Árkimniń taǵdyry árqalaı, eshkim beınetti, múgedektikti surap almaıdy, al taǵdyryna kez bolǵan eken – kóterýi tıis! Elimizde múmkindigi shekteýli jandardyń sportpen aınalysýyna jol ashylǵan, olar sporttyń birneshe túrleri boıynsha paralımpıadalarǵa qatysyp, túrli jattyǵý oryndarynda shynyǵyp júr.
Mańǵystaýdaǵy múgedekter sport klýbynyń dırektory Nuraly Qulyshov – respýblıkalyq «Mereıli otbasy» baıqaýynyń jeńimpazy. Úlgili otbasynyń otaǵasy bola alǵan azamat óńirde talaıly taǵdyr ıeleriniń qoǵamnan bólinip qalmaı ýaqytyn kóńildi ótkizýine ári densaýlyǵyn shyńdaýyna kóp kóńil bólip keledi. N.Qulyshov múmkindigi shekteýli jandarǵa qatysty taǵy bir jaǵymdy jańalyqty jarııa etti.
Aqtaý qalasynda ótken jyldyń tamyz aıynda bastalǵan múgedekterge arnalǵan sport kesheniniń qurylysy jyl sońynda aıaqtalǵan. Muqtaj jandar 15 jyl kútken zalǵa jergilikti bıýdjetten 108 mıllıon teńge bólinipti. О́ńirdegi múgedekter sport klýbyna 167 adam tirkelgen, jyl sońyna deıin olardyń sany 300-ge jetedi dep kútilýde. Al voleıbol, ústel tennısi, shahmat pen doıby oınaýǵa múmkindik beretin, kıim aýystyratyn oryn men jýynyp-shaıynatyn bólmesi bar, edeni jylytylǵan zalǵa qazir múmkindigi shekteýli 60 adam kelip jattyǵyp júr.
Klýb jetekshisiniń aıtýynsha, keshenge óńirdegi iri kompanııa 5 mıllıon teńge kóleminde demeýshilik kórsetken. Júgirý jáne velojattyǵý, kir tastary, sporttyq kıimder men tennıs, voleıbol torlary, dop, ózge de sporttyq qural-jabdyqtar alynypty. Aldaǵy ýaqytta demeýshilerden kómek bolsa, úlken tennıs zalyn ashý men arbamen sporttyq bı bıleý túrlerin ashý, sondaı-aq, zaǵıp jandar úshin golbol oıynyn jolǵa qoıý josparda bar. Bıyl kóktemde oblystyń aýdandary men qalalarynda ondaǵan sport túrleri boıynsha jarystar ótkizip, óńir sportshylaryn respýblıkalyq saıystarǵa shyǵarý mejelenip otyr.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy