«Bıyl Ulttyq biryńǵaı testileý eki kezeńde ótedi. Birinshisi qorytyndy attestattaý – bul memlekettik bitirý emtıhany. Ekinshisi UBT - joǵary oqý oryndaryna túsý emtıhany. Kezeń-kezeńimen ótetin osy mańyzdy sharany asqan jaýapkershilikpen ótkizýdi jaýapty sala basshylaryna júkteımin», dedi Janseıit Qanseıituly.
Jıyn barysynda baıandama jasaǵan oblystyq bilim basqarmasy basshysynyń mindetin atqarýshy Raýshan Ergashovanyń aıtýynsha, oblystaǵy bilim salasy UBT-ǵa tolyqtaı daıyn. Oblysymyzdaǵy 1429 túlek «Altyn belgi» belgisine, 852 bitirýshi úzdik attestatqa, 9-synypty bitirýshilerdiń 3568-i úzdik kýálikke úmitti.
«Bıyl UBT Ońtústik Qazaqstan oblysynda 16 jerde ótkiziledi. Olardyń tórteýi joǵary oqý oryndarynyń, úsheýi aýdan ortalyqtaryndaǵy kolledjder, toǵyzy jalpy orta mektepterdiń bazasynda ornalasqan. Árbir UBT ótkizý pýnktterinde 11-den 14-ke deıin aýdıtorııalar daıarlanyp, testileý pýnktteri 237 uıaly telefon sıgnaldaryn tunshyqtyrǵyshtarmen jabdyqtalyp otyr», dedi Raýshan Ergashova.
Bıyl mınıstrliktiń tapsyrmasyna sáıkes 91 jańa úlgidegi 4G jıiliktegi tunshyqtyrǵyshtardy alýǵa jergilikti bıýdjetten qarjy qaralyp, satyp alý jumystary júrgizilýde. Sonymen qatar, testileý pýnktterinde 26 ramaly metalizdegishter, 226 salqyndatqyshtar, testileý kezinde beınejazba júrgizý maqsatynda 42 beınetirkegishter ornalastyrylǵan.
Bıyl oblysta 33112 oqýshy mektep bitiredi. Túlekterdiń 23760-y, ıaǵnı 71,8 paıyzy Ulttyq biryńǵaı test tapsyrýǵa tilek bildirgen. Sondaı-aq, bıyl UBT tapsyratyn 23760 bitirýshiniń 13585-i tasymaldaýdy, 12443-i tamaqtanýdy, 1825 oqýshy jatyn oryndy qajet etedi. Qazirgi ýaqytta jergilikti bıýdjetten bitirýshilerdi testileý ortalyǵyna tasymaldaýǵa - 15677,5 myń teńge, jatyn orynǵa– 409,0 myń teńge, tamaqtanýǵa – 13128,8 myń teńge bólinip, uıymdastyrý jumystary júrgizilýde.