Qazirgi tańda jastardyń albyrttyqpen, ótkinshi sezimniń jeteginde júrip, ot basyp qalatyn jaǵdaılar az emes. Qoǵamda tastandy balalar, ákesiz ósken jetimder, kóz jasyn jýǵan analar taǵdyry bizdi beı-jaı qaldyra almaıdy. Qoıylymnyń altyn arqaýy da osy. Avtor ishki monolog arqyly jastarǵa oı salady.
«Oralhan aǵamyzdyń barlyq shyǵarmasy jaqsy jazylǵan. О́kinishke qaraı, ómirde jastar mahabbattyń býymen durys qadam baspaı, súrinip jatatyny, túrli kedergilerge shydamaı, shyrt synyp jatatyn kezderi jıi bolyp jatady. Qazirgi jetkinshekter burynǵy jastardan ózgerek. О́zderińiz kórip otyrǵandaı, ol kezde mektepte qyz ben jigittiń kezdesip júrýi qoǵamda úlken rezonans týdyryp, qylmys jasaǵanmen teń edi. Ulttyq tárbıeni jańǵyrtýda, ótken ǵasyrdyń enshisinde qalǵan qazaqı tárbıeni qolǵa alsaq, qazirgi jastar sodan úlgi alsa eken deımiz.
Qazir monospektakl elimizde kenje damyp kele jatqan, kóp qoıyla bermeıtin janrdyń bir túri. Sondyqtan monologqa qurylǵan jańasha stılde arasyna qazirgi zamannyń áýenderin qosyp, atap aıtsaq, Kókserek Hamza, Amangeldi Seıtaq, Qanat Imanbekov, syndy birneshe aqyndardyń sózine án jazyp, kórermenge usynyp otyrmyz», deıdi rejısser, ári akter Dáýren Serǵazın.
Basty keıipker Jeńishandy – Dáýren Serǵazın, Baqytty − Ińkár Násıeva oınasa, Aısultan Jálıev, Aqjan Orynbasarova, Meıirǵat Amangeldın syndy akterlar án salyp, mýzykalyq aspappen súıemeldep taǵy bir jańa qyrynan kórindi. Sahna dekorasııasy da zaman talabyna saı ádemi úılesim tapqan. Qalanyń qarbalas tirshiliginen sharshaǵanda óziń týyp-ósken aýyldy, alystaǵy anańdy, ótken bozbala shaǵyńdy saǵynasyń. Aýyl atty altyn besiktiń sanańda qalǵan sáýleli sátterine bir sát oralǵandaı kúı keshesiń.
Aıman MUQYShEVA