Batys Qazaqstan oblysyndaǵy sý tasqyny salǵan ábiger barsha qazaqstandyqtardyń qabyrǵasyna aıadaı batýda. Aǵaıyndyq, baýyrmaldyqtyń kórinetin jeri osyndaıda. Obal-saýaptyń qadirin biletin ońtústikqazaqstandyqtar Oraldaǵy aǵaıynǵa qal-qadirlerinshe kómek kórsetýde. Jaqynda Álı Sabırov atty zeınetker qaıyrymdylyq qoryna óz zeınetaqysy esebinen 1 mln. teńge aýdardy. Álı kókemizdi jaqsy bilemiz. Kommýnıstik Halyq partııasynyń OQO fılıalynyń birinshi hatshysy, týralyqty jaqsy kóretin, kómeıindegisin basshy-qosshy demeı irikpeı aıtyp tastaıtyn azamat. Habarlastyq.
– Dúnıem asyp-tasyp jatqandyqtan aýdaryp jatqan joqpyn, – deıdi ol. – Men 1963 jyly joldamamen Oral oblystyq komsomol komıtetiniń birinshi hatshysy bolyp taǵaıyndaldym. 1972 jyly Máskeýdegi partııa mektebindegi oqýdan soń Oral oblystyq Tasqala aýdandyq partııa komıtetine birinshi hatshy etip jiberdi. Osy qyzmette balamasyz 1988 jylǵa deıin jumys istedim. О́zim ońtústiktiń týmasy bolsam da munda eshkim bóten jaqtansyń dep kókiregimnen ıtergen emes. Týǵanyndaı baýyryna tartty. Kórshi Reseı, qasymyzdaǵy aýdandardyń hatshylary eki-úsh jylda aýysyp jatsa da halyq maǵan qatty senim bildirip, osy qyzmetimdi atqarýymdy qalaıtyn. Ondaǵy jurtpen aǵaıyn-týysqan bolyp kettik. Keıin men zeınetke shyqqanda 1993 jyly Tasqaladaǵy bir kóshege meniń atymdy berdi. Keıinirek aýdannyń qurmetti azamaty ataǵyn berdi. Oral óńiri – meniń jalyndy jastyq shaǵym, azamattyq bolmysym qalyptasqan jer.
О́zim zapastaǵy polkovnıkpin. Zeınetaqym joǵary. Qudaıǵa shúkir, balam da jaqsy qyzmette. Oraldaǵy aǵaıyn-týys aýyr halge túskende únsiz qala almaǵan sebebim osy. Olarǵa aýyr tıip jatqanyn bilemin. Júregim-janym solarmen birge. Tasqyn sýdyń beti qaıtyp, tezirek úı-jaılaryna ornalasýyn qudaıdan tilep otyrmyn.
Baqtııar TAIJAN.
Shymkent.