Qazaqstan Respýblıkasynyń kezekten tys prezıdenttik saılaýyna baılanysty respýblıkamyzdyń sheteldik mekemeleri janynan qurylǵan saılaý ýchaskeleriniń biri Qazaqstannyń Reseıdegi Elshiliginiń rezıdensııasynda ornalasqan. Máskeýdegi bul №143 saılaý ýchaskesinde dıplomattar, elimizdiń TMD, EýrAzEQ, UQShU, Keden odaǵy komıssııasy júıesindegi ókilderi, qazaqstandyq uıymdar men kompanııalardyń Máskeýdegi ókildikteriniń qyzmetkerleri, olardyń otbasy músheleri, joǵary oqý oryndarynda bilim alyp júrgen stýdentter men áskerı kýrsanttar, ózge de qazaqstandyq azamattar daýys beredi.
Daýys berýge arnalǵan úı-jaı talapqa saı jabdyqtalǵan. Bir taqtaǵa prezıdenttikke kandıdattardyń fotosýreti men olar týraly aqparat ilingen. Ortalyq saılaý komıssııasy belgilegen qujattar jıyntyǵy, ýchaskelik saılaý komıssııasynyń quramy arnaýly taqtaǵa ornalasqan. Saılaý komıssııasynyń derbes bólmesi bar, onda komıssııa músheleriniń kún saıynǵy kezekshiligi uıymdastyrylǵan. Daýys berý ýaqyty men orny reseılik BAQ-tar arqyly saılaýshylar nazaryna jetkizildi.
Sheteldik mekemelerdiń janynda qurylǵan saılaý ýchaskeleri boıynsha belgilengen talapqa sáıkes saılaýshylar tizimin tanystyrýǵa berý úshin komıssııa músheleri saılaýshylar tizimin naqtylap, pysyqtaý ústinde. Saılaýshylar arasynan bıyl tuńǵysh ret daýys beretin jastar anyqtalýda. Saılaý komıssııasy osy jas saılaýshylardyń alǵash ret paıdalanǵaly turǵan memleket basshysyn saılaý quqyǵyn este qaldyrýyna qatysty is-sharalardy da oılastyrýda.
Bıylǵy prezıdenttik saılaý – halyqtyń óz tańdaýy. Muny Qazaqstannan tys jerde turyp jatqan el azamattary da tereń sezinýde. Soǵan oraı 3 sáýir kúni árkim óz júrek qalaýymen tańdaǵan kandıdatyn jaqtap daýys berýge daıyndalýda.
Serikqalı BAIMENShE, «Egemen Qazaqstan» – Máskeýden.
Reseı Federasııasy.