Bul oraıda tek sahna syrtynda tilekshi bolyp qana qoımaı, óner qonǵan balasyn qyrannyń óz balapanyn baýlyǵanyndaı bıikterge talpyndyratyn ata-ananyń da róli erekshe. Ulpan Ábdikerimova da osyndaı óner dese ishken asyn jerge qoıatyn, árqashan qoldaý beretin ónegeli shańyraqta tárbıelengen. Bala jastan bastap qanshama baıqaýlardyń laýreaty, júldegeri atanǵan. Sanańyz, 2003 jyly Almatyda ótken halyqaralyq «Boztorǵaı» baıqaýynyń I oryn ıegeri, 2004 jyly Aqtaýda uıymdastyrylǵan «Biz kún perzentimiz» halyqaralyq baıqaýynyń I oryn ıegeri, 2005 jyly Bolgarııanyń Týtrakan qalasynda ótken «Rechnye noty» halyqaralyq baıqaýynyń bas júlde ıegeri, 2009 jyly Italııada ótken búkilálemdik «San Remo» baıqaýynyń I oryn ıegeri, 2015 jyly Astanada ótken «Meniń Qazaqstanym!» halyqaralyq án baıqaýynyń bas júlde ıegeri, t.b. osyndaı onshaqty baıqaýdyń bas júldesin ne birinshi ornyn qanjyǵaǵa baılaǵan.
Syzyltyp tátti daýyspen án salatyn Ulpan Ábdikerimova qazirgi kezde Qazaq ulttyq óner ýnıversıtetiniń 3-kýrsynda oqıdy. «Klassıkalyq vokal jáne horda dırıjerlik» fakýltetiniń dosenti Tatıana Nıkolaevnanyń synybynda dáris alyp júr. Klassıkalyq baǵytta án salatyn onyń repertýarynda arııa, romans, opera, halyq ánderin qosqanda júz shaqty án bar eken. Daýysy – lırıkalyq koloratýralyq soprano. Ýnıversıtettiń rektory Aıman Musaqojaevamen birge gastroldik saparlarǵa shyǵyp, oqý ordasy atynan shet elderdiń sahnalarynda da óner kórsetip júrgen jas daryn belgili ánshi Dımash Qudaıbergenmen bir topta dáris alady. Ol estradalyq, al bizdiń keıipkerimiz klassıkalyq baǵytta bilim nárin jınaýda.
U.Ábdikerimovanyń el ordasy Astanaǵa kelýi de kezdeısoq emes. Qyzylorda qalasyndaǵy Qazanǵap atyndaǵy kolledjde tórt jyl bilim alǵan boıjetken oblystyq, respýblıkalyq deńgeılerdegi sharalarda án salyp júrip kózge túse bastaıdy. Onyń ómirindegi eń mańyzdy oqıǵa 2012 jyly Qyzylorda qalasyna Elbasy N.Nazarbaevtyń saparmen kelýi bolatyn. Úlken is-sharada án aıtqan jas qyzǵa Prezıdent aq batasyn beripti. «Búginde jastar úshin múmkindikter mol. Tek alǵa úlken maqsattar qoıa bilý kerek. Sen Astanaǵa kel», degen Elbasy sóziniń qudireti Ulpannyń ápkesiniń izimen Almatyǵa barsam degen oıyna toqtaý salǵan. Ol óziniń Astanaǵa kelýine Elbasymyz sebepker bolǵanyn jasyrmaıdy.
«Astana – armandar oryndalatyn qala. Árıne, óner joly ońaı emes. Kóre almaý, qyzǵaný, joldy kesý syndy túrli jaǵymsyz áreketterge de jolyǵýyń múmkin. Biraq, men qandaı jaǵdaıda da ónerdi, sahnany bıik qoıamyn. Qanshama adam bolsa, sonshalyqty talǵam bar. Sondyqtan, árbir ánshiniń óz tyńdarmany bar ekenine senemin», deıdi U.Ábdikerimova. Ol – sahna mádenıeti, daýys kútý, repertýar tańdaýǵa qatysty ózindik pikiri bar ánshi. 22 jasta ǵana bolsa da ónege kórgendigin, mektep kórgendigin baıqatyp, baısaldy áńgime aıtady. Armandary da kóp. Endi bir jyldan soń ýnıversıtet bitiretin jas ánshini taǵdyrdyń qandaı syıy kútip turǵanyn biz bilmeımiz. Áıtse de talantymen óz ortasyn moıyndatyp júrgen jas ánshiniń bolashaǵyna senemiz. Aıgúl SEIILOVA, «Egemen Qazaqstan»