Ýnıversıada kúnderi sport delegasııalary men volonterlarǵa arnap shamamen 700 000 kese sútti shaı daıyndalmaq.
Osyǵan deıin de Ýnıversıadanyń uıymdastyrý komıteti oıyndardy ótkizýge barynsha az bıýdjettik qarjyny jumsaýdy óz aldyna mindet etip qoıǵany aıtylyp keldi. Oǵan qosa, josparlanǵan bıýdjet uıymdastyrý jumystary bastalǵaly beri eki esege deıin derlik qysqartyldy. Al otandyq bıznes ókilderi arasynan demeýshiler men seriktesterdi tartýdyń arqasynda kezektegi birqatar shyǵyndardy tómendetýge múmkindik paıda bolýda.
Bul týraly «2017 jylǵy Almatydaǵy XXVIII Dúnıejúzilik qysqy Ýnıversıadany daıyndaý jáne ótkizý jónindegi dıreksııa» MQ apparat basshysy Dıdar Saǵadıev bylaı deıdi:
– Asa aýqymdy sport is-sharalaryn ótkizý kezinde seriktester men demeýshilerdi tartý – búkil álemde keń taralǵan tájirıbe, ol bızneske biregeı marketıngtik múmkindikterge jol ashyp, uıymdastyrýshylarǵa shyǵyndardy aıtarlyqtaı ońtaılandyrýǵa múmkindik beredi. Ýnıversıadanyń sátti ótýi úshin qosylǵan kez kelgen kómek asa mańyzdy, sondyqtan, biz osy aıtýly oqıǵanyń daıyndyǵyna bıznestiń belsendi atsalysyp otyrǵanyn quptaımyz.
Sonymen, sársenbi kúni Almatydaǵy XXVIII Dúnıejúzilik qysqy Ýnıversıadany daıyndaý jáne ótkizý jónindegi dıreksııa «RGBrands Kazakhstan» kompanııasymen yntymaqtastyq týraly mámilege qol qoıdy. Atalǵan mámile aıasynda kompanııa Ýnıversıada sportshylaryn, volonterlaryn, tóreshilerin, bapkerlerin, BAQ ókilderi men basqa da qatysýshylardy ystyq shaımen qamtamasyz etý úshin «Pıala Gold» qara jáne kók shaıyn, sondaı-aq, 100% tabıǵı ýltrapasterlengen «MOIo» sútiniń 14 myń lıtrin usynady. Usynylǵan ónimderden 700 000 kese sútti shaı daıyndalady dep kútilýde.
«Biz Ýnıversıadanyń qysqy sýyq kúnderi qonaqtarymyz tula boıdy jylytyp, sergektik syılaıtyn, jarystar arasyndaǵy úziliste erekshe rahatqa bóleıtin qazaqtyń qoıý qara shaıynan dám tatyp kórse deımiz», – dedi BAQ ókilderiniń qatysýymen ótken mámile aıasynda «RGBrands Kazakhstan» JShS bas dırektory Tımýr Qaltaev.
Aınash ESALI,
«Egemen Qazaqstan»
ALMATY