Oıymyzdaǵy boldy, kóńilimiz toldy! Bul oıdy qazir ár qazaq balasynyń kókeıinen, qýanysh kernegen kóńilinen, jarqyldaı kúlgen júzinen tanyp, oqýǵa bolar edi. Qazaq eli tarıhtyń taǵy da bir syndarly kezeńinen ótti.
Kúni keshe elimizde bolyp ótken Qazaqstan Respýblıkasynyń Prezıdenti saılaýyn tarıhtyń syndarly kezeńi demeske taǵy da bolmaıdy. Soǵys órti tutanyp, daý-damaıy kóbeıip, dúrmegi ulǵaıyp bara jatqan baı deıtin, baqýatty deıtin kóptegen arab elderindegi jaǵdaıdy oılasaq boldy, sondaı órt pen kesepattan, teketires ári qarama-qaıshylyǵy mol kózqarastar men pikirlerden óz elińniń aman bolýyn taǵy da tileriń bar. О́ıtkeni, dúnıeniń tórt buryshynyń bir jerinde tutanyp jatqan órt dúnıeniń ózge bir buryshyna qaýip pen qater tóndirmeıdi deýge taǵy da aýyz barmaıdy. Sol órtti tutandyrǵysy kelip, janyǵyp júrgenderdiń óz elimizde bar ekendigi de jasyryn emes.
Mine, osy bir oılar qaýmalaǵan kóńilimizdiń bir sátke de ornyna túskendigin aıta otyryp, 3 sáýir kúni Qazaqstan Respýblıkasy Prezıdentiniń saılaýynyń elimizde oıdaǵydaı ótkendigine qýanamyz. Jáne de Ortalyq saılaý komıssııasynyń aldyn ala jasap otyrǵan esebi boıynsha, bul saılaýda Nursultan Ábishuly Nazarbaevtyń jeńiske jetkendigi kóńilimizdegi sol qýanyshymyzdy tasyta túsetindigin de jasyra almas edik. О́ıtkeni, el táýelsizdiginiń 20 jylynda Qazaqstandy álemge tanytqan, keshegi kúni turalap qalǵan ekonomıkasyn, halqymyzdyń júrelep qalǵan turmysyn kóterip, búgingi kórikti kúı men óristi kúnge jetkizgen Nursultan Nazarbaevtyń danalyǵy men daralyǵyn, kemeldiligi men kemeńgerligin tarıh jáne júrip ótken jolymyz eriksiz moıyndatary anyq.
Eń bastysy – týǵan eli men týǵan halqyna, Qazaqstandy mekendep otyrǵan barlyq ulttar men ulystardyń múddesine adal qyzmet ete bilgen Prezıdentimizdiń adamı qasıetterin ózge elderdiń halqy anyq tanyp, súısine biletindigi jáne «Nazarbaevtaı Prezıdentteriń bar qazaqtar, sender baqyttysyńdar!» degen sózdi synshy jat kózdiń kórip tanýy men aıtyp kele jatqandyqtary bizge úlken oı salsa kerek-ti.
Áńgimeniń adalyn aıtar bolsaq, qazaq balasy biz Nursultan Nazarbaevqa árdaıym rızamyz. Eń bastysy qazaq balasyn shashyratyp almaı, jeriniń tutastyǵyn, eliniń amandyǵyn, memleketiniń abyroıyn asqaqtata bilgendigi úshin rızamyz! Kúni keshe deıik, Qazaqstannyń TMD elderin bylaı qoıyp, búkil túrki áleminde tuńǵysh bolyp Eýropadaǵy qaýipsizdik jáne yntymaqtastyq uıymyna tóraǵalyq etýi, Astana Sammıtin ótkizýi jáne Astana Deklarasııasynyń qabyldanýy álem tarıhynyń betterine altyn áriptermen jazylyp qalǵandyǵy anyq. Sol álemdik kóne tarıhtyń bir betine qazaq degen eldiń taraýyn óz qolymen jazyp qaldyra bilgen de – Nursultan Nazarbaev! Bul endi óshpes tarıh, ólmes kezeń bolyp máńgiliktiń máńgiligine jalǵasyp kete berer ǵumyrly dúnıe. Sol ǵumyrly dúnıeniń alyp aǵystary men tolqyndary, alapat daýyldary men nóser jaýyndary, órekpigen daýlary men óshtesken kekteri, bir-birine kezengen otty da oqty qarýlary arasynan bizdiń kıeli de qasıetti elimizdi, qazaqtyń keń baıtaq jerin, kórgen qasireti de, tartqan beıneti de, keshken azaby men mazaǵy da bir basyna jeterlik qazaq halqyn búgingi kúni aıdaı álemge tanytyp, Shyǵysqa murnyn shúıire qaraıtyn zaıyrly Eýropanyń ózine tóreligin júrgizip, bıligin aıtqan Qazaqstandy sol bıiktikke kótergen de Nursultan Nazarbaev!
Álem osy kúni Qazaqstannyń jáne onyń Prezıdenti Nursultan Nazarbaevtyń pikirimen sanasyp, oıymen oraılasyp otyratyn bolsa, bul da bizdiń elimizdiń aıdaı álem aldyndaǵy abyroıynyń asyp otyrǵandyǵynyń kórinisi bolsa kerek-ti. Qazirgi dúnıe bıliktiń eserligin kótere almaıtyny bar. Dúnıege esti basshy, esti qaıratker, esti saıasatker qajet. Osy qasıetterdiń barlyǵy da bizdiń Prezıdentimiz Nursultan Nazarbaevtyń tula boıynan tabylyp jatatyndyǵy taǵy da daý týdyrmaıtyn máseleniń biri. Aqyl men qaırat, sabyr men ustamdylyq, kóregendilik pen kemeńgerlik, jer-jahannyń tirshiliginiń tynysyn tereń sezine bilýshilik, adam balasynyń qasiretine beı-jaı qaraı almaıtyn izgilik pen meıirimdilik, jylaǵandy jubata biler, qulaǵandy súıeı biler qaıyrymdylyq, ádildik pen adaldyq sııaqty adamı asyl qasıetter júreginen nur bolyp tógilip turar Prezıdentimizdiń osy bir qasıetteriniń shapaǵatyna jalǵyz qazaqstandyqtar – biz ǵana emes, dúnıe halyqtarynyń da bólenip kele jatqandyǵyn da aıtqan lázim. Elbasynyń jalpyadamzattyń múddesi úshin Semeı atom polıgonyn jabýy, irgedegi Qyrǵyz eli halqynyń jaǵdaıynyń qıyn tusynda jáne sońǵy shırek ǵasyr boıy túrli jeleýmen soǵys polıgonyna aınalyp otyrǵan Aýǵanstanǵa kómek pen qamqorlyq qolyn sozýy, kedeıshilik pen joqshylyqtyń, asharshylyq pen toıyp tamaq ishpeýdiń azabyn tartyp otyrǵan kedeı memleketter úshin álemniń damyǵan elderiniń báriniń de ózderiniń áskerı bıýdjetiniń jyl saıyn 1 paıyzyn berip otyrý jóninde dúnıege alǵash ret oı aıtqan bizdiń Prezıdentimizdi adam múddesin bárinen de bıik qoıyp, bárinen de qasıetti sanaıtyn álemdik deńgeıdegi birden-bir saıasatker ekendigin adal nıetti adamzat áldeqashan tanyǵandyǵy da bar.
Biz Nursultan Ábishuly Nazarbaevty qaıtadan óz Prezıdentimiz etip saılaý arqyly óz elimizdiń táýelsizdiginiń odan ári bekip, nyǵaıa túsýiniń jańa múmkindikterine jol ashtyq. Biz qazaq elindegi búgingi jarasty yntymaq pen birliktiń, tatýlyq pen dostyqtyń tamyryna odan ári bekip, tereńdeı tússin degen nıetpen nár quıdyq. Biz táýelsiz Qazaqstannyń ekonomıkalyq saladaǵy qýatynyń jańa múmkindikteriniń órkendeýiniń tetigine serpin berdik. Biz barlyq qazaqstandyqtardyń úmitti bolashaǵynyń jańa ottaryn jaǵyp, jarqyn kúnderge degen senimin nyǵaıta tústik. Eldiń óz Elbasyna degen sol senimi bizdiń búgingi, erteńgi jáne bolashaqtaǵy barlyq jeńisterimiz ben jetistikterimizdiń basty kepili bolyp sanalatyndyǵy da anyq.
Bul jolǵy saılaýda da Nursultan Nazarbaevtyń jeńiske jetetindigine kóńilimizde eshbir kúmánniń bolmaǵandyǵy da anyq edi. О́ıtkeni, týǵan elin taǵy da bir abyroıly asýǵa shyǵarý úshin 2020 jylǵa deıingi bolashaǵymyzdy boljap otyrǵan Elbasynyń saıasaty da, Qazaqstan halqyna arnaǵan bıylǵy Joldaýy da barlyq qazaqstandyqtardyń kóńilinen shyǵyp, sol patsha kóńildegi senimdi nyǵaıta túskendigi bizdi osy bir jeńiske jetkizdi.
Osy saılaýda Qazaqstan Respýblıkasynyń prezıdenttigine kandıdat Nursultan Ábishuly Nazarbaevtyń Aqmola oblystyq qoǵamdyq shtabynyń tóraǵasy jáne senimdi ókili bolǵandyǵymdy óz ómirimniń eń bir jaýapty ári baqytty kezeńiniń biri dep sanarym bar. Osy mindetti atqarý kezinde halyqtyń, sonyń ishinde barsha kókshetaýlyqtar men aqmolalyqtardyń Elbasyǵa degen yqylasynyń túpsiz tereńdigin, nıetteri men kóńilderiniń sútteı tazalyǵyn, tilekteriniń adaldyǵyn taǵy da bir tanı tústim.
Qoǵamdyq shtabtyń janynan qurylǵan qoǵamdyq qabyldaýǵa kelýshilerdiń qatary birde-bir sıregen joq. О́mirden kórgeni de, túıgeni de mol Meırambek Qıyqov basqarǵan bul qoǵamdyq shtabqa Qazaqstan Respýblıkasynyń prezıdenttigine kandıdat N.Á.Nazarbaevtyń atyna halyqtan 851 amanat kelip tústi. Munyń basym kópshiligi aqmolalyqtardyń Nursultan Nazarbaevqa degen ózderiniń rızashylyqtaryn bildirip, alǵystaryn aıtyp, saılaýda jeńiske jetýine tilektestikterin jetkizip, ózderiniń qoldaıtyndyqtaryn aıtyp jazǵan hattary edi.
Bıylǵy jyldyń 13 qańtary kúni «Nur Otan» halyqtyq-demokratııalyq partııasy Tóraǵasynyń birinshi orynbasary Nurlan Nyǵmatýlınniń bastamasymen «Qazaqstan-2020» Jalpyulttyq demokratııalyq kúshter koalısııasy qurylǵan edi. Bul koalısııanyń tóńiregine Qazaqstandaǵy biraz saıası partııalar men qoǵamdyq uıymdar birigip, olar Nursultan Nazarbaevtyń Qazaqstandy ındýstrııalandyrýdyń 2020 jylǵa deıingi baǵdarlamasyn júzege asyrýǵa jan-jaqty qoldaý kórsetý úshin bir mámilege kelgen bolatyn. Mundaı koalısııa bizdiń oblysymyzda da qurylyp, olar barlyq aýdandardy aralap shyǵyp, halyqpen kezdesýler ótkizip, bizdiń kandıdatymyzdyń saılaý aldyndaǵy baǵdarlamasyn keńinen túsindirip, Ult Kóshbasshysy Nursultan Nazarbaevtyń Qazaqstannyń 20 jyldyq tarıhyndaǵy atqarǵan isi jaıly halyqtyń kóńilinen shyǵarlyq áńgimeler aıtyp, eldi birlikke, yntymaqqa jáne óz bolashaqtaryn durys tańdaýǵa shaqyrdy. Oblystyq koalısııanyń quramynda jumys istegen Kókshetaý men Qaraótkelge esimderi belgili tulǵalardy bóle-jarmaı-aq solardyń árqaısysyna shynaıy alǵysymyzdy aıtamyz.
Bıylǵy saılaýdyń barynsha ádil ári taza ótkendigin aıtqan jón. Bizdiń oblysymyzdyń ózinde 50-den astam sheteldik baıqaýshylar jumys istedi. Olar saılaýǵa deıin úgit-nasıhat jumystarynyń qalaı júrip jatqandyǵyna kóńil bólse, saılaý kúni daýys beretin ýchaskelerde bolyp, óz baıqaýlaryn júrgizdi. Eýropadaǵy qaýipsizdik jáne yntymaqtastyq uıymynyń halyqaralyq baıqaýshysy Ketlın Vıllı jáne Germanııa Fedaratıvti Respýblıkasynan kelgen baıqaýshy Mıhaıl Laýbsh, Reseı Federasııasy ortalyq saılaý komıssııasy tóraǵasynyń orynbasary Stanıslav Vavılov jáne de Polshadan, Belorýssııadan, Slovakııadan kelgen baıqaýshylar da ózderiniń qorytyndy áńgimelerinde Qazaqstandaǵy bıylǵy saılaýdyń barynsha zań aıasynda, demokratııalyq negizde júrgizilgendigin atap kórsetti.
Toqsan aýyz sózdi prezıdenttikke kandıdat N.Á.Nazarbaevtyń Aqmola oblystyq qoǵamdyq shtaby óziniń mıssııasyn oıdaǵydaı atqaryp shyqty dep túıinder edik. Osy oraıda shtabtyń barlyq múshelerine alǵysymdy aıtamyn. Eń bastysy – Nursultan Nazarbaev úshin daýys berip, elimiz ben erimizdiń mereıin asyrǵan barsha saılaýshylarǵa rızashylyǵymyzdy bildiremiz.
Bul jeńis elimizdiń bolashaǵy úshin kerek edi! Soǵan qol jetti! Qazaqstan Respýblıkasynyń Prezıdenti bolyp saılanǵan halqymyzdyń adal perzenti Nursultan Ábishuly Nazarbaevty barlyq kókshetaýlyqtar men aqmolalyqtardyń atynan quttyqtaı otyryp, elimizdiń de, Elbasynyń da amandyǵyn tileımiz.
– Osy kúni myna jalyndap órtenip jatqan dúnıeden elimdi qalaı aman-saý alyp qalamyn dep kúni-túni alańdap júrmin, – degen Nursultan Nazarbaevtyń osy bir aýyz sózi Elbasynyń kemeńger kókeıindegi adal oıyn tanytyp turǵandyǵy anyq. Káne, aǵaıyn, eliniń múddesin oılaýmen bar sanaly ǵumyryn ótkizip kele jatqan, taǵy da sol uly mindetter men múddeler jolynda, bolashaǵymyz úshin, Siz ben biz úshin atqa qonyp, taqqa mingen Elbasyǵa tilekshi de tireýshi bolaıyq!
Jabal ERǴALIEV, Aqmola oblystyq máslıhatynyń depýtaty, Qazaqstannyń eńbek sińirgen qaıratkeri.
Kókshetaý.