Meniń aıtaıyn degenim, myna kórshi Qytaımen shekaralas ornalasqan Dostyq beketindegi jaǵdaı. Ashyǵyn aıtsaq, temir jol ústinen jylma-jyl salynýy shegerilip kele jatqan jolaýshylar ótetin kópir máselesi bolyp tur.
Temir jol ústinen ótetin kópirdiń qashan salynatyndyǵy – kópshilik kókeıinde júrgen saýal. Kópir jaıly biraz usynystar kóterilip, qazirgi aýyl ákimi men burynǵy beket basshysy tıisti oryndarǵa, ıaǵnı, «Qazaqstan temir joly» Ulttyq kompanııasy» aksıonerlik qoǵamynyń magıstraldyq jeli dıreksııasynyń fılıalyna ótinish joldaǵan edi. Alaıda, kópir salýǵa tikeleı qatysy bar atalǵan mekeme syrǵytpa jaýaptan ózge syńaı tanytpaı otyr. Al jaýapta atalǵan magıstraldy jeli dıreksııasy fılıaly tóraǵasynyń birinshi orynbasary bylaı depti:
«Jobalaýshy jobalyq-izdestirý jumystaryn jalǵastyrý ústinde. Jobalyq-smetalyq qujattama 2014 jyly daıyn bolǵan jaǵdaıda, 2015 jyly Dostyq stansasynda jaıaý júrginshiler kópirin salý josparlanyp otyrǵandyǵyn habarlaımyz». Sol jaýaptan soń da úsh jylǵa taıady. Áli kúnge óli tynyshtyq. Bekettiń oń qataryndaǵy boı kótergen eki, úsh qabatty turǵyn úıler men onda qonystanǵan otbasylar sany da artyp keledi. Eresekterdiń jumysqa, balalardyń mektepke jetýi muń bolyp tur. Olar amalsyz erejelerdi buzyp, qatar-qatar turǵan vagondardyń astynan ótýge májbúr.
Temir joldyń sol jaǵynda mekemeler men turǵyn úıler tizilip tursa, oń jaǵy halyqaralyq avtomagıstralmen shektesedi. Sol sebepti bul kópirdi avtokólik jolynan asyra salsa durys bolar edi. Halyq qamyn oılasaq, úzbeı jel soǵatyn Dostyqtaǵy josparlanǵan kópirdiń ústin jazǵy ystyq pen qysqy yzǵarly aıazǵa tótep beretindeı jabyq qylyp, kóz tartar sáýletpen ádiptese tipten durys. Joǵaryda aıtylǵan jobanyń joly ashylsa degen kóp tileýi – osy.
Muny másele etip kóterip otyrǵanymyzben, bul istiń ilgeri basatynyna kúdiktene de qaraımyz. О́ıtkeni, aýdan ortalyǵynan shyǵatyn 170 shaqyrym joldyń Dostyqqa deıingi 80 shaqyrymnan astamyna shırek ǵasyr boıy birde-bir ret jóndeý júrgizilmegen. Tipti, aldynda osy bas basylymǵa Mádenıet saraıy men sport kesheni týraly jazylǵanymen, ol ǵımarattardyń áli kúnge qazyǵy qaǵylmaýy da osyny meńzeıdi.
Buqaralyq sport pen mádenıetke jete mán berý kerektigin Elbasymyz jerine jetkize aıtqan bolatyn. Keleshek urpaq ósip kele jatqan shekaralyq aımaqta bul sharýa da kenjelep otyr. Qordalanǵan máseleler qomaqty. Sonyń túıinin sheship, túbegeıli ózgeristerge qol jetkizý ákimder aldyndaǵy abyroıly mindet bolsa ıgi.
Seıit OMAROV,
aýyl turǵyny
Almaty oblysy