Tabıǵattyń tosyn minezine úreımen qarap, «qarǵyn sý qaı jaǵymyzdan shyǵady eken» dep otyrady jurt. Sondaı jaǵdaı kúni keshe Qazaly aýdanynda oryn aldy.
Basyqara sý torabyna muz keptelip, sý arnasynan shyǵady. Tańmen talasa darııadan jaıylǵan sý jurttyń záre-qutyn qashyrady. Solaısha, 3 shaqyrym joǵaryda ornalasqan «Balshyqsaı» ýchaskesin sý alady. Dereý iske kirisken tótenshe jaǵdaı qyzmetiniń qyzmetkerleri 15 adamdy jaıylǵan sýdyń ortasynan alyp shyǵady. Onyń ishindegi ekeýi bala eken. Olardy Basyqara aýylyndaǵy týystaryna jetkize bergende, «Shotaı» ýchaskesin de sý aldy» degen derek jetedi. Ol jerdi Q.Asanov jeke sharýashylyǵy jaılaıdy eken. Osy sharýashylyqqa qarasty 32 bas múıizdi iri qara men 16 bas jylqy qurǵaq aımaqqa shyǵarylady.
Qyzylordadan darııany boılaı «MI-171» tik ushaǵy shyǵady. Syrdyń boıyndaǵy jaǵdaıdy baqylap, monıtorıng jasaıdy. Sóıtse, Qumjıek ýchaskesinde 8 adam qıynshylyqqa tap bolypty. Onyń 6-y bala eken. Olardy sýdyń ortasynan alyp, aýdan ortalyǵyna jetkizedi.
Bir kúnniń ishinde 23 adam qutqaryldy. Bul da bolsa jumystyń júıeli bolǵanynyń belgisi der edik.
Erjan BAITILES,
«Egemen Qazaqstan»
Qyzylorda oblysy