Qaıbir kúni eki-úsh aýdandy aralap, Tarazǵa keshtetip jettim. Kóligimdi jýatyn orynǵa qoıdym da, kiltti kólik jýýshy jigitke ustatyp, asyǵyp meshitke qaraı júgirdim. Meshitten shyqqannan keıin aýladaǵy dinı kitaptar satatyn shaǵyn dúńgirshektiń qasynan ótip bara jatyp, bir kitapqa kózim tústi. Qaırat Joldybaıulynyń kitaby. Negizi osy jigittiń jazǵandary, oılary, paıymdary unaıdy. Sodan ishke kirip baǵasyn suradym. 1400 teńge turady eken. Taǵy musylmansha kúntizbe aldym. Odan satýshy jigittiń maıdasy bolmaı, taǵy bir zattardy qosyp, týra eki myń teńgege saýda jasadym.
Pendemiz ǵoı... Úı tola kitap. Oqyp jatqanym da shamaly... «Eki myń teńgege odan da kóligime benzın quıǵan da bolar ma edi, álde úıdegi bala-shaǵaǵa birnárse alǵan da bolar ma edi?» degen de oı keldi. Sol zamatta-aq «Bul kitaptardy keıin alamyn» dep, satýshydan aqshamdy qaıtaryp alǵym da keldi me?!. Áıteýir ári-sári bop turyp qalǵanym ras. Biraq uıaldym.
Sonymen kitaptardy qushaqtap, kóligime kelsem, jigitter aınadaı jarqyratyp aýlaǵa shyǵaryp qoıypty. Kiltti alyp jatsam, kólik jýǵan jigit «Aǵa, salonnan mynany taýyp aldym» dep, qolyma eki myń teńge ustatady.
– Taýyp alǵany qalaı?
– Oryndyǵyńyzdyń janynda qystyrýly tur eken.
Sol kezde esime tústi. Alys aýdannan kele jatyp, jol-jónekeı qol kótergen úsh jigitti ala ketken bolatynmyn. Tanysyp, jap-jaqsy áńgimelesip keldik. Qalaǵa kelgen soń olar osy teńgeni uzatqan.
– Jigitter, jol qysqaryp, jaqsy áńgimelesip keldik. Aqshalaryńa rahmet, – dep, qoldaryn qaıtarǵanmyn. Sóıtsem júk salǵyshtan sómkelerin alyp berip jatqanda ol jigitter aqshany oryndyqtyń janyna qystyryp ketken eken ǵoı.
«Oı, Alla-aı!» dep, álgindegi pendeshilik qylyǵyma qatty qysyldym.
Oralhan DÁÝIT,
«Egemen Qazaqstan»