Tańerteń Shymkent qalasynyń «Ordabasy» alańynan bastalǵan is-sharany oblys ákiminiń orynbasary Erbol Sadyr ashyp, Elbasynyń «Bolashaqqa baǵdar: rýhanı jańǵyrý» atty maqalasynyń mańyzdylyǵyna toqtaldy. Sonymen birge, bıylǵy «Bılerge taǵzym» velosherýine oblystyq, aýdandyq sottardyń sýdıalary men oblys ákimdiginiń, «Nur Otan» partııasy oblystyq fılıalynyń basshylary, jergilikti máslıhat depýtattary, jastar, barlyǵy 120-dan astam adam qatysyp otyrǵanyn aıtty.
Oblystyq sottyń tóraǵasy Nurserik Sháripov velosherýdiń bastalý tarıhyna toqtalyp, búgingi shara Memleket basshysynyń maqalasynda aıtylǵan rýhanı jańǵyrýdy iske asyrýdyń naqty bir baǵyty dep aıtýǵa bolatynyn jetkizdi.
Osydan keıin jergilikti máslıhat depýtattary atynan О́.Meldehanov pen «Nur Otan» partııasy oblystyq fılıaly tóraǵasynyń orynbasary E.Daýylbaev sóz sóılep, qatysýshylarǵa sátti sapar tiledi.
Túske taıaý velosıpedshiler respýblıkalyq «Ulttyq tarıhı-mádenı qoryǵyndaǵy» márege jetti. Olardy Ordabasy aýdanynyń basshylyǵy men aýyl turǵyndary saltanatty túrde qarsy aldy.
Odan ári Ordabasy taýyndaǵy «Birlik» monýmentinde jıyn ótip, aýdan ákimi Almasbek Mamytbekov velosherýge qatysýshylarǵa ulttyq qoryqqa qurmet kórsetkenderi úshin alǵysyn jetkizdi.