«Birinshi, joldyń kúnnen kúnge ósip kele jatqan tranzıttik potensıalyn tıimdi paıdalaný úshin taýar aǵymyn jeńildetý kerek. Ol úshin qyzmet sapasyn arttyrý, ákimshilik kedergilerdi alyp tastaý sııaqty jumystar jasaý qajet. Bul baǵytta Qazaqstan naqty sharalar qabyldap jatyr. Degenmen, atalǵan jumysty iske asyrý tıisti qarjyny talap etedi. Sondyqtan Azııa banki osyndaı baǵdarlamalardy belsendirek qarjylandyrǵany jón dep sanaımyn, óıtkeni ol bolashaqqa salynatyn ınvestısııa bolmaq» dedi Elbasy.
Ekinshi másele retinde Qazaqstan basshysy Jibek joly boıynda azyq-túlik qaýipsizdigin saqtaý maqsatynda aýyl sharýashylyq kooperasııalaryn damytýdyń mańyzyn aıtty. Al úshinshi pýnkt ǵylym men tehnıkaǵa baılanysty. «Úshinshi – biz ınnovasııalyq jáne ǵylymı-tehnıkalyq damý salasyndaǵy baılanystardy tereńdetýimiz kerek. Ǵylymı-zertteý jáne tájirıbelik-konstrýktorlyq jumystar ortalyqtarynyń jobasyn birlese qarjylandyrý máselesin qaraýǵa bolady. Dóńgelek ústelge qatysýshy qurmetti áriptesterdiń nazaryn aýdarǵym keletin nárse, Qazaqstan ǵalymdary Jibek joly Halyqaralyq ǵylym akademııasyn qurýdy usynyp otyr. Bul ıdeıany Qytaıdaǵy áriptester jáne 16 eldiń ǵylymı ortalyqtary qoldady. Usynys jan-jaqty qoldaý tabady dep úmittenemiz» dedi Nursultan Nazarbaev.
Prezıdent tórtinshi másele retinde qorshaǵan ortany qorǵaý máselesine toqtaldy. Ol qurlyqtaǵy transshekaralyq ózenderdiń sý resýrstaryn rasıonaldy basqarýdyń ózektiligin aıtty. «Besinshi – «Beldeý jáne jol» ıdeıasyn damytýdyń negizgi sharttarynyń biri qatysýshy elder arasyndaǵy ózara senim jáne olardyń teń dárejede jan-jaqty yntymaqtastyqqa daıyn bolýy. Buǵan forýmdy aldaǵy ýaqytta turaqty ótkizip otyrý úles qosar edi. Bul proseste Azııadaǵy ózim senim sharaly jónindegi keńes jaqsy kómekshi bola alady» dedi Qazaqstan basshysy.
Nursultan Nazarbaev «Beldeý jáne jol» bastamasyn kóterý arqyly Qytaıdyń álemge aımaqtyq kooperasııanyń jańa úlgisin kórsetkenin aıtty. «Jyl saıyn Tynyq muhıty men Atlantıka aralyǵynda jańa ári jyldam marshrýttar ashylýda. Olardyń arqasynda tek Eýrazııadaǵy saýda kólemi 2020 jylǵa qaraı 1,2 trıllıon dollardan asady degen boljam jasalyp otyr» dedi Nursultan Nazarbaev.
Eske sala keteıik, 14-15 mamyr kúnderi Pekınde «Beldeý jáne jol» atty halyqaralyq forým ótip jatyr. Oǵan 20-dan asa eldiń memleket jáne úkimet basshylary qatysýda.