Májilis depýtaty Saýytbek Abdrahmanov Ortalyq Komıtette qyzmet istep júrgende Erbol Sháımerdenovpen qalaı, qandaı jaǵdaıda tanysqany týraly baıandady. Ol kezde E.Sháımerdenov «Sosıalıstik Qazaqstan» gazetiniń Aqmola oblysyndaǵy menshikti tilshisi eken. Jýrnalıst jazyqsyz kúıip, partııadan shyǵarylǵan qazaq azamatyna arasha túsip, gazetke maqala jazady. Sonyń nátıjesinde, azamat aqtalyp jatsa, bir depýtat Máskeýdegi «Trýd» gazetine maqala berip, onyń aqtalýyna shúbá keltirgen. Sol kezde ortalyq basylymnyń synynan ólerdeı qorqatyn Qazaqstan basshylary maqalany tekserýge arnaýly komıssııa shyǵaryp, Aqmolaǵa jiberedi. Sol komıssııanyń quramynda bolǵanda Erboldyń barlyq faktilerdi aınytpaı jaza biletin sheber, bilgir jýrnalıst bolǵanyna tánti boldym, dedi depýtat. Osy tekseristiń arqasynda maqaladaǵy faktilerdiń durystyǵy anyqtalyp, Erbolǵa jaza berýdiń ornyna, kerisinshe, qyzmeti ósirilipti.
Kezdesýge Almatydan arnaıy kelgen belgili ǵalym, qoǵam qaıratkeri Rahman Alshanov ta qyzyqty estelikter aıtty. Qazaq mektebin bitirgen stýdentter arasynan QazGÝ-diń komsomol komıtetine hatshy saılaýda tańdaý jýrfaktyń 2-kýrs stýdenti Erbol Sháımerdenovke túsip, sol ýaqytta Erbol alǵashqy bolyp fakýltetterde qazaq tilinde oqytatyn bólimder ashýdy usynady. Sol kezde oqıǵanyń ortasynda júrgen adam retinde men bul usynysty alǵashqy bolyp kótergen Erbol ekenine kýálik bere alamyn, dedi ol. Erbol jastar komıtetiniń sheshimin de qabyldatyp, ony rektoratqa resmı túrde usynýǵa muryndyq bolǵan eken. Men Erbol Sháımerdenovtiń esimi Prezıdenttiń «Bolashaqqa baǵdar: rýhanı jańǵyrý» maqalasynda aıtylǵan 100 jańa esim jobasyna engizilýi kerek dep sanaımyn, dedi Rahman Alshanov.
Qoǵam qaıratkeri Orazkúl Asanǵazy kezinde Astanada «Til týraly» zańnyń talaptaryn oryndatýǵa Erbol Sháımerdenovtiń Bas prokýratýraǵa jazǵan hatyna kelgen jaýaptyń kóp kómegi tıgenin tilge tıek etti. E.Sháımerdenovtiń jerlesi, jazýshy Jarasbaı Súleımenov Erboldyń altynshy synyptan bastap óleń jazyp, ony oblystyq gazetke jarııalata bastaǵanynyń kýási bolǵanyn jetkizdi. Aqyn Serik Turǵynbekov ony «asylymdaı altyn saqam ózińsiń, asyǵyndaı kóringenmen quljanyń» dep baǵalaǵanyn eske aldy. Belgili qoǵam qaıratkeri Sabyr Qasymov Ortalyq Komıtette birge qyzmet istegen jyldarynda Erbol ulttyq dúnıelerdiń janashyry bolǵanyna birneshe mysal keltirdi. Onyń ultjandy bolýynyń dińgegi – adamı tazalyqtan, ultyna adaldyǵy men azamattyq jaýapkershiliginiń joǵary bolýynan, dedi ol.
«Egemen Qazaqstan» gazetiniń burynǵy basshysy, tanymal qalamger Erjuman Smaıyl da kóp adam bilmeıtin tyń derekterdi ortaǵa saldy. Sonyń ishinde Jeltoqsan oqıǵasynan keıin bolǵan sot prosesterin jazýǵa «Sosıalıstik Qazaqstan» gazetinen Erbol ekeýin jibergenin, sonda barlyq jasandylyqtardy, qoldan qurastyrylǵan qııanattardy kórýmen qatar, qara bastaryn arashalaý úshin keıbireýlerdiń satqyndyqqa baryp, óz joldastaryn ashyq qaralap, jala japqan jaıttarǵa da kýá bolǵandaryn aıtty. Eger sot prosesi sol kúıinde jazylyp, halyqqa jarııalanatyn bolsa, jeltoqsandyqtardyń ıgi isteri aıaqqa taptalatynyn sezgen Erbol maqala jazýdan bas tartýdy usynǵan eken. Osy pozısııany ustanǵan ekeýin redaktor da qoldap, aqyry maqala jazylmapty.
Eske alý keshiniń qorytyndysynda jurttyń bári de Erbol Sháımerdenovtiń úndemeı júrip, úlken isterdi tyndyrǵanyn jaqsy biletinderin aıtty. Kýrstas dosy Súleımen Mámettiń sózimen aıtqanda, ol aqyndyǵynan basqa: baspasóz hatshysy qyzmetin alǵashqy qalyptastyrýshy; rámiztaný isiniń kóshbastaýshysy; qazaq danalyǵyn jınaǵan alǵashqy aforızm qurastyrýshy jáne t.b. jumystardy abyroımen atqarýshy retinde tarıhta qalyp, 100 jańa esimniń ortasynan oıyp oryn alýshy degenge jınalǵandardyń bári de biraýyzdan kelisti.
Eske alý keshinde kompozıtor Marat Omarov E.Sháımerdenovtiń óleńine jazylǵan «Arman qala – Astana» ánin oryndady. Odan basqa da ónerpazdar án shashýlaryn jasady, al Ulttyq akademııalyq kitaphana basshysy Ú.Muńalbaeva aqynnyń jary men qyzyna oramal japty.
Jaqsybaı SAMRAT, «Egemen Qazaqstan»