Bilim berýdiń jańa kókjıegi

Qazaqstan Respýblıkasynyń Tuń­ǵysh Prezıdenti Nursultan Ábishuly Nazarbaev el táýelsizdiginiń alǵashqy kúninen bastap bilim berý salasyna erekshe kóńil bólip keledi. Bilim men ǵylymdy tereń ıgergen el ǵana álemdik básekelestikke tótep bere alatynyn basty nazarǵa alǵan Memleket bas­shysy táýelsizdiktiń 25 jyly ishin­de qazaq­stan­dyq bilimdi halyqaralyq stan­dart­tarǵa jaqyndatý, sáıkestendirý úshin qanshama ter tókkeni bizge jaqsy málim. Elbasynyń bıylǵy «Qazaqstannyń Úshinshi jańǵyrýy: jahandyq báseke­lestik­ke qabilettilik» taqyrybyndaǵy Joldaýy da bilim salasyn aınalyp ótpedi. Qazaqstan damýynyń úshinshi kezeńinde eldiń jahandyq básekege qabilettiligin qamtamasyz etetin ekonomıkalyq ósim­niń jańa modelin qalyptastyrý qajet­tigi týyndap otyrsa, ekonomıkamen qatar, onyń negizgi tiregi bolyp tabylatyn adamı kapıtal sapasyn jaqsartý, munyń ishinde bilim berý júıesin túbegeıli jańartý máselesi sóz bolǵany osy oıym­nyń dáleli. «Bizdiń mindetimiz – bilim berýdi ekonomıkalyq ósýdiń jańa modeli­niń ortalyq býynyna aınaldyrý», degen Elbasy oqytý baǵdarlamalaryn, oqýshy­nyń synı oılaý qabiletin jáne óz betimen izdený daǵdylaryn damytýǵa baǵyttaý qajettigin, aqparattyq-kom­mýnıkatıvtik tehnologııaǵa negizdel­gen bilimdi, qarjylyq saýattylyqty qalyp­tastyrýǵa, ultjandylyq qasıetti damytýǵa basa kóńil bólý kerektigin atap kór­setti. Shyn máninde, aqparattyq-kom­mý­nıkatıvtik bilimmen qarýlanǵan óz elin súıetin ultjandy, shynaıy pat­rıot urpaq tárbıeleý ult bolashaǵy­nyń kepili desek, Elbasynyń bili­m­di, básekege qabiletti otanshyl jastar­dy qalyptastyrý týraly usynysy óte oryndy der edik. О́ıtkeni, jalpy bilim beretin mektepter aldaǵy ýaqytta ultjandy urpaq tárbıeleý úshin aıanbaı eńbek etýi kerek. Joldaýdyń bilim salasyna qatys­ty taraýynda úsh tildi oqytýǵa da kezeń-kezeńmen kóshý máselesi sóz boldy. «Qazaq tiliniń basymdyǵy saqtalady. Onyń ári qaraı damýyna zor kóńil bólinedi. Sonymen qatar, búginde aǵyl­shyn tili – jańa tehnologııa, jańa ındýs­trııa, jańa ekonomıka tili. Qazirgi kezde 90 paıyz aqparat aǵylshyn tilinde jarııalanady. Aǵylshyn tilin meńgermeı, Qazaqstan jalpyulttyq progreske jete almaıdy. 2019 jyldan bastap 10-11-synyptarda keıbir pánderdi aǵylshyn tilinde oqytatyn bolamyz», degen Elbasy úshtildilik máselesin taǵy da nazarǵa salady. Baqtııar SMANOV, UǴA korrespondent-múshesi, pedagogıka ǵylymdarynyń doktory, professor