WBO nusqasy boıynsha birinshi orta salmaqta álem chempıony Saýl «Kanelo» Alvares (48-1-1, 34 KO) otandasy kishi Hýlıo Sezar Chavespen (50-2-1, 32 KO) jekpe-jeginen keıingi jospary týraly oı bólisti.
Aıtýyna qaraǵanda, bul aıqastan keıin belbeýin qorǵaýdy nemese salmaǵyn kóterýdi oılamaıdy eken. Qaıta orta dıvızıonǵa aýysýdy josparlap otyr.
«Osy jekpe-jekten keıin tek qana orta salmaqta judyryqtasamyn. Bul jóninde komandammen aqyldastym. Josparym mine, osyndaı. Birinshi orta salmaqtaǵy chempıondyǵymdy qorǵamaımyn. Chaveske qarsy urysym týraly aıtar bolsam, ekeýimiz de táýekelge bel býyp otyrmyz. Ol birneshe kıloǵa tússe, men qaıta salmaq qosýym qajet. Boksta keıde osyndaı qadamdarǵa baryp turý kerek. Buǵan bola alańdamaımyn. Qaıta, Hýlıo qobaljý kerek», – dedi Alvares.
Kishi Chavespen aıqasy 6 mamyr kúni Las-Vegasta 164,5 fýnt salmaqta ótedi.
Aıta keteıik, orta salmaqta búginde Gennadıı Golovkınge (36-0, 33 KO) jeter boksshy joq. О́tken jyly Alvares brıtanııalyq Amır Handy jeńgennen keıin kórermen bolyp kelgen qazaqstandyq boksshyǵa qarap, ashyq túrde jekpe-jekke shaqyrǵan. Sondaı-aq, osy aıqastan keıin sol jyldyń kúzinde WBA (Super), IBO jáne IBF belbeýleriniń ıegerimen judyryqtasatynyn da málimdegen. Biraq arada birneshe kún ótkennen keıin meksıkalyq boksshy WBC belbeýin esh qarsylyqsyz GGG-ǵa qaldyryp, ózi birinshi orta salmaqqa qaıta aýysqan.
Qos sportshy búginge deıin boks keshin uıymdastyrýda qarjy máselesine baılanysty ortaq ymyraǵa kele almaı júr.