Ońtústikke Premer-Mınıstrdiń orynbasary – Aýyl sharýashylyǵy mınıstri Asqar Myrzahmetov eki kúndik jumys saparymen kelip, oblys aktıvimen jáne jurtshylyqpen júzdesti. Elbasy N.Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty Qazaqstan halqyna Joldaýynyń Úkimet aldyna qoıyp otyrǵan mindetteri boıynsha alqaly jıyn ótkizdi.
Vıse-premer Memleket basshysynyń Aýyl sharýashylyǵy mınıstrliginiń aldyna qoıyp otyrǵan mindetterine keńinen toqtady.
Onyń aıtýynsha, sýbsıdııalardy bólý qaǵıdalaryn qaıta qarastyryp, birtindep ónimdi saqtandyrýǵa kóshý, bes jyl ishinde 500 myńnan astam jeke úı sharýashylyqtary men shaǵyn fermerlerdi kooperatıvterge tartý mindeti kún tártibinde tur. Sol sııaqty, ónimdi óńdeý sapasyn jaqsartyp, taýarlardy saqtaýdyń, tasymaldaýdyń jáne ótkizýdiń tıimdi júıesin qurý, eńbek ónimdiligin belsendi túrde arttyryp, óndiris shyǵyndaryn tómendetý, sýarmaly egis alańyn 5 jyl ishinde 40 paıyzǵa keńeıtip, 2 mıllıon gektarǵa jetkizý kózdeledi.
– Budan bylaı beriletin shaǵyn nesıe kólemi 18 mıllıon teńgege deıin kóterildi jáne nesıeni qaıtarý merzimi 5 jyldan 7 jylǵa deıin ulǵaıtyldy, dedi Asqar Isabekuly. Úkimet «Atameken» ulttyq kásipkerler palatasymen birlesip, bıznestiń shyǵynyn azaıtý boıynsha sharalar qabyldaıtyn bolady. Bul ásirese, energetıka, kólik jáne logıstıka, sondaı-aq, turǵyn úı-kommýnaldyq sharýashylyǵy salalaryndaǵy qyzmet kórsetý qunyna qatysty. Bul Ońtústik Qazaqstan oblysy úshin erekshe mańyzdy. О́ıtkeni, munda 18 myńnan astam shaǵyn jáne orta bıznes ókilderi bar. Salystyrmaly túrde aıtsaq, respýblıka boıynsha joǵary kórsetkishterdiń biri.
Baqtııar TAIJAN,
«Egemen Qazaqstan»
Ońtústik Qazaqstan oblysy