Zeınetaqy men járdemaqyny arttyrý boıynsha zań jobasy maquldandy

«Zań jobasynda zeınetaqy zańnamasyna birqatar ózgerister engizý kózdelgen. Birinshiden, Elbasynyń bıylǵy Joldaýynda bergen tapsyrmasyna sáıkes, 2017-2018 jyldary bıýdjetten tólenetin zeınetaqylar mólsheri úsh kezeńde arttyrylatyn bolady. Birinshi kezeńde, ıaǵnı 2017 jylǵy 1 qańtardan bastap yntymaqty zeınetaqylar mólsheri – 9 paıyzǵa, bazalyq zeınetaqy 7 paıyzǵa artty. Al, ekinshi kezeńde, 2017 jylǵy 1 shildeden bastap yntymaqty zeınetaqy mólsheri – 11 paıyzǵa, bazalyq zeınetaqy mólsheri 13 paıyzǵa kóbeıtilgeli otyr. Nátıjesinde, 2017 jylǵy 1 shildeden bastap zeınetaqy mólsherleri 2016 jylǵy zeınetaqy mólsherimen salystyrǵanda 20 paıyzǵa artady. Iаǵnı, eń tómengi zeınetaqy 45 711 teńgege deıin, ortasha zeınetaqy 66 676 teńgege deıin artatyn bolady», – dedi Eńbek jáne halyqty áleýmettik qorǵaý mınıstri Tamara Dúısenova «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zań jobasyna baıandama jasaý barysynda.  Sondaı-aq, 2017 jylǵy 1 shildeden bastap zeınetaqy taǵaıyndaý úshin esepke alynatyn tabystyń eń joǵarǵy mólsherin 41 aılyq eseptik kórsetkishinen 46 aılyq eseptik kórsetkishine deıin (93 029 teńgeden 104 374 teńgege deıin) arttyrý kózdelgen. Bul 2017 jyldyń birinshi jartysynda taǵaıyndalǵan zeınetaqylardyń 11 paıyzǵa artý esebimen osy jyldyń ekinshi jartysynda taǵaıyndalǵan zeınetaqylar mólsherleriniń tepe-teńdigin qamtamasyz etý úshin qaralyp otyr.  «Zeınetaqyny arttyrýdyń úshinshi kezeńi 2018 jylǵy 1 shildeden bastap júrgiziledi. Ol bazalyq zeınetaqyny taǵaıyndaý ádistemesiniń ózgerýimen baılanysty. Búgingi tańda bazalyq zeınetaqy zeınetkerlik jasqa jetken adamdarǵa birdeı mólsherde taǵaıyndalady. Jańa ádistemege sáıkes, ol zeınetaqy júıesine qatysý ótiline baılanysty bolady, bul rette 1998 jylǵa deıingi eńbek ótili jáne 1998 jyldan keıingi jınaqtaýshy zeınetaqy júıesine aýdarylǵan zeınetaqy jınaqtarynyń merzimi eskeriledi», – dep atap ótti T. Dúısenova.  Onyń aıtýynsha, ústimizdegi jyly zeınetaqy mólsheriniń 20 paıyzǵa deıin artýyn eskere otyryp, zań jobasynda bazalyq zeınetaqynyń eń tómengi mólsherin kúnkóris deńgeıinen 50-den 54 paıyzǵa deıin ulǵaıtý usynylyp otyr. Osylaısha, 2018 jylǵy 1 shildeden bastap bazalyq zeınetaqy mólsheri azamattardyń eńbek ótili jáne jınaqtaýshy zeınetaqy júıesine aýdarymdar kezeńi 10 jyldan aspasa – eń tómen kúnkóris deńgeıiniń 54 paıyzyn, 20 jyl bolsa – eń tómen kúnkóris deńgeıiniń 74 paıyzyn, al 33 jyldan asqanda 100 paıyzyn quraıdy.  «Nátıjesinde, eńbek ótili men jınaqtaýshy zeınetaqy júıesine neǵurlym kóp qatysqan azamattardyń zeınetaqysy joǵary bolady. 2018 jylǵy 1 shildeden bastap 2 mln zeınetkerdiń 44,7 paıyzy eń tómen kúnkóris deńgeıiniń 74 paıyzynan joǵary alatyn bolady. 45,2 paıyzy eń tómen kúnkóris deńgeıiniń 100 paıyzyn alady nemese bazalyq zeınetaqysy búgingige qaraǵanda 2 ese kóp bolady dep kútilýde», – dep naqtylady mınıstr.  Vedomstvo basshysy atap ótkendeı, 2018 jyldan bastap jumys berýshilerdiń óz qyzmetkerleriniń paıdasyna 5 paıyz jarnalary esebinen qalyptastyrylatyn shartty-jınaqtaýshy komponentin engizý kózdelgen bolatyn. Qalyptasqan ekonomıkalyq ahýaldy eskere otyryp, zań jobasynda jumys berýshiniń mindetti zeınetaqy jarnalaryn engizý merzimin 2018 jyldan 2020 jylǵa aýystyrý qarastyrylǵan.  Budan basqa, zań jobasynda balaly otbasylardy memlekettik qoldaýǵa baǵyttalǵan normalar qarastyrylǵan. Birinshiden, bala týýyna baılanysty beriletin birjolǵy járdemaqy mólsherin 20 paıyzǵa arttyrý kózdelgen. Járdemaqy mólsheri birinshi, ekinshi, úshinshi balaǵa 31,41 aılyq eseptik kórsetkishten 38 aılyq eseptik kórsetkishke deıin (71 270 teńgeden 86 222 teńgege deıin), tórtinshi jáne odan kóp balaǵa 52,35 aılyq eseptik kórsetkishten 63 aılyq eseptik kórsetkishke deıin (118 783 teńgeden 142 947 teńgege deıin) artatyn bolady.  Elimizde jylyna 400 myńdaı bala dúnıege keletinin eskersek, shamamen 300 myńnan astam otbasy arttyrylǵan mólsherde járdemaqy alady. Nátıjesinde, 2017 jyly járdemaqynyń mólsheri 2016 jylmen salystyrǵanda 27 paıyzǵa artady.