Atyraýda «Qansonar-2017» respýblıkalyq qusbegiler týrnıri ótti. Atyraý, Jambyl, Qyzylorda, Aqtóbe oblystary men Astana, Almaty, Kókshetaý, Pavlodar qalalarynan kelgen búrkitshiler 20 búrkit, tórt qarshyǵany ańǵa saldy.
Oblystyq Ulttyq sport túrleri federasııasynyń prezıdenti Aslanbek Janbalaev mundaı báıge munaıly mekende toǵyz jyldan beri ótpegenin aıtady. Jaıyq jaǵasyndaǵy Jańatalap aýylynda saıatshylar qustaryn qasqyr, qoıan, qarsaqqa salyp jarysqa tústi. Nátıjesinde, atyraýlyq Arman Qoshqarovtyń «Naryn» búrkiti birinshi oryndy jeńip aldy. Aqmola oblysynyń namysyn qorǵaǵan Bergenbaı Aqtamberdiuly ekinshi, astanalyq Rýslan Maǵzomov úshinshi oryndardy enshiledi.
Jambyl oblysynan kelgen Serikbolsyn Jalǵasulynyń jasy 15-te. Bala kezinen ań aýlap, qus baptaýdyń qyr-syryn meńgergen Serikbolsyn «Eń jas saıatshy» retinde marapattaldy.
Dúbirli dodadan qarshyǵalar da qapy qalmady. Jambyldyq Baýyrjan Shernııazdyń qarshyǵasy ıesine birinshi báıgeni syılady. Ekinshi orynnyń mejesinen Almaty oblysynyń atynan qatysqan Aıat Seıitjan kórinse, úshinshi júldeni atyraýlyq Aqberen Qurmanǵalıev ıelendi.
Baqytgúl BABASh,
«Egemen Qazaqstan»
ATYRAÝ
Sýretti túsirgen
Nurbeıbit NUǴMANOV