Ekonomıkalyq ósimniń dınamıkasyn saqtaý qajet – Baqytjan Saǵyntaev

Bıylǵy 4 aıdyń qorytyndysy boıynsha ekonomıkanyń negizgi salalarynda ósimniń údeýi baıqalady.  Úkimet basshysy Investısııalar jáne damý mınıstrligine óńdeý ónerkásibindegi jaǵdaıǵa erekshe nazar aýdarýdy tapsyrdy.  Premer-Mınıstrdiń birinshi orynbasary A. Mamınge atalǵan jumysty úılestirý tapsyryldy.  Sondaı-aq Úkimet otyrysynda Múgedekterdiń quqyqtary týraly konvensııanyń saqtalýy máseleleri qaraldy.  Eńbek jáne halyqty áleýmettik qorǵaý mınıstri Tamara Dúısenova múgedekterdiń quqyqtaryn áleýmettik qorǵaý júıesiniń basty qaǵıdaty múgedekterdi áleýmetke kiriktirý bolyp tabylatynyn atap ótti.  Bul tusta basymdyqty baǵyt kólik jáne áleýmettik ınfraqurylym nysandarynda qoljetimdi ortany qurý bolyp tabylady. Onda basty tetikpen múgedekter úshin asa joǵary mańyzǵa ıe 36 myń nysanǵa pasporttaý júrgizý men olardy beıimdeý aıqyndalǵan.  2017 jyldyń 1 sáýirindegi jaǵdaı boıynsha jergilikti atqarýshy organdarmen josparlanǵan 31,1 myń áleýmettik ınfraqurylym nysandarynyń ishinde 28,9 myń (80,3%) nysanda pasporttaý júrgizilgen.  Pasporttaýdyń maqsaty tolyqqandy ári senimdi aqparatty anyqtaý, sonymen qatar múgedekter úshin áleýmettik ınfraqurylym nysandarynyń qoljetimdilik deńgeıin baǵalaý bolyp tabylatynyn aıta ketken jón. Múgedekterdiń qajettilikteri úshin sáýlettik ortany qalyptastyrý kelesi krıterııler boıynsha iske asyrylady: qoljetimdilik, qaýipsizdik, aqparattylyq jáne jaılylyq.  Eske sala keteıik, 2015 jyly Qazaqstan Múgedekterdiń quqyqtary týraly konvensııany ratıfıkasııalap, múmkindigi shekteýli tulǵalarǵa qatysty halyqaralyq standarttardy engizý boıynsha mindettemelerdi qabyldady. Sonymen qatar, Konvensııa normalaryn júzege asyrý maqsatynda «Múgedekterdiń quqyqtaryn qorǵaý boıynsha QR keıbir zańnamalyq aktilerine ózgerister men tolyqtyrýlar engizý týraly» QR Zańy qabyldandy.