emes, olarǵa azamattar men bıznes tarapynan kórsetilgen senim­niń artýy bolmaq. Azamattar quqyq qorǵaý organdary qyzmet­ker­lerin ózderiniń konstıtýsııalyq quqyqtaryn qorǵaýshylar dep tanýǵa tıis. Biz elimizdiń qorǵanys qabiletin nyǵaıtamyz. Armııany qarý-jaraq pen áskerı tehnıkanyń ozyq úlgilerimen jaraqtandyrý jalǵastyrylady. Sarbazdarymyz ben ofıserlerimizdiń laıyqty qyzmet etýi úshin barlyq jaǵdaılar jasalatyn bolady. Biz áskerı mamandyqtyń mártebesin kóterip, Otan qorǵaýshylardyń tartymdy beınesin jasaýǵa bar kúshimizdi salamyz. Biz jaýapty da belsendi syrtqy saıasatymyzdy jalǵastyra­myz. Qazaqstan aldaǵy ýaqytta da álemdik qoǵamdastyqpen únqatysý jáne ózara tıimdi yntymaqtastyqqa yqylasty el retinde damı beredi. Bul memleketimizdiń álemde laıyqty oryn ıelenip, ulttyq múddelerin neǵurlym tıimdi qorǵaýyna múmkindik beredi. Qazaqstan syrtqy saıasatynda Reseımen, Qytaımen, AQSh-pen, Eýropalyq Odaqpen, Ortalyq Azııa jáne Islam álemi elderimen ynty­maq­tastyǵyn nyǵaıta túsýge aıryqsha mán beredi. Qoǵamdaǵy tynyshtyq pen azamattardyń qaýipsizdigi – bizdiń basty qundylyǵymyz! QYMBATTY QAZAQSTANDYQTAR! Bul mindetterdi oryndaýǵa búginde bizdiń áleýetimiz jetedi. Biz jeke adamnyń ósip-ónýi men qoǵamnyń ál-aýqatyn arttyrý maqsatynda  jańa áleýmettik saıasatty júzege asyrýǵa bel sheshe kiristik. Meıli, ol ómir esigin endi ashqan náreste me, álde laıyqty zeınet demalysyna shyqqan aǵa býyn ókili me – Qazaqstannyń árbir turǵyny qoǵamymyzdyń basty qundylyǵy bolyp tabylady. Árbir azamatymyzǵa memlekettiń qamqorlyǵyn kórsetý – meniń basty mindetim. О́z kúshine, óz halqyna sengen adam ǵana patrıot bola alady. Sebebi, patrıotızm degenimiz kóńil-kúıdiń tebirenisi ǵana emes, ol – búkil ómir boıy Otanǵa qalypty da qaltqysyz berilgendik. Men búkil ómir boıyna osy qaǵıdatty basshylyqqa aldym jáne Qazaqstan halqy qandaı tańdaý jasaǵan kúnde de men osy joldan taımaımyn. Men árbir azamatty onyń qabyldaǵan sheshimimen bizdiń Otanymyzdyń kórkeıýi men óziniń taǵdyrynyń ıgiligi tikeleı sabaqtas ekenin oılaýǵa shaqyramyn. BOLAShAQTYŃ IRGESIN BIRGE QALAIMYZ! QAZAQSTAN, TEK QANA ALǴA! _________________________________________________ «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýsııalyq zańyna sáıkes respýblıkalyq bıýdjettiń jáne Qazaqstan Respýblıkasynyń Prezıdenttigine kandıdat N.Á.Nazarbaevtyń saılaý qorynyń qarajatynan tólendi. Tapsyrys berýshi – Nurpeıisov Qadyrbaı Nurpeıisuly.