Qostanaıda birinshi ret «Eki juldyz» mýzykalyq festıvali ótti. Oǵan 16 jup ánshi qatysty. Bul oblystyq ardagerler keńesiniń 30 jyldyq toıyna arnalǵan sharalardyń biri bolatyn. Oblystyq ardagerler keńesiniń tóraǵasy Kenjebek Úkın bul jobany osydan úsh jyl buryn rýdnyılyqtar bastaǵanyn aıtady. Aldymen oǵan qatysýǵa tilek bildirgender eki-úsheýden aspapty, keıin olardyń qatary kóbeıe túsken.
– Rýdnyı qalasynyń bastamasyn biz de qoldap, Qostanaı qalalyq ákimdiginiń kómegimen festıvaldy birigip ótkizdik, – deıdi Kenjebek Úkiuly.
Festıval sharty boıynsha sahnaǵa shyǵatyn qos ánshiniń biri ardager, ekinshisi jas ánshi boldy. Jáne olar oryndaıtyn shyǵarmalar keń taraǵan retro nemese halyq ánderi bolýy kerek degen talap qoıyldy. Mysaly, rýdnyılyq ardager Jaqsylyq Kákenov pen mektep oqýshysy Ábilhaıyr Qanafın oryndaǵan «Nado mnoı nebo sınee» áni ótken ǵasyrdyń 50-shi jyldary «Súıikti bizdiń dáriger» fılmi arqyly halyq arasyna keń jaıylǵan edi. Ár jup zaldy óz ereksheligimen qýantty. Osy festıvalda án shyrqaǵan ónerpazdyń barlyǵy derlik oblysta keń óris alǵan ardagerler horyna qatysady. Belgili mýzyka mamandary jetekshilik etetin horlarda ardagerler án aıtý ónerin kádimgideı meńgerip alady. Sondyqtan, sahnaǵa shyqqan juptardyń barlyǵy da kórermender kóńilinen shyǵyp otyrdy.
– Átteń, akkordeon bolmady, budan da jandyryp jiberer edik, – dep alaqanyn ysyp qoıady ánimen kórermenderdi jelpintip tastaǵan zeınetker Ivan Ermanov.
Báıgede «bap shaba ma, baq shaba ma?» degen ǵoı. Qazylar alqasy bas júldeni ýkraın halqynyń «Dva kolera» ánin quıqyljyta oryndaǵan Lıýbov Frolova men Vladımır Aleksanınge laıyq dep sheshti. Birinshi oryndy «Schastıa tebe, Zemlıa» ánin aıtqan Svetlana Obýhova men Ámına Jumaǵalıevaǵa berdi. Ekinshi oryndy Jeńis Qojahmetov pen Murat Shahmanov, úshinshi oryndy Bıbigúl Ybyraeva men Ánýar Qasqabasov bólisti.
Názıra JÁRIMBETOVA, «Egemen Qazaqstan»
QOSTANAI