Alash partııasy men Alashorda ókimetiniń qurylǵanyna bıyl 100 jyl tolyp otyr. Osy dataly oqıǵany eske alý maqsatynda L.N.Gýmılev atyndaǵy Eýrazııa ulttyq ýnıversıtetinde «Kitap taǵdyry – qoǵam taǵdyry» atty halyqaralyq ǵylymı-tájirıbelik konferensııa uıymdastyrylyp, atalmysh shara aıasynda alashtanýshy ǵalym, professor Tursyn Jurtbaıdyń qos kitaby – «Bol moıa, gordost moıa – Alash» jáne «Akınak» atty shyǵarmalarynyń tusaýy kesildi.
Týyndy avtory Tursyn Jurtbaı naǵyz alashshyl azamat. Buǵan deıin osy taqyrypty qaýzaǵan «Uranym – Alash» atty kitaptar serııasy qazaqsha jaryq kórgen bolatyn. Joǵarydaǵy orys tilinde shyqqan 1100 bettik kólemdi týyndy «Uranym – Alashtyń» tolyqtyrylǵan aýdarmasy. Ekinshi kitap «Akınak» avtordyń taǵy bir qundy eńbegi – eki tomdyq «Dýlyǵa» kitabynyń jetildirilgen oryssha nusqasy. Kitapta Gerodottyń shyǵarmasy arqyly tanys Tarǵytaıdan bastap, kók túrikter dáýiriniń bıleýshileri Bilge qaǵan, Kúltegin qatarly 77 tarıhı adamnyń esim-tulǵasy baıandalady.
Tusaýkeser ústinde pikir bildirgen tanymal tarıhshy Bolat Kómekovtiń paıymynsha, Tursyn Qudakeldiulynyń «Akınagy» – kúlli Eýrazııa keńistigin qamtıtyn hronologııalyq kitap hám ulttyń tarıhı sanasyn qalyptastyratyn dúnıe. Al ekinshi týyndy – shyn máninde Alashtyń qany men kóziniń jasy. Bul kitaptyń jazylýyna birden-bir sebepshi adam – Oljas Súleımenov. Oljekeń 1987 jyly 13 qańtar kúni Tursyndy shaqyryp alyp, Memlekettik qaýipsizdik komıtetiniń arhıvine kirip, qujattarmen tanysýǵa ruqsat alyp bergen. Arhıvte 2 jyl tapjylmaı otyrǵan T.Jurtbaıdyń eńbegi kitap bolyp 30 jyldan keıin tolyq kúıinde jaryq kórip otyr.
Jıynǵa qurmetti qonaq retinde qatysqan Oljas Omaruly: «Tursyn jabýly qazannyń betin ashý úshin 30 jyl ǵumyryn arnady. Aýyr eńbekti asa tabandylyqpen atqaryp shyqty», dep avtorǵa zor alǵysyn bildirdi.
Beken QAIRATULY,
«Egemen Qazaqstan»