Eki qalany qosyp turǵan tas joldyń jalpy uzyndyǵy 26 shaqyrymdy quraıdy. 1981 jyly salynǵan jolǵa buǵan deıin 2007 jyly ǵana ortasha jóndeý jumystary júrgizilipti. Araǵa 10 jyl salyp, qaıta jańaryp jatqan joldyń qurylysyna 40-qa jýyq jergilikti turǵyn atsalysýda.
Kentaý qalasyna jumys saparymen barǵan oblys ákimi Janseıit Túımebaev qurylys jumystaryn sapaly ári qysqa merzimde aıaqtaýdy tapsyrdy.
Osydan keıin oblys ákimi qaladaǵy «Statýs everest» JShS-niń jumysymen tanysty. 2016 jyly jeltoqsan aıynda iske qosylǵan seh qatty turmystyq qaldyqtardy qaıta óńdeýmen aınalysady. Kásiporyn fleks, granýla óndiredi. Jobanyń jalpy quny - 100 mln teńge. Zattaı túrdegi qýattylyǵy jylyna 800 tonna qatty turmystyq qaldyqtardy óńdeýge qaýqarly. Atalǵan sehta 25 adam jumyspen qamtylǵan.
«Shıkizattan tapshylyq kórmeımiz. Plastıktiń úsh túrin qaıta óńdeı alamyz. Eger ónimderimizge suranys artsa, ónim kólemi men jumysshylar sany da arta túspek», deıdi «Statýs everest» JShS-niń dırektory Sanjar Súleımenov.
Kenshiler qalasynda osyjyldyń shilde aıynda túrli-tústi metaldardyń konsentratyn baıytatyn «Kentaý polımetall» JShS óz jumysyn bastaǵaly otyr. Jobanyń jalpy quny 650 mln. teńgeni quraıdy. Zattaı túrdegi qýattylyǵy jylyna - 15000 tonna daıyn konsentrat shyǵarý.
«Shıkizat retinde Aqtóbe oblysynda ornalasqan «Iýbıleınyı» altyn ken orny men Sozaq aýdanyndaǵy «Kúmisti» shashyrańqy altyn oryndarynyń rýdalaryn paıdalanamyz. Investısııalyq joba eki kezeńnen turady. Joba tolyǵymen júzege asyp, iske qosylǵanda «Qazmyrysh» AQ jáne «Qazaqmys» AQ qarasty óndiristik kásiporyndaryn daıyn ónimmen qamtamasyz etetin bolamyz», deıdi «Kentaý polımetall» JShS-niń ınjener-qurylysshysy Azamat Súleımenov.
Qazirgi tańda seriktestik «Myrǵalymsaı» ken ornynyń burynǵy ǵımaratyn satyp alǵan. Búginde munda negizgi óndiristik sehtardyń montajdaý jumystary júrgizilip jatyr.
«Kentaý qalasyndaǵy ındýstrıaldy múmkindikterdi tıimdi paıdalanýymyz kerek. Ol úshin úzdik ǵylymı jobalardy ázirlep, burynǵy jumysy toqtap qalǵan ken oryndarynyń bolashaǵyn sarapqa salǵanymyz jón. Sondyqtan taıaý arada bul máseleni qaıta qarap, naqty qadamdar jasaıtyn bolamyz», - dedi Janseıit Qanseıituly.
Qural-jabdyqtardyń basym bóligi Qytaı elinen satyp ákelingen. Eger joba tolyǵymen iske assa, 110 adam turaqty jumyspen qamtylatyn bolady.