Tasymal júıesinde toqyraý kóp

Elimizdiń geografııalyq jaǵ­daıy, soǵan oraı onyń júk tasy­mal­daý aýqymy álem elderiniń kóliktik tasymaldaý júıesinen esh qalyspaıtyny anyq. Al tasymal­daýdyń negizgi kózi avtomobıl jáne temir jol júıeleri bolyp tabylady. Buǵan birneshe myń sha­qyrymdy quraıtyn sý jáne áýe joldary da qosylady. Sońǵy kezderi elimizde tasy­mal­daý júıesiniń mańyzy arta tús­keni belgili. Biraq soǵan oraı bul saladaǵy negizgi kemshilikter tasy­maldaý júıesiniń júıeli jumys isteýine kedergi keltirip, qulashyn keńinen sermeýge tusaý salyp otyr­ǵany da belgili boldy. Bul týraly keshe «Nur Otan» HDP janyndaǵy Jemqorlyqpen kúres jónindegi respýblıkalyq qoǵamdyq keńestiń 19-shy otyry­synda aıtyldy. Otyrysta qaralǵan máseleler Kólik jáne kommýnıkasııa mınıstrligi salasyna qatysty jaılarǵa baılanysty órbidi. Soǵan oraı baıan­dama jasaǵan Kólik jáne kommýnıkasııa vıse-mınıstri Erkin Dúı­sem­baev mınıstrliktiń jáne onyń aýmaqtyq organdarynyń jem­qor­lyqpen kúres boıynsha jumysy oıdaǵydaı atqarylyp jatqan­dy­ǵyn tilge tıek etti. Onda jem­qor­lyq quqyq buzýshylyq jasaýǵa múmkindik týǵyzatyn kedergilerdi joıý boıynsha birqatar sharalar qolǵa alynǵan, qadaǵalaý qyzmet­terin quqyqtyq reglamentteý jáne qyzmetterdi usyný bo­ıyn­sha da birqatar jumystar at­qarylǵan. Tipti baıandama­shy­nyń aıtýyna qa­raǵanda, WEB-saıtta «Kólik sala­syn­daǵy jemqor­lyq­qa tosqaýyl» atty bólim de ashylǵan kórinedi. Alaıda, otyrysta sóz alǵan Qoǵamdyq keńes músheleri elimizdegi avtomobıl joldarynyń na­shar­lyǵy kólik qatynasyn múlde tó­mendetip otyrǵanyn kóldeneń tart­ty. Bıýdjetten bólinetin mol qa­rajat dittegen maqsatqa jetpeıdi, sonyń saldarynan qysqa jip kúr­meýge kelmeı, tapshylyq qoldy baılaıdy. Ásirese, qolda­nystaǵy tehnıka men tehnolo­gııa­lar­dyń eskirýi, ınfraqurylym salasynyń damymaýy saldarynan qazirgi tasy­maldaý júıesiniń ju­mysy qanaǵat­tanarlyq deńgeıde emes. Jol qaýip­­sizdigi de halyq­ara­lyq talap nor­malarynan ál­de­qaıda tómen jatyr. Munyń basty kemshiligi, balyq ba­synan shirıdi degendeı, atalǵan mınıstrlikte sybaılas jemqor­lyqtyń shekten tys ósýinde bolyp otyrǵan kórinedi. Onda tek memlekettik satyp alýlar salasynda ǵana 36 mıllıard teńge kóleminde zań buzýshylyqtar oryn alǵan. Sońǵy eki jylda Kólik jáne kommýnıkasııa mınıstrligi sala­syn­da sybaılas jemqorlyqtyń edáýir ulǵaıǵanyn oty­rysqa qa­tysqandar túrli dálelder keltire aıtty. О́tken jyly atalǵan mınıstrliktiń qyzmetkerleri ara­syn­da 21 jemqorlyq kórinisi anyq­­talǵan, bul – burynǵy jyl­darmen salystyrǵanda 40 pa­ıyzǵa kóp. Al osy keleńsiz qyl­mystardyń túgelge jýyǵyn, ıaǵ­nı 90 paıyzyn Kóliktegi baqylaý komıtetiniń qyzmetkerleri jasap­ty. Aleksandr TASBOLATOV.