Osy kúnderi Qorǵanys mınıstrliginiń Shoqan Ýálıhanov atyndaǵy Kadet korpýsynyń oqý ortalyǵynda jas jaýyngerler kýrsy ótýde.
Oǵan bıyl oqýǵa túsken 209 kýrsant qatysýda. Atalǵan kýrs 5 tamyz kúni bastalǵan. Osy kezden bastap kýrsanttar dalada ornalasqan shatyrly qalashyqta turyp, kún saıyn tańerteńnen keshke deıin áskerı daıyndyqtan ótýde. Kadet korpýsynyń basshysy, podpolkovnık Talǵat Baýdınovtyń aıtýynsha, oqý ortalyǵynda kýrsanttarǵa teorııalyq sabaqtar is júzinde kórsetilýde. Munda olar dene tárbıesi jattyǵýlaryn jasap, ashyq alańda okopta jatyp, ózine qarsy kele jatqan tank pen basqa da aýyr tehnıkalarmen betpe-bet kezdesip, jaý áskerine qaımyqpaı qarsy turýdy, qarý-jaraqtyń barlyq túrinen atýdy, qarý-jaraqtardy bólshektep, qaıta jınaýdy, aýyr tehnıkalardy júrgizýdi úırenýde.
Jaqynda biz Qorǵanys mınıstrliginiń mamandarymen birge oqý ortalyǵynda bolyp, jas jaýyngerler kýrsymen tanystyq, kýrsanttardyń bári áskerı daıyndyqtan ótip, qarý-jaraqtyń barlyq túrinen atýdy úırenip, ofıserlerdiń bergen tapsyrmalarynyń bárin múltiksiz oryndap jatqandaryn kórdik. Osy jerde Kadet korpýsynyń basshysy, podpolkovnık T.Baýdınov bizge oqýǵa túsken kýrsanttardyń daıyndyǵy jóninde aıtyp berdi. Onyń aıtýynsha, bıyl Kadet korpýsyna oqýǵa túsemin deýshilerdiń sany kóbeıgen. Baıqaý boıynsha orta eseppen bir orynǵa úsh adamnan kelgen. Qabyldaý komıssııasyndaǵy kásibı irikteý kandıdattardyń densaýlyǵyn, dene tárbıesi daıyndyǵyn, psıhologııalyq jáne jalpy bilimin keshendi túrde úsh kezeń boıynsha zertteý arqyly iske asyryldy. Birinshi kezeńde jas jigitter medısınalyq, dene tárbıesi jáne psıhologııalyq kórsetkishteri boıynsha irikteldi. Ekinshi kezeńde olardyń memlekettik sertıfıkattaǵy balldary eskerilse, úshinshi kezeńde osy synaqtardan ótken kandıdattar qabyldandy.
Búginge deıin 1680 serjant túlep ushsa, qazir 416 kadet bilim alýda. Degenmen, taıaqtyń eki ushy bar degendeı, bıyl oqýǵa túsken kýrsanttardyń arasynan 3 adam áskerı daıyndyqty meńgere almaı, sabaq úlgeriminiń nasharlyǵyna baılanysty oqýdan shyǵaryldy.
Kadet korpýsy – Ortalyq Azııa óńirindegi teńdesi joq oqý orny. Onyń basty mindeti – bilimi men biligi joǵary serjanttar ázirleý. Al oqýǵa túsip, áskerı synaqtardan óte almaı, áskerı tártipke baǵynǵysy kelmeı, óz isine júrdim-bardym qaraǵan adamdar serjant ataǵyna laıyq emes. Serjant erteńgi kúni bir vzvod jaýyngerge úlgi kórsetetin, solarǵa úlgi bolatyn áskerı qyzmetshi bolýy kerek. Sondyqtan Kadet korpýsyna serjanttardy daıyndaýda qatań talap qoıylady. Osyndaı talap pen tártiptiń arqasynda osynda oqyp, bilim alǵan jastar naǵyz azamat bolyp shyǵady, jaýyngerlik dostyqtyń ne ekenin sezinedi. Olar naǵyz komandır retinde, óz qaramaǵyndaǵylarǵa qamqorshy ári óz jeriniń naǵyz qorǵaýshysy bolýdy úırenedi.
Sh.Ýálıhanov atyndaǵy Kadet korpýsy 1996 jyly qurylǵan bolatyn. Reseıdiń ózi serjanttardy daıyndaý isine endi ǵana kirisip jatqanda, bizdiń elimizde serjanttardy daıyndaý osydan 15 jyl buryn bastalǵany kóńilimizdi ósiredi. Qazir korpýsta 772 adam qyzmet etýde. Sonyń ishinde 400-den astamy kýrsanttar bolsa, olarǵa 67 ofıser bilim berýde.
Kadet korpýsyna «Jas Ulan» respýblıkalyq mektebiniń túlekteri, 21 jasqa deıin áskerı mektep-ınternatta oqyǵan, 23 jasqa deıin áskerı boryshyn ótegen jaýyngerler oqýǵa túse alady. Onyń túlekteri motoatqyshtar áskerleriniń kishi komandıri, avtomobıl jáne brondy tank tehnıkasyn jóndeıtin slesar, kompıýter operatory, 3 sanattaǵy jaıaý áskerlerdiń brondy tank máshınesiniń júrgizýshisi (BMP) mamandyǵyna ıe bolady.
Atalǵan korpýs 2013 jyly Astanadaǵy Ulttyq qorǵanys ýnıversıtetine kóshýdi oılastyrýda. Sodan keıin Serjanttar akademııasyn nemese ınstıtýtyn ashý maqsat etilip otyr.
Dastan KENJALIN.