Halyqtyń senimi men mahabbatyna bólengen sát

Osydan dál bir aı buryn saılaýaldy nasıhat naýqany bas­talǵan kezde Qazaqstan Res­pýb­lı­kasynyń prezıdenttigine kandıdat Nursultan Nazarbaev «Nur Otan» HDP ortalyq appara­tyn­daǵy óziniń respýblıkalyq orta­lyq shtabyna kelgen bolatyn. Keshe túngi saǵat 24.00-de, el hal­qy óziniń tarıhı tańdaý sátin jasaǵan kúnniń sońynda Nur­sul­tan Ábishuly saılaýdyń alǵashqy nátıjesimen óz jaqtastarymen birge tanysý úshin ortalyq shtabqa ekinshi ret keldi. Elbasyn munda ortalyq shtabtyń músheleri, senimdi ókilderi men volonterler, jastar úlken qurmetpen qarsy aldy. Saılaý kezinde Nursultan Nazarbaevtyń kandıdattyǵyna qoldaý bildirgen elimizge tany­mal azamattardyń kóp bolǵan­dy­ǵy belgili. Osy jolǵy basqosýda biz solardyń arasynan Senat de­pýtaty Qýanysh Sultanovty, Ǵylym akademııasynyń prezıdenti Murat Jurynovty, Olımpıada chempıondary Olga Shıshıgına men Ilıa Ilındi, ataq­ty skrıpkashy Aıman Musaqo­jaeva­ny, basqa da birqatar ta­ny­mal azamattardy baıqap qal­dyq. Eń aldymen sóz tizginin alǵan «Nur Otan» HDP Tóraǵasynyń orynbasary Nurlan Nyǵmatýlın osy jınalǵan qaýymnyń dál osy sátte ortalyq teledıdar arqyly beriletin Ortalyq saılaý komıs­sııa­synyń saılaýdyń alǵashqy nátıjesi týraly qorytyndysyn asyǵa tosyp turǵandyǵyn aıtyp, jurtshylyq nazaryn teledıdar habaryna aýdardy. Osy sátte teledıdar júrgizýshisiniń sańqyl­da­ǵan daýysy da estilip sala berdi. Ortalyq saılaý komıs­sııa­sy­nyń tóraǵasy Qýandyq Tur­ǵan­qulovtyń alǵashqy nátıje tý­ra­ly habary tyńdaldy. Ol óńir­ler­den kelip túsken alǵashqy má­limetter boıynsha, elimizdiń alys túkpirleri men sheteldik ókil­dikterdegi Qazaqstan azamat­ta­rynyń daýysyn esepke alma­ǵanda (olardyń daýys nátıjesi keıinnen qosylady), daýys berýge saılaýshylardyń  89,9 paıyzy qatysqandyǵyn habarlady. So­nyń ishinde Aqmola oblysynda saılaýshylardyń 93,1 paıyzy, Aqtóbe oblysynda 95,1 paıyzy, Almaty oblysynda 96,9 paıyzy, Atyraý oblysynda 91,70 paıyzy, Shyǵys Qazaqstan oblysynda 94 paıyzy, Jambyl oblysynda 95,3 paıyzy, Batys Qazaqstan obly­syn­da  92,60 paıyzy, Qaraǵandy oblysynda 90,8 paıyzy, Qosta­naı oblysynda 94 paıyzy, Qy­zyl­orda oblysynda 94,9 paı­yzy, Mańǵystaý oblysynda 94,2 paı­y­zy, Pavlodar oblysynda 80,3  paıyzy, Soltústik Qazaq­stan ob­lysynda 92,3 paıyzy, Ońtústik Qazaqstan oblysynda 93,1 paı­yzy, Astana qalasy 69,1 paıyzy, Almaty qalasy 68,5 paıyzy qatysqan. Elimizdiń 14 oblysy men Astana jáne Almaty qalalarynda Sosıologtar men saıasat­taný­shy­lar assosıasııasy saılaý nátı­jesi boıynsha arnaıy zertteýlerin júrgizgen eken. 102 saılaý ýchaskesinde 100 myń adamnyń arasynda júrgizilgen osy exit-poll-dyń resmı emes derek kóz­deri boıynsha saılaýshylardyń daýys berýge Qazaqstan boıynsha qatysýynyń ortasha kórsetkishi 84,9 paıyzdy quraǵan. Osy saı­laýǵa qatysýshylardyń 94,8 paıy­­zy Nursultan Nazarbaevtyń kandıdatýrasyn jaqtap daýys bergen. Bul saılaý qorytyndysy týraly beıresmı derek kóziniń al­ǵashqy aqparaty. Al naqty qorytyndy keıinnen jarııa­la­na­dy. Sondyqtan osy maqala bary­synda qasań tilmen sóıleýge týra kelip tur. Degenmen, alǵashqy málimetterdi estigen sátte et júrek dir etpeı qoımaıdy. 4 kandıdattyń arasynan 94 paıyz qoldaýǵa ıe bolý, bul halyq senimi men mahabbatyna bólený degen sóz. Osy málimetti estigende Elbasynyń óz júregi de eljirep ketkendigin sezingendeı boldyq. Elbasy bylaı dedi: «Qurmetti qazaqstandyqtar, otandastar! Mine, jańa ǵana biz­diń táýelsizdigimizdiń 19 jyl ishindegi tarıhı saılaýdyń aldyn ala málimetteri belgili boldy. Ta­rıhı saılaý deıtinimiz – óıt­keni, biz kúlli álemge taǵy bir ret bizdiń qoǵamymyzdyń demokratııa jolynda ekendigin dáleldedik. Dál osy kúni búkil álemniń naza­ry Qazaqstanǵa aýdy. Saılaý ashyq, taza ótti. Quqyq qorǵaý organdary zańdylyqty qadaǵala­dy. Prezıdenttikke barlyq kan­dıdattarǵa teń quqyq, buqaralyq aqparat quraldaryna qoljetim­dilik, olarǵa barlyq oblystar, aýdandar, qalalar, aýyldarda óz baǵdarlamalaryn, óz ıdeıalaryn jarııalap sóz sóıleýlerine múm­kindik berildi. Biz – ashyq qoǵam­byz. Sondyqtan bizdiń saılaýy­myzdy baqylaýǵa 1059 sheteldik baıqaýshylar, 200 sheteldik jýrnalıster keldi. Olarǵa daýys berý barysyna kedergisiz qatysýǵa, saılaý barysyn qadaǵalaýǵa múm­kindikter jasalyndy», deı kele ekzıt-pýldyń osy qorytyndysy boıynsha Qazaqstan halqynyń ózi jarııalaǵan reformalar kýr­syn, qoǵamdy jańartý, qazaq­stan­dyqtardyń, árbir otbasy men árbir adamnyń ál-aýqatyn jaq­sartý baǵytyn taǵy da qolda­ǵandyǵyn aıtty. «Osy oqıǵaǵa baılanysty men barlyq qazaq­standyqtarǵa osyndaı bıik senimderi úshin alǵysymdy bildiremin. Osy jerde uıym­das­ty­rylǵan, barlyq oblystarda ju­mys istegen qoǵamdyq shtabyma, shtabtyń barlyq qatysýshy­lary­na, táýelsizdiktiń 20 jyly boıy­na ózimmen birge kele jatqan seriktesterime, dosta­ryma ystyq yqylasymdy jetkizemin», deı kele, saılaýda saılaý kúni ǵana jumys istegender emes, odan kóp buryn ispen ózin dáleldeı alǵandar jeńiske jetedi dep sengendigin málim etti. Demek, 20 jyl boıy jum­salǵan kúsh-jigermen eńbek bos­qa ketken joq. Bul – synnan ótýdiń naǵyz emtıhany boldy. Elbasy ózine qoldaý kór­set­ken 29 myń senimdi ókilge, 88 myń volonterge alǵysyn jetkizdi. «Ásirese, meniń ustanǵan ba­ǵy­tymmen jeke ózimdi qoldap, úl­ken belsendilik tanytqan jas­tarymyzǵa erekshe alǵysymdy aıtamyn. Osy rette men kandıdat retinde jeńiske jetsem – muny búkil elimizdiń, Qazaq­stan­nyń jeńisi dep esepteımin», dedi. Elbasy búgin saılaýǵa qa­ty­syp, halqymyzdyń birligin kór­setken barlyq saılaýshylarǵa úlken alǵysyn bildirdi. Qazirgi bizdiń barlyq jetistikterimiz biz­­diń birligimizdiń, dosty­ǵy­myz­dyń, kópultty Qazaq­stan­daǵy árbir adamnyń quqyǵy men erkin qurmetteýdiń nátıjesi eken­digin aıta kele saılaýǵa qatysqan bas­qa da kandıdattarǵa óz ıdeıala­ryn bildirgendigi úshin ystyq yqylasyn jetkizdi. Olar­dyń usynystarynda da den qoıar­lyq jáıtter bar ekendigin, olardyń aldaǵy ýaqytta nazarǵa alyna­tyndyǵyn aıtty. Árbir úıge, Otanymyzdyń árbir azama­tyna baqyt pen bereke tiledi. On-laın rejimi arqyly osy basqosýǵa qatysqan Almaty, Qos­tanaı oblysyndaǵy jaqtastary Elbasyn jeńispen qyzý qut­tyqtady. О́ńirlerde saılaý ýchaskelerine halyqtyń merekedegideı joǵary kóńil-kúımen barǵan­dy­ǵyn habarlap, ózderiniń Elbasy­men birge ekendikterin jetkizip, Nursultan Ábishulyna zor den­saýlyq, uzaq ómir tiledi. Basqosý qorytyndysynda «Nur Otan» HDP Tóraǵasynyń orynbasary Nurlan Nyǵmatýlın Nursultan Ábishulyn Qazaqstan­nyń negizin qalaýshy, Kóshbas­shysy retinde osy uly jeńisimen quttyqtap, gúl usyndy. Basqosý ortalyq shtabqa jınalǵan jas­tar­dyń úlken qoshemetimen aıaq­taldy. Halyqtyń osynaý qur­metine tánti bolǵan Nursultan Ábishuly da óz tarapynan olarǵa úlken qurmet kórsetip, kóptegen jastardyń qolyn alyp, ystyq yqylasyn bildirdi. Suńǵat ÁLIPBAI, Sýretterdi túsirgender S.BONDARENKO, B.OTARBAEV.