Daýys berý – azamattyq paryz

Dál qazir búkil elimiz asa bir jaýapty belestiń aldynda tur. Ol belesten biz aldaǵy jeksenbide – 3 sáýirde ótemiz. Qalaı ótemiz? Bylaısha qara­ǵanda, bári de aıqyn sııaqty. Qazaqstannyń qazirgi álemdik qoǵamdastyqtaǵy alar orny qomaqty ekeni belgili. Mem­le­ketimizdiń jyl asqan saıyn abyroıy artyp, halqymyzdyń ál-aýqaty jaqsara túskenin bárimiz kórip otyrmyz. El aman, jurt tynysh. Jumyr Jerdiń o jaq, bu jaǵynan jetip jatqan jamanat jan túr­shiktiredi. Qudaıǵa shúkir, sonyń bárinen halqymyz aman tur. Munyń ózi táýelsizdiktiń 20 jylynda júrgizilgen júıe­li jumystyń jemisi. Meniń oıym kúni erteńgi prezıdenttik saılaýǵa baıla­nys­ty olaı dep, bulaı dep pikir aıtý emes, úgit júrgizý emes. Meniń oıym otandasta­rymyz­dyń osy saı­laý­daǵy belsendiligine baılanysty. Biz birazdy kórgen, ana qo­ǵamda da, myna qoǵamda da qyz­met atqarǵan býynnyń óki­limiz. Men ózim qala ákimi bolyp ta jumys istedim. Qol­dan kelgeninshe elge eńbek ettik. Sol keshegi keńestik ke­zeń­de saılaýǵa qatysýdaǵy belsendilik bólekshe bolatyn. Qol­dan jasalsa da, uıym­das­tyrylsa da saılaý el ómi­rindegi eleýli oqıǵaǵa aına­la­tyn. Árıne, ol kezdegi saıası júıe basqa, ıdeologııa basqa. «Kommýnıster men partııada joqtardyń myzǵymas blogy­nyń» bar ekenin álemge pash etý úshin kommýnıstik bılik saılaýǵa adamdardy túgelge jýyq qatystyrmaı tyn­baıtyn. Ártúrli sebeptermen saılaý ýchas­kesine barýdy keshiktirip jatqandardyń úıine jetip, aldyǵa salyp aıdaǵandaı etip alyp keletinderi de bolatyn. Demokratııa jeli esip, qaıta qurý degen kezeń kelgeli beri adamdardyń sanasynda bárin de ózi sheshetin psıhologııa ornyǵa tústi. Munyń jaqsy jaǵy kóp. Sonymen birge kemshin tustary da bar. Talaı adam osyny betperde etip, óziniń samar­qaý­ly­ǵyn, qoǵam ústine beıǵam qaraı­tynyn kólegeıleýge beıim bo­lyp bara jatqandaı. Muny biz keı-keıde azamattarymyzdyń ózi­niń konstıtýsııalyq quqyn – myna memlekettiń mańyzdy má­selelerin sheshetin iri is-sha­ralarǵa qatysý, mysaly, saılaýlarda daýys berý múmkindigin paıdalanbaı qala beretinin de baıqaımyz. Al shyn máninde azamattyń azamattyǵy, qoǵam isterine aralasý belsendiligi, eń aldymen osy saılaý quqyn paı­dalanýynan kórinedi ǵoı. Búginde Qazaqstan búkil álemniń nazarynda tur. Kúni keshe  Eýropadaǵy qaýipsizdik pen yntymaqtastyq uıymyna tór­aǵa­lyq etken, onyń on bir jyl­dan beri shaqyrylmaı kele jat­qan Sammıtin abyroımen ót­kiz­gen, endi az ýaqyttan keıin búkil musylman áleminiń tizginustary bolǵaly otyrǵan elimizdegi de­mokratııanyń deńgeıi azamattar­dyń sol el taǵdyryn sheshetin mańyzdy is-sharaǵa qandaılyq belsendilikpen qatysatynynan da kórinedi. Meniń daýysym ne ózgerte qoıady deısiń, basqalar barady ǵoı, solar daýysyn beredi ǵoı, másele durys sheshiledi ǵoı dep nemquraıdylyqqa sa­ly­nar bolsaq, ózimizdiń  qo­ly­myzǵa tıip turǵan múm­kin­dikten enjarlyǵymyz úshin ǵana aıyrylar bolsaq, munyń ózi eldigimizge bir syn. El isine aralasý, memleket  bola­sha­ǵynyń taǵdyryn sheshý, soǵan yqpal jasaý bizdiń bárimizge táýelsizdik berip turǵan syı­dyń biri. Sen elińdi aldaǵy bes jylda kim basqaratynyna qatysty óz pikirińdi bildirip qana qoımaısyń, erteńgi saılaýda juldyzy janǵaly tur­ǵan kandıdattyń jeńiske jeter paıyzyn da aıqyndaýǵa áser etesiń. Osyny sezinýdiń ózi júrek tolqytarlyq jaı emes pe? Búgingi tańda ózimiz ara­lasyp-quralasyp júrgen or­ta­nyń  adamdary aıtyp jat­qan sózder de, buqaralyq aq­parat quraldaryndaǵy pikirler de qazaqstandyqtar 3 sáýirde búkilhalyqtyq saı­laý­ǵa  belsendilikpen qaty­sa­ryna sendiredi. Sonyń ózinde de el halqynyń saılaýǵa qa­tysý deńgeıi barynsha joǵary bolǵany elimizdiń mereıi ekenin eskersek deımin.   Oıym­dy qoryta kelip, aıtarym mynaý: Qazaqstan – óz Ota­nymyz, óz Otanymyzdyń tizginin aldaǵy bes jylǵa kim­niń qolyna senip tapsyra­ty­ny­myzdy biz ózimiz sheshemiz. Ár­qaısymyz sheshemiz. Osy múm­kindikti paıdalanyp qalaıyq. Saılaýda daýys berý – bizdiń azamattyq paryzymyz. Murat ERGEShBAEV, Qyzylorda oblystyq qarjy basqarmasynyń bastyǵy.