«Egemen Qazaqstan» redaksııasy men Qazaqstan Respýblıkasynyń Ulttyq kitaphanasy áriptestik memerandýmǵa qol qoıdy
Aıtýly shara El gazeti – «Egemen Qazaqstannyń» jaryqqa shyǵýynyń 100 jyldyǵy men Ulttyq kitaphananyń shańyraq kóterýiniń 90 jyldyǵy qarsańynda jasalynyp otyr. Osy oraıda gazettiń tarıhı qujattaryn túzeýde aqparattyq-bıblıografııalyq qyzmet kórsetý men aqparattyq qoldaý jasaýdyń Ulttyq kitaphananyń aqparattyq resýrsynda jınaqtalǵan qujattyq málimetteri arqyly júzege asyrylatyny týraly keleli áńgime qozǵaldy.
Almatyǵa arnaıy at basyn buryp kelgen «Egemen Qazaqstan» respýblıkalyq gazeti» aksıonerlik qoǵamynyń tóraǵasy Darhan Qydyráli eń
aldymen rýhanı múddeles eki uıymdy jaqyndastyratyn jaǵymdy jańalyqty jetkizdi.
«Táýelsizdigimizdiń 25 jyldyǵyna oraı bas basylym «Egemen Qazaqstan» kitaphanasynyń serııasyn shyǵarýdy bastady. Aty aıtyp turǵandaı atalǵan jınaqta táýelsizdik alǵan shırek ǵasyr ishindegi Qazaq eliniń jeńisti joly men jemisti kezeńderi týraly baıandalady», – degen tóraǵa Ulttyq kitaphanyń dırektory Janat Seıdýmanovqa basylym kitaphanasynyń jańa shyqqan alǵashqy úsh kitabyn syıǵa tartty.
Budan tys bolashaqta birlesip jasaıtyn barlyq is-sharalarǵa uıytqy bolý arqyly gazet kitaphanaǵa áriptestik kómek kórsetetinin, Ulttyq kitaphanada ótetin mańyzdy sharalardyń basylym betinde jarııalanýyna árqashan da beıildi ekenin aıtty.
О́z kezeginde Qazaqstan Respýblıkasynyń Ulttyq kitaphanasynyń dırektory Janat Seıdýmanov Bas basylymnyń 100 jyldyq mereıtoıy qarsańynda kitaphana qorynan tarıhı qujattar, derekter men kórnekti quraldar negizinde toptamalar daıyndaýǵa at salysatynyn aıta kelip, ol úshin Ulttyq kitaphanada barlyq jaǵdaı jasalynǵanyn ortaǵa saldy. Basylymdardy sıfrlyq júıege engizýdiń jańa tehnologııanyń kúshimen júrgizilip jatqany, mundaı jańa tehnologııa TMD memleketteri aýmaǵynda 6 respýblıkada ǵana bary atap kórsetildi. Bas basylymnyń kitaphana qorynda jatqan paraǵy sarǵaıǵan gazetterinen tys «Eńbekshi qazaqtyń» ótken ǵasyrdyń 40-shy jyldary Máskeýge jiberilgen sırek sandaryna qol jetkizýdiń de esh qıyndyǵy joq ekeni týraly basylym basshysyn habardar etti.
Jyly shyraıly júzdesýde eki jaq tarıhı kezeń qarsańynda ózara yntymaqtasa jumys isteıtinderi týraly áriptestik memorandýmyna qol qoıdy.
Al janashyr oqyrmandar úshin taǵy bir qosyp aıtar búgingi bizdiń jańalyǵymyz – «Egemenniń» tarıhı betterin SD-dısk túrinde qabyldaıtyn kúnniń de alys emestigi týraly kózaıym habar der edik.
Talǵat SÚIINBAI,
«Egemen Qazaqstan»
ALMATY