Memorandýmǵa qol qoıyldy

Jýyrda oblys ákiminiń baspa­sóz qyzmeti mańyzdy da qýanyshty bir habardy taratty. Iаǵnı, osydan onshaqty kún buryn Er-Rııadta Semeıde ókpe aýrýlaryn emdeıtin balalar aýrýhanasyn salýǵa 7 mıllıon AQSh dollaryn grant esebinde bólý týraly memorandýmǵa qol qoıylypty. Eki jaqty qujatqa Saýd Arabııasy koroldigi qarjy mı­nıstriniń orynbasary Súleı­men at-Túrkı men Shyǵys Qa­zaq­stan oblysy ákiminiń birinshi oryn­basary Serik Ábdenov qol qoıǵan kórinedi. Baspasóz paraqshasynda Saýd Arabııasy tarapynan Koroldiń mundaı sheshimi Qazaqstan bas­shy­sy N.Á.Nazarbaevtyń 29 tamyzdy Iаdrolyq qarýdan bas tartýdyń halyqaralyq kúni retinde atap ótý týraly usynysyn qoldaǵanynyń belgisi jáne Semeı atom polı­go­ny­nyń jabylǵanyna 20 jyl tolýyna oraı baýyrlas arab eliniń kórset­ken kómegi ekendigi atap kór­se­til­gen. Munyń syrtynda atalǵan memleket basshylyǵy Elbasymyzdyń halyqa­ra­lyq deńgeıdegi bedelin joǵary ba­ǵalaıtyndyqtaryn jetkize otyryp, bizdiń eldiń Islam Konferensııasy Uıymyna jemisti tóraǵalyq etetinine tilektestikterin bildiripti. Týberkýlez búginde jer betinde keńinen taraǵan aýrý túri bolyp tabylady. 1993 jyly Dúnıe­jú­zi­lik densaýlyq saqtaý uıymy ókpe aý­rýyn adamzattyń jahandyq má­se­lesi dep jarııalaǵan edi. Jer sha­rynyń úshten bir bóligi osy indetke shaldyqqan. Álemde jyl saıyn 8,4 mıllıon naýqas tirkelip, sonyń 2 mıllıonǵa jýyǵy kóz jumýda. Semeıde de jylyna júzden astam jetkinshek ókpe aýrýyna shal­dy­ǵyp keledi. Sondyqtan munda 80 oryndyq aýrýhana salý qajettiligi týyndap otyr. Qazirgi tańda qu­ry­lys nysanynyń orny anyqtalyp, medısınalyq mekemeniń jobalyq-smetalyq jáne tehnıkalyq-eko­no­mı­kalyq qujattary ázir turǵan kórinedi. Onda naýqastarǵa barlyq qolaıly jaǵdaı jasalmaq. 6 qabatty ǵımarattaǵy ár palata 2-3 naýqasqa laıyqtalyp jasalmaq. Jet­kinshekter osynda emdele ja­typ, sabaqtaryn jalǵastyrmaq. Aý­rý­hananyń ákimshilik bóliginde konferens-zal, muraǵat, trenaj­dyq zal salý josparlanǵan. Bul – Semeı atom polıgonynyń jabyl­ǵanyna 20 jyl tolýyna oraı osy óńir jetkinshekterine úlken qamqorlyq. Endi atalǵan arab eli Semeı qalasynda salynyp jatqan úsh myń oryndyq jańa meshit qury­ly­syna da kómektespek kórinedi. Dáýlet SEISENULY. Semeı.