Elbasy Nursultan Ábishuly Nazarbaevtyń halyqqa arnaǵan bıylǵy «Qazaqstannyń Úshinshi jańǵyrýy: jahandyq básekege qabilettik» atty Joldaýy mazmuny boıynsha memleketimizdiń ekonomıkalyq ósýiniń jańa modelin qurýdy kózdegen mańyzdy jáne ózekti baǵdarlamalyq qujat. Elimizdiń naqty jahandyq básekelestikke qabiletti el bolyp, tabysty ótken eki jańǵyrýdan mol tájirıbe jınap, «Qazaqstan-2050» strategııasyn oryndaýǵa baǵyttalǵan senimdi qadamy bolmaq.
Elbasy Joldaýy aıasynda damýdyn bes negizgi basymdyqtary retinde ulttyq ekonomıkamyzdyń tehnologııalyq jańǵyrtylýy, iskerlik ortasyn jaqsartý, makroekonomıkalyq turaqtylyq, adamı kapıtal sapasyn joǵarylatý, ult qaýipsizdigin qamtamasyz etý men sybaılas jemqorlyqpen kúresý belgilengen.
Joldaýdyń birinshi basymdyǵynda, ekonomıkanyń jedeldetilgen tehnologııalyq jańǵyrtylýyna qol jetkizý úshin sıfrly ındýstrııany damytý basqa salalarǵa serpin beretindigin aıta kelip, Úkimetke IT-startaptar halyqaralyq tehnoparkin qurý tapsyrylǵan. Ol álemniń barlyq elinen kásipkerler men ınvestorlar tartýdyń platformasy bolýǵa tıis.
Bizdiń salanyń negizgi qyzmetine qatysty tapsyrmanyń taǵy biri – ol bıznes-ortany túbegeıli jaqsartý jáne keńeıtý.
Memleketimizdiń strategııalyq maqsatynyń biri – eldiń ishki jalpy ónimindegi shaǵyn jáne orta bıznestiń úlesi 2050 jylǵa qaraı kem degende 50 paıyz bolýyn qamtamasyz etý baǵyty. Osyǵan oraı, jappaı kásipkerlikti qoldaý tetikterin odan ári jetildirý úshin ár óńir jappaı kásipkerlikti, sonyń ishinde otbasylyq kásipkerlikti damytý baǵytynda keshendi sharalar usynýǵa tıis. Onyń ishinde, jańa jumys oryndarynyń sanyn arttyrý arqyly salyq túsimderin ulǵaıtý memlekettik kirister organdary qyzmetiniń tıimdiligin baǵalaýdyń negizgi kórsetkishteriniń biri deýge bolady.
Memlekettik qyzmetter kórsetý prosesterin ońtaılandyrýdyń mańyzy óte zor. Qujattardyń merzimi men tizbesin qysqartyp, qaıtalanatyn rásimderdi joıý arqyly salyq tóleýshiler ýaqytynyń únemdelýine jaǵdaı jasaýǵa baǵyttalǵan. Bul oraıda, adamnyń óziniń barýyn qajetsinbeıtin tolyq elektrondy formatqa kóshirýdi kezeń-kezeńimen engizý kózdelip otyr.
Al, úshinshi basymdyq – makroekonomıkalyq turaqtylyqtaǵy basty mindet – aqsha-nesıe saıasatynyń yntalandyrýshy rólin qalypqa keltirý jáne ekonomıkany qarjylandyrýǵa jeke menshik kapıtaldy tartý.
Ulttyq bank fýnksııalaryn ózgerte otyryp, bankterdiń ahýalyna jedel baqylaý ornatý úshin oǵan burynǵydan da kóbirek quqyq beriletin boldy.
Sondaı-aq, salyq-bıýdjet saıasatyn jańa ekonomıkalyq jaǵdaıǵa beıimdeı otyryp, memlekettik damý baǵdarlamalaryna tıesili resýrstar men qarajatty ıgerýdiń tıimdiligin tekserý qajettiligi naqty mindet etip qoıylyp otyr. Sonymen qatar, qarajatty naqty ekonomıkaǵa neǵurlym tezirek ári tıimdirek jetkizý úshin bıýdjettik rásimderdi jeńildetý qajettiligi de atap ótildi.
Elbasymyz salyq saıasatyn bıznestiń «kóleńkeden» shyǵýyna beıimdep, shıkizattyq emes sektordaǵy salyqtyq bazany keńeıtý boıynsha naqty mindetter qoıdy. Qazirgi tańdaǵy salyq jeńildikterin ońtaılandyrý, jalpyǵa ortaq deklarasııalaý qarsańynda arnaýly salyq rejimderin jańasha qarastyrý jáne salyqtyq ákimshilendirý tetikterin jetildirý qajettigin aıtyp ótti. Sonyń ishinde, qosymsha qun salyǵyna qatysty birqatar ózekti máselelerdi sheshý Joldaýda naqty tapsyryldy.
Osy rette, aýqymdy baǵdarlamalardy júzege asyrýǵa qajetti qarajattyń basym bóligi memleket qazynasynan jumsalatyndyǵyn eskersek, memlekettik kirister organdarynyń Elbasynyń Joldaýyndaǵy tapsyrmalardy oryndaýdaǵy ornynyń ereksheligin, olarǵa qoıylǵan mindetter men talaptardyń mańyzdylyǵyn atap kórsetý qajet dep esepteımin.
Elbasymyz Nursultan Ábishuly Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty kezekti Joldaýynan týyndaǵan mindetterdi júzege asyryp, elimizdiń ekonomıkasyn odan ári damytyp, halyqtyń ál-aýqatyn jaqsartý jolyndaǵy maqsatymyzǵa jetý úshin, birlese aıanbaı eńbek etýge tıistimiz.
Bizdiń birlesip atqaratyn jumysymyz – memlekettiń jáne eldiń múddesi. Ol barshamyzǵa ortaq is. Sondyqtan, Joldaýdaǵy tapsyrmalar men mindetterdi barshamyz biraýyzdan qoldap, oryndalýyna kúsh salýymyz kerek.
Altynsary ÚMBETÁLIEV,
Ońtústik Qazaqstan oblysy boıynsha memlekettik kirister departamentiniń basshysy
Ońtústik Qazaqstan oblysy