Sport qashanda el mereıin asqaqtatady, rýhyn kóteredi. Demek, onyń damýy men sportshylardyń jeńiske jigerlenýine yqpal etý basty mindet. Jetisýlyq sportshylardyń osy oraıdaǵy jetistikterine kóńil súısinedi.
Basqa jetistikterdi aıtpaǵannyń ózinde VII Qysqy Azııa oıyndarynda Qazaqstan qorjynyna 32 altyn, 21 kúmis, 17 qola medal túskeni erekshe maqtanysh. Olardyń arasynda jetisýlyq eki dúrkin chempıon atanyp, kúmis medaldi qanjyǵasyna baılaǵan Elena Hrýstaleva, bıatlonshy Dıas Keneshov altynnan alqa taǵyp, jankúıerlerdiń senimine selkeý túsirmegenderin ortaǵa salyp, úzdik sportshylar men jattyqtyrýshylardy, sport mekemesi, sport klýby, dene tárbıesi jáne sport bólimderiniń atyna izgi lebizin jetkizdi. Ulttyq at sporty túrlerinen ótetin jarystardaǵy kókparshylardyń jetistikteri de ataldy.
Budan soń respýblıkalyq jáne halyqaralyq jarystarda joǵary nátıjelerge qol jetkizgen grek-rım kúresinen Qazaqstan halyqaralyq dárejedegi sport sheberi, 2010 jylǵy Álem chempıonatynyń qola júldegeri, Jazǵy Azııa oıyndarynyń chempıondary Nurmahan Tynalıev, VII Qysqy Azııa oıyndarynda altynnan alqa taqqan Elena Hrýstaleva, aýyr atletıkadan álem chempıondary Svetlana Podobedova, Maııa Maneza, Zýlfııa Chınshanlo, grek-rım kúresinen halyqaralyq dárejedegi sport sheberi, 2010 jylǵy Jazǵy Azııa oıyndarynyń kúmis júldegeri Darhan Baıahmetov, regbıden komandalyq básekede altyn medal ıeleri Irına Amosova, Irına Adler, Olesıa Terıaeva, Irına Radzıvıl jáne gir kóterýden halyqaralyq dárejedegi sport sheberi, 2010 jylǵy álem chempıony Ámirbaı Rysqulov oblys ákiminiń dıplomy jáne 100 myń teńge aqshalaı syılyqtarymen marapattaldy.
Jıynda respýblıkalyq jáne halyqaralyq jarystarda úzdik nátıje kórsetken sportshylardy daıyndaǵany úshin grek-rım kúresinen Qazaqstan Respýblıkasyna eńbek sińirgen jattyqtyrýshy Azamat Kókebaev, aýyr atletıkanyń jattyqtyrýshylary Leonıd Dıgaı jáne Alekseı Nı, Vıktor Nı, regbı komandasyn daıyndaǵan Mahabbat Týǵambekova, grek-rım kúresinen jattyqtyrýshy Murat Qasymhanov, bıatlon jattyqtyrýshysy Nıkolaı Zelenkov oblys ákiminiń dıplomy men 100 myń teńge aqshalaı syılyqtaryna ıe boldy.
Sport maıtalmandarynyń bolashaq izbasarlary jergilikti jerlerdegi jumystyń júıeli uıymdastyrylýyna baılanysty. Osy oraıda, úzdik tanylǵan sport mekemesi, sport klýby men dene tárbıesi, sport bólimderiniń eńbekteri de ataldy. Olardyń qatarynda ótken jyly halyqaralyq jarystarda tabysty óner kórsetken №1 olımpııalyq rezervtegi mamandandyrylǵan balalar men jasóspirimder mektebi, «Jetisý» kásipqoı áıelder voleıbol klýby, Qarasaı aýdanynyń dene tárbıesi jáne sport bólimi oblys ákiminiń dıplomy jáne 500 myń teńge aqshalaı syılyqtaryn alyp, mereılendi.
«Arqalaǵany altyn, jegeni jantaq» deıtin jýrnalıster eńbegi de eskerildi. Jyl boıy sportshylarǵa jankúıer bolyp, qalamyn qarý etken bir top buqaralyq aqparat quraldarynyń ókilderi de arnaıy dıplom men aqshalaı syılyqtarǵa qol jetkizdi.
Kúmisjan BAIJAN.
Almaty oblysy.